ជំពូកទី 7៖ ព័ត៌មានអំពីបរិស្ថានដែលមានកម្រិតតិចតួចបំផុត

(7.1) តើមជ្ឈដ្ឋានដែល​មានការរឹតបន្តឹង​តិចតួច (LRE) មាន​អត្ថន័យ​​ដូចម្ដេច?​

មជ្ឈដ្ឋានដែលមានការរឹតបន្តឹង​តិចតួច (LRE) គឺជាលក្ខខណ្ឌ​តម្រូវ​នៅក្នុងច្បាប់​សហព័​ន្ធ ដែលកំណត់ថា​សិស្ស​មាន​ពិការភាព ​​ត្រូវ​ទទួលបា​នការអប់រំ​នៅក្នុង​កម្រិតអតិបរមាយ៉ាង​សមស្រប​ជាមួយនឹងមិត្តរួមថ្នាក់​​ដែលមិនមាន​ពិការភាព ហើយសិស្សដែលទទួលបានការអប់រំពិសេសនោះ មិនត្រូវបានបណ្ដេញ​ចេញ​ពីថ្នាក់រៀន​​ធម្មតា​ឡើយ លើកលែងតែ​ការអប់រំក្នុងថ្នាក់រៀនធម្មតា​នៅតែ​បន្ត​មិន​ទទួល​បាន​​​​​ជោគជ័យ ទោះបីជា​ជា​មាន​ជំនួយ ​និងសេវាកម្មបំពេញ​បន្ថែមក៏ដោ​យ​​​​​​។ [20 United States Code (U.S.C.) Sec. 1412(a)(5)(A); 34 Code of Federal Regulations (C.F.R.) Sec. 300.114.]

(7.2) តើពាក្យ “ការបញ្ជ្រាប” “ការរួមបញ្ចូលគ្នា” “ការធ្វើ​បរិយា​បន​​​ពេញ​​លេញ​​” និង “ការបញ្ជា្របត្រឡប់​” មានន័យយ៉ាងដូចម្ដេច?

ពាក្យទាំងអស់នេះ គ្មានពាក្យមួយណាដែលបង្ហាញ​ ឬត្រូវបានកំណត់និយមន័យ​​នៅ​​ក្នុងច្បាប់លក្ខន្តិក​របស់​សហព័ន្ធ​ឬរដ្ឋនោះទេ។ ពួកវាជាពាក្យដែ​លត្រូវ​បាន​បង្កើត​​ឡើង​ដោយក្រុម​អ្នកអប់រំ ដើម្បីបកស្រាយ​អំពី​មធ្យោបាយ​ផ្សេងៗ ​ក្នុង​ការ​បំពេញតាមលក្ខខណ្ឌតម្រូវ​មជ្ឈដ្ឋាន​ LRE នៃ​ច្បាប់​អប់រំពិសេស។ ជាលទ្ធផល ភ្នាក់ងារ​អប់រំផ្សេងៗ (ម​ណ្ឌល​សិក្សា​ធិការ​ ផ្នែក​ផែនការ​តាមមូលដ្ឋាន​សម្រាប់​ការអប់រំពិសេស (SELPA) ឬការិយាល័យតាមខោនធី​) អាច​នឹងមានការកំណត់​និយមន័យ​ខុសគ្នា​ខ្លះចំពោះពាក្យទាំងនេះ។ និយមន័យខាងក្រោម​នេះ​ ត្រូវ​​បា​ន​ប្រើប្រាស់ទូទៅ​ជាងគេ។ ប៉ុន្ដែ នៅពេលពិភាក្សាលើ​ពាក្យទាំងនេះជា​មួយ​​អ្នកអប់រំ សូម​យល់​ច្បាស់ថាអ្នក និង​អ្នកអប់រំ ​ឯកភាព​គ្នា​ទៅលើ​អត្ថន័យនៃពាក្យទាំង​នេះ​។

ការបញ្ជ្រាប សំដៅដល់​ការដាក់បញ្ចូលសិស្សដែលមានពិការភាព ទៅក្នុង​សក​​ម្ម​​​ភាព​​ថ្នាក់រៀនធម្មតា​ដែល​កំពុងដំណើរការ ដើម្បីឲ្យកុមារទទួល​បាន​ការ​អប់​​​​​រំ​​ជាមួយមិត្តរួមថ្នាក់​ដែលមិនមានពិការភាព — បើ​ទោះ​បី​ជាបុគ្គលិកអប់រំ​ពិសេ​ស ត្រូវតែផ្ដល់សេវាកម្មធនធាន​បំពេញ​បន្ថែមក៏ដោយ។

ការរួមបញ្ចូលគ្នា រួមបញ្ចូល​នូវ​ការបញ្ជា្របទៅក្នុងថ្នាក់រៀនធម្មតា និង​ការទទួល​​បាន​​​​​បរិយាបន ​និង​​ការចូលរួមនៅក្នុងសកម្មភាព​មជ្ឈដ្ឋានសាលារៀនទាំង​អស់​។ ការរួមបញ្ចូលគ្នា ផ្សំ​បញ្ចូលគ្នា​​​នូវ​ការដាក់បញ្ចូលទៅក្នុង​សាលារៀន​សាធារណៈ​ដោយមាន​ឱកាសជា​បន្ត​បន្ទាប់នៅ​​​​​​ក្នុង​​រចនាសម្ព័ន្ធ និងក្រៅ​រចនាសម្ព័ន្ធ​ ដើម្បី​មាន​​ទំនាក់​ទំនង​ជាមួយមិត្តរួមថ្នាក់​​ដែល​​​​​មិនមាន​ពិការភាព និងមានវ័យ​សមស្រប​​។ សិស្សដែលមានពិការភាពធ្ងន់ធ្ងរ គួរតែ​អាចចូលរួមក្នុង​សកម្មភាពសាលា​ទូទៅ​ជា​ច្រើន​​ដូចជា​អាហារ​ថ្ងៃត្រង់ ការជួប​ប្រជុំ ក្លឹប​ របាំ ឬពេលសម្រាកជាដើម។ សិ​ស្ស​គប្បីចូលរួមក្នុងការជ្រើសរើសសកម្មភាពនៅក្នុងថ្នាក់រៀនធម្មតាដូចជាសិល្បៈ តន្ត្រី​ ឬ​កុំព្យូទ័រ​ជាដើម​។ សិស្សគប្បីចូលរួមក្នុងមុខវិជ្ជាសិក្សាធម្មតានៅក្នុងថ្នាក់រៀន​ធម្មតា ប្រសិនបើ​ការ​​កែសម្រួល​កម្មវិធី​សិក្សាសមស្រប ត្រូវបាន​ធ្វើឡើង​​ ហើយ​ជំនួ​យ​គ្រប់​​គ្រាន់ ​ត្រូវបានផ្ដល់ជូន​​។ សិស្សគប្បីមានលទ្ធភាព​ប្រើប្រាស់​បរិក្ខា​រ​ដូចគ្នា​ទៅ​នឹងសិស្សដែលមិនមានពិការភាពដែរ​ មានដូចជា​ផ្លូវ​ដើរ បន្ទប់ទឹក បណ្ណាល័យ អាហារ​ដ្ឋាន​ និងមជ្ឈមណ្ឌល​ហាត់ប្រាណជាដើម​។

ការរួមបញ្ចូលគ្នា អាចសំដៅដល់ការរួមបញ្ចូលគ្នានៃសិស្សនៅក្នុង​ការអប់រំពិសេ​ស​​ទៅក្នុងថ្នាក់រៀន​ដែល​មាន​​​ការអប់រំធម្មតា ក្នុងន័យដូចគ្នាទៅនឹង “ការបញ្ជ្រាប” ដែរ​​​។ ប៉ុន្ដែ “ការរួមបញ្ចូលគ្នា” ក៏អាចសំដៅដល់ការដាក់បញ្ចូលសិស្ស​ទៅ​ក្នុងថ្នា​ក់​អប់រំពិសេស ស្ថិត​តាម​​ទីតាំង​​សាលាដែលមានការ​​រួម​បញ្ចូលគ្នា (ពោលគឺ​ ទី​កន្លែ​ង​ដែលមានទាំងថ្នាក់រៀនសម្រាប់ការអប់រំពិសេស និងសម្រាប់ការអប់រំ​ធម្មតា)។ ការដាក់បញ្ចូល​ក្នុងការសិក្សា​ "រួមបញ្ចូលគ្នានេះ" រួមបញ្ចូលនូវ​ការខិ​ត​ខំ​ប្រឹង​ប្រែ​ង​​​ជាប្រព័ន្ធ​ដើម្បីបង្កើត​ឲ្យមាន​ទំនាក់ទំនង​​គ្នា​ជាអតិបរមា​រវាង​សិស្សដែល​មាន​ពិការភាព និងមិត្តរួមថ្នាក់​ដែលមិនមានពិការភាព។

បរិយាបន​ពេញលេញ សំដៅដល់ការរួមបញ្ចូលគ្នាទាំង​ស្រុង​សម្រាប់​សិស្ស​ដែ​ល​​​​មានពិការភាពទៅក្នុង​កម្មវិធី​អប់រំធម្មតា ដោយមាន​ការគាំទ្រជាពិសេស។ នៅ​​​ក្នុ​ង​បរិយាបន​ពេញលេញ ការដាក់បញ្ចូលក្នុងការសិក្សា​សម្រាប់​សិស្សជាចម្បង​​​ គឺ​ជា​​ការ​បញ្ចូល​ទៅ​​​​ក្នុងថ្នាក់​អប់រំធម្មតា។ សិស្ស​មិនមានការចាត់តាំង​បន្ថែម​​​ទៅ​ក្នុ​ង​​​​​ថ្នាក់ពិសេស​សម្រាប់សិស្សដែលមានពិការភាព​នោះទេ។ ដូច្នេះ សិស្ស​ដែល​មា​ន​ពិការភាព តាម​ពិត គឺជាសមាជិកម្នាក់​​របស់​ថ្នាក់អប់រំធម្មតា។ គាត់មិនត្រូវបាន​បញ្ចូល ឬបញ្ជ្រាបទៅក្នុងថ្នាក់អប់រំធម្មតា ពីតាម​ថ្នាក់ពិសេសពេល​ថ្ងៃ​នោះទេ​។ សិស្សមិនចាំបាច់ស្ថិត​នៅក្នុងថា្នក់គ្រប់ពេល 100%​ នោះទេ ប៉ុន្ដែ ​សិស្ស​អាច​ចា​ក​ចេញ​ពីថ្នាក់​ដើម្បី​ទៅ​ទទួល​យកសេវាកម្មពាក់ព័ន្ធ​ដូចជាការព្យាបាល​ផ្នែក​ពាក្យ​សម្តី​ ឬការព្យាបាលដោយចលនាជាដើម​។ ចំពោះការរៀប​រាប់​​ដែលបានស្នើឡើង​ទៅ​លើ​​លក្ខណៈនៃ​គោលវិធី​ “បរិយាបន​ពេញលេញ” ស្តីពី​​​ការរៀបចំ​​កម្មវិធី​​អប់រំ​ពិសេស​រួមបញ្ចូលគ្នា សូមមើលសូចនាករនៃកម្មវិធីបរិយា​ប​ន​​​ពេញលេញ​សម្រាប់​សិស្ស​​​ដែល​មាន​ពិការភាព ផ្នែកឧបសម្ព័ន្ធ ឧបសម្ព័ន្ធ O។

ការបញ្ជា្របត្រឡប់ សំដៅដល់ការអនុវត្តការផ្ដល់ឱកាសក្នុងការ​មានទំនាក់ទំនង​​ជា​មួយមិត្តរួមថ្នាក់​ដែល​មិនមាន​ពិការភាព ទៅ​ដល់​សិស្សណាម្នាក់​ដែលត្រូវ​បាន​ដាក់ទៅក្នុងថ្នាក់រៀនផ្ទាល់ខ្លួន ឬថ្នាក់រៀនដាច់​ដោយ​ឡែក (ឬសាលារៀន) ឬ​សិស្ស​​ដែលរស់នៅ និងចូលរៀន​នៅសាលា​តាម​មន្ទីរពេទ្យរដ្ឋ។ វាជំរុញ​ឲ្យ​សិស្ស​ដែលមិនមានពិការភាព ត្រូវ​ស្ថិតនៅក្នុង​ថ្នាក់រៀនផ្ទាល់ខ្លួន ទីតាំង​​ដាច់ដោយឡែ​ក ឬមន្ទីរ​ពេទ្យ​​រដ្ឋ​​​ក្នុង​រយៈពេល​ពេលណាមួយ ដើម្បីធ្វើការងារ​ជាមួយ ឬ​បង្រៀន​​​​សិ​ស្ស​ដែលមានពិការភាព។ មណ្ឌលសិក្សាធិការ មិនគួរព្យាយាមបំពេញនូវការកំណត់​របស់មជ្ឈដ្ឋាន​ LRE ដោយ​ប្រើប្រាស់​ការ​បញ្ជ្រាប​ត្រឡប់​​ទាំងស្រុងនោះទេ។

ពួកគេគប្បីខិតខំ​ប្រឹងប្រែងជាប្រព័ន្ធ ដើម្បីអនុញ្ញាត​ឲ្យ​សិស្សដែលមានពិការភាព​បា​ន​​ចេញ​​ពីថ្នាក់រៀនពិសេស និង​ចូល​​​ទៅក្នុងមជ្ឈដ្ឋាន​សាលារៀនដែលរួមបញ្ចូ​ល​​គ្នា។ ការបញ្រ្ជាប​ត្រឡប់​​​តែមួយ​មុខ គឺ​ជាមធ្យោបាយបែប​ច្នៃ​ប្រឌិត​​​នៃ​​ការ​រួម​បញ្ចូល​គ្នា។ ក្រុមការងារ​កម្មវិធីអប់រំសម្រាប់​បុគ្គល (Individualized Education Program, IEP) គប្បីគិតអំពីការ​ដាក់​​​​​បញ្ចូល​ក្នុងការសិក្សា​​ដែលលើកទឹ​កចិត្ត​ឲ្យ​មានទំនាក់ទំនងជា​ធម្មតា​ជាមួយនឹងមិត្តរួមថ្នាក់​ដែល​មិន​មាន​ពិការ​ភា​ព​​​។​ អ្នកអប់រំពិ​សេសនិងធម្មតា ត្រូវតែបង្កើតការច្នៃប្រឌិតថ្មី និងការប្រឹងប្រែងជាប្រព័​ន្ធ​ ដើម្បីបង្កើន​ទំនាក់​ទំនង​​​រវាងសិស្សដែលមានពិការភាព (ទាំងសិស្ស​ដែល​មា​​ន​ពិការភាពធ្ងន់ធ្ងរ និងសិស្ស​ដែលមានពិការភាព​ផ្នែក​សិក្សា​) និងមិត្តរួមថ្នាក់​ដែល​​មិនមានពិការភាពរបស់ពួកគេ។

(7.3) តើអ្វីទៅជាប​ញ្ញត្តិនៃ​ច្បាប់រដ្ឋ​ធម្មនុញ្ញ ​​​​ដែលជាមូលដ្ឋាន​នៃ​លក្ខខណ្ឌ​​​តម្រូវ​សម្រាប់​មជ្ឈដ្ឋានដែលមានការរឹបន្តឹង​​តិចតួច​​?

ច្បាប់សហព័ន្ធចែង​​ថាមណ្ឌលសិក្សាធិការនីមួយៗត្រូវតែធានាថា នៅក្នុងកម្រិត​អតិ​ប​រមា​សមស្រប​ កុមារ​​ដែលមានពិការភាព រួមទាំងកុមារក្នុងស្ថាប័នសាធារណៈ​ឬ​ឯកជន ឬមជ្ឈមណ្ឌល​ថែទាំផ្សេងៗផងដែរ​ ត្រូវ​ទទួលបាន​ការអប់រំ​ជាមួយនឹង​កុមារ​ដែលមិនមានពិការភាព និងការអប់រំ​តាមសាលារៀន​​ដាច់​ដោយឡែក បើពុំ​នោះ​​ទេ​ ការដក​យក​កុមារដែលមានពិការភាពចេញ​ពីមជ្ឈដ្ឋាននៃការអប់រំធម្មតា ប្រព្រឹតទៅបាន​លុះត្រាតែ​លក្ខណៈ​ ឬកម្រិត​ធ្ងន់ធ្ងរនៃពិការភាពរបស់កុមារ គឺ​ស្ថិត​ក្នុង​កម្រិត​មួយ​ដែល​ការអប់រំ​ក្នុង​ថ្នាក់​ធម្មតា ដោយមាន​ការប្រើប្រាស់ជំនួយ និង​សេវាបំពេញ​បន្ថែម មិនអាច​សម្រេចបាន​ជោគជ័យ​។

[20 U.S.C. Sec. 1412(a)(5)(A); 34 Code of Federal Regulations (C.F.R.) Sec. 300.114(a)(2); Cal. Ed. Code Sec. 56342(b).]

បន្ថែមពីនេះទៀត សភាបានទទួលស្គាល់ថា វិធីសាស្រ្ដរបស់រដ្ឋក្នុងការផ្ដល់ថវិកា​ដល់សេវាកម្មការ​អប់រំ​ពិសេស ពេលខ្លះអាចលើកទឹកចិត្ត​ដល់មណ្ឌលសិក្សាធិការ​ឲ្យដាក់បញ្ចូល​សិស្សក្នុងមជ្ឈដ្ឋាន​ពិសេស​ ​ដោយសារ​​​តែលទ្ធ​ភាពក្នុ​ង​ការទទួលបា​ន​​​ថវិកាបន្ថែម។ ដោយសារតែ​បញ្ហា​ប្រឈម​នេះ​ ទើប​សភាតម្រូ​វ​ឲ្យរដ្ឋបង្កើតនូវគោល​នយោបាយ និងនីតិវិធីដើម្បី​ធានា​ថា​ប្រព័ន្ធនៃការផ្ដល់ថវិការបស់ពួកគេ (បើផ្អែក​លើ​ប្រភេទ​នៃ​​មជ្ឈដ្ឋានណាមួយ) មិនល្មើស​លើលក្ខខណ្ឌ​តម្រូវ​លើ​ការអប់រំក្នុង​មជ្ឈដ្ឋាន​រឹតបន្តឹង​តិចតួចនោះទេ​។ [20 U.S.C. Sec.1412(a)(5)(B).]

សភាបានទទួលស្គាល់យ៉ាងច្បាស់លាស់ពីសារៈសំខាន់នៃការអប់រំពិសេស​របស់​សិស្ស​អប់រំពិសេស​នៅក្នុងថ្នាក់រៀន ​និង​មជ្ឈដ្ឋានធម្មតា។ [20 U.S.C. Sec.14​0​0​​​(c)​(5)(A) & (D).] រដ្ឋ​សភាតម្រូវឲ្យកម្មវិធី​ IEP រួម​បញ្ចូលនូវ​របាយការណ៍​ដែល​​បញ្ជា​ក់​ថាតើ​ពិការភាព​របស់​កុមារ ប៉ះពាល់​ដូចម្តេចខ្លះ​​​ទៅ​លើ​ការចូលរួម និង​វឌ្ឍនភាពនៅក្នុងកម្មវិធីសិក្សាទូទៅ​ និងរបាយការណ៍​ស្តីពី​គោល​ដៅ​ប្រចាំឆ្នាំ​ដែល​​​រួម​បញ្ចូល​នូវ​ចំណុចគោល ឬវត្ថុ​បំណងរយៈពេលខ្លី ដែលទាក់ទង​នឹង​ការ​ជំរុញ​​​ឲ្យ​សិស្ស​មាន​ការ​ចូលរួម និងមាន​វឌ្ឍនភាពនៅក្នុងកម្មវិធីសិក្សាទូទៅ។ [20 U.S.C. Sec. 1414(d)(1)(A)(i); 34 C.F.R. Secs. 300.320(a)(1) & (2).] របាយការណ៍អំពីសេវាកម្មរបស់កម្មវិធី​ IEP ត្រូវរួមបញ្ចូលផងដែរនូវរបាយការណ៍​ដូចជា​​៖

1. ជំនួយ និងសេវាកម្មបំពេញ​បន្ថែមដែលត្រូវផ្ដល់ឲ្យសិស្ស។ និង
2. ការកែសម្រួល​​កម្មវិធី និងការគាំទ្រ​សម្រាប់​បុគ្គលិកសាលារៀន​ដែល​ត្រូវផ្ដល់ជំនួយ​ ដើម្បី​ឲ្យគាត់​ចូលរួម និង​មានវឌ្ឍនភាពនៅក្នុងកម្មវិធីសិ​ក្សា​ទូទៅ និងចូលរួមក្នុងសកម្មភាពកម្មវិធីសិក្សាបន្ថែម និងសកម្មភាព​ក្រៅ​ការសិក្សា​​។ [20 U.S.C. Sec. 1414(d)(1)(A)(i)(IV); 34 C.F.R. Sec. 300.320(a)(4).]

ច្បាប់រដ្ឋចែងថា៖

សិស្សដែលមានពិការភាព គប្បីទទួលបាន​នូវ "កម្មវិធីជំនួយបន្ថែមពិសេសដែល​លើក​កម្ពស់​ទំនាក់​ទំនង​ជា​អតិបរមាជាមួយនឹងក្រុមសិស្ស​​ទូទៅទាំង​អស់​នៅ​សាលា​​​រៀន​ តាមរបៀបមួយ​ដែល​សមស្រប​ទៅនឹង​តម្រូវ​ការ​របស់កុមារ​ទាំង​ពីរ​ក្រុម​​​​។” [Cal. Ed. Code Sec. 56001(g).]

ថ្នាក់រៀន​​ពិសេសដែលបម្រើ​សេវា​ដល់​​សិស្សដែលមានតម្រូវការអប់រំបន្ទាន់​ប្រហា​​​ក់​​ប្រហែលគ្នា​ និងច្រើនជាងគ្នា​ ​គប្បី​មានផ្តល់ជូន​។ ថ្នាក់ពិសេស អាច​ទទួ​ល​​​​ចុះឈ្មោះសិស្សបាន លុះត្រាតែ​លក្ខណៈ ឬកម្រិត​ភាពធ្ងន់ធ្ងរនៃ​ពិការភាព​ គឺ​ស្ថិត​នៅក្នុង​កម្រិត​មួយ​ដែល​ការអប់រំ​នៅក្នុង​ថ្នាក់ធម្មតា​ ដែលមាន​​ប្រើប្រាស់ជំនួយ និង​​សេវាកម្មបំពេញ​បន្ថែម​ ដូចជា​ការ​កែសម្រួល​កម្មវិធីសិក្សា និងការគាំទ្រ​​ផ្នែក​អាក​ប្បកិរិយាជាដើម​​ មិនអាចសម្រេច​បានជោគជ័យ​។ តម្រូវការ​ទាំងនេះ ក៏​អនុវត្តផងដែរ​ចំពោះការអប់រំ​តាមសាលា​ដាច់ដោយឡែក ឬការដកយក​សិស្ស​ដែល​​មាន​​តម្រូវ​ការ​​ពិសេសចេញ​ពីមជ្ឈដ្ឋានអប់រំធម្មតាផងដែរ។

នៅ​​ក្នុងការផ្ដល់ ឬការ​រៀបចំសម្រាប់​ការ​ផ្តល់​​សកម្មភាពនេះ ភ្នាក់ងារសាធារណៈ​នីមួយៗ គប្បីធានាថា​[សិស្ស]​នីមួយ​ៗ​ ត្រូវ​ចូលរួម​ក្នុងសកម្មភាពទាំងនោះជា​មួយ​សិស្សដែលមិនមានពិការភាព ​ក្នុងកម្រិត​អតិបរមា​​សមស្របតាម​តម្រូវការ​[សិស្ស​ដែលមានពិការភាព] រួមទាំងសកម្មភាព និងសេវាក​ម្មក្រៅការ​សិក្សា និង​កម្មវិធីសិក្សាបន្ថែម​ផងដែរ​។ [Cal. Ed. Code. Sec. 56364.2.]

សម្រាប់សិស្សដែលមិនទាន់ទទួលបានការអប់រំពិសេស ប៉ុន្តែសិទ្ធិទទួលបា​ន​ការ​អ​ប់រំ​ពិសេស​កំពុង​ត្រូវ​បាន​ពិចារណាសម្រាប់ពួកគេ​ ដូច្នេះ ​ច្បាប់រដ្ឋចែងថាសិស្ស​គប្បី​ត្រូវ​បានបញ្ចូនបន្ត​សម្រាប់​ការបង្រៀន ឬ​សេវា​កម្ម​​អប់រំពិសេស លុះត្រាតែ​​ក្រោយ​ពេល​ដែល​ធនធានកម្មវិធីអប់រំធម្មតា ត្រូវបានពិចារណា និង​បាន​ប្រើ​ប្រាស់​​​​សមស្របតែ​ប៉ុណ្ណោះ។ [Cal. Ed. Code Sec. 56303.]

បទប្បញ្ញតិ្តរបស់សហព័ន្ធចែងថា៖

លុះត្រាតែកម្មវិធី IEP [កម្មវិធី​អប់រំសម្រាប់បុគ្គល]របស់​កុមារដែលមានពិការភាព​តម្រូវ​​ឲ្យមាន​ការរៀបចំ​ផ្សេងទៀត ពុំនោះសោត កុមារត្រូវទទួលបាន​ការអប់រំនៅ​ក្នុងសាលាដែលគាត់នឹងត្រូវ​ចូលរៀន បើគាត់មិ​ន​មាន​​ពិការភាពនោះទេ​។ [និង]​ក្នុងការ​ជ្រើសរើសមជ្ឈដ្ឋាន​ LRE [មជ្ឈដ្ឋាន​ដែល​មាន​ការរឹតបន្តឹង​តិចតួច] មាន​ការ​ពិចារណាទៅលើ​ផលប៉ះពាល់​មិន​​ល្អដែល​អាច​កើត​មាន​លើ​កុមារ ឬ​ទៅ​លើ​គុណភាពសេវាកម្មដែលគាត់ត្រូវការ​​​។ [34 C.F.R. Secs. 300.116(c) & (d).]

តុលាការសហព័ន្ធជាច្រើន បានចេញសេចក្តីសម្រេចលើ​បញ្ហាអប់រំពិសេសនៅ​ក្នុង​មជ្ឈដ្ឋាន​ដែល​​មានការរឹតបណ្ដឹងតិចតួច។ ជា​ធម្មតា​ ការសម្រេចចិត្តទាំងនេះ បាន​លើកទឹកចិត្តដល់ការអប់រំរួមបញ្ចូលគ្នា និងបានបង្កើត​នូវ​និន្នាការ​​រឹងមាំ​មួយ​នៅក្នុងទិសដៅនេះ​។ ឧទាហរណ៍៖

មាន​ "ការសន្មតជាមុន​​ថា (ក្នុងចំណោមកម្មវិធីការអប់រំ និង​បណ្តុះ​បណ្តាល​ជំនួ​ស​​​​ដែលតម្រូវដោយ​ច្បាប់​​លក្ខន្តិក​​ដែល​មានផ្តល់ជូន)​ ការដាក់បញ្ចូលសិស្ស​នៅក្នុង​ថ្នាក់ធម្មតាតាម​សាលារៀនសាធារណៈ គឺ​មាន​​​ការពេញ​​និយមច្រើន​​​ជាងការដាក់​បញ្ចូលសិស្សនៅក្នុងថ្នាក់ពិសេសតាម​សាលារៀនសាធារណៈ​។” [P.A.R.C. v. Pennsylvania, 334 F.Supp.  1257 (E.D. PA 1972).]

តុលាការបានអនុម័ត​ "ការសន្មតជាមុនថា (ក្នុងចំណោមកម្មវិធីការអប់រំជំនួស​) ការ​ដាក់​បញ្ចូល​ទៅក្នុង​ថ្នាក់​ធម្មតានៃសាលារៀន​សាធារណៈ​ដែលមាន​សេវាកម្ម​ជំនួយបន្ថែមសមស្រប គឺមានការពេញ​និយម​ច្រើន​ជាង​ការដាក់បញ្ចូលសិស្ស​នៅ​ក្នុង​ថ្នាក់ពិសេសតាមសាលារៀន​។” [Mills v. Board of Education of District of Columbia, 348 F.Supp. 866 (D. DC 1972).]

តុលាការកំពូ​លសហរដ្ឋអាមេរិក បានលើកឡើងថា៖  ច្បាប់​តម្រូវឲ្យរដ្ឋពាក់ព័ន្ធ​នានា​ ត្រូវ​ធ្វើការ​អប់រំកុមារពិការរួមគ្នា​ជាមួយកុមារដែលមិនមាន​ពិការ​ភាព​ ក្នុង​ករណីអាចធ្វើបាន​។ [Board of Education v. Rowley, (1982) 458 U.S. 176.]

នៅក្នុងរដ្ឋកាលីហ្វ័រញ៉ា តុលាការឧទ្ធរណ៍សហព័ន្ធបានលើកឡើងថា "ការច​ង់​​បាន​របស់​សភា​សម្រាប់​ការអប់រំ​កុមារ​ពិការនៅក្នុងថា្នក់រៀន​ជាមួយមិត្តរួមថ្នាក់​របស់ពួកគេ ត្រូវបានធ្វើឡើងយ៉ាងច្បាស់លាស់... [Dept. of Educ., State of Hawaii v. Katherine D., 727 F.2d 809 (9th Cir. 1983)។

តុលាការឧទ្ធរណ៍សហព័ន្ធមួយទៀត បានរកឃើញថាការបដិសេធការ​ចូលទៅ​សិក្សា​​ក្នុង​ថ្នាក់តាម​សាលា​រៀន​សាធារណៈ​ធម្ម​តា ដោយផ្តល់​ហេតុផលបញ្ជាក់​ទៅ​លើ​​​​ការអប់រំសមស្រប​ បង្កើតបាន​ជា​ការ​ការ​រើស​អើង​។ [Tokarcik v. Forest Hills School District, 655 F.2d 443 (3rd Cir. 1981).]

ម្យ៉ាងវិញទៀត ច្បាប់អប់រំពិសេសរបស់សហព័ន្ធ​ "តម្រូវឲ្យប្រព័ន្ធសាលារៀនផ្ដ​ល់​ជំនួយ និងរៀបចំ​ធនធាន​របស់​ពួកគេសាឡើងវិញដើម្បីចេញ​ឲ្យផុត​ពីប្រព័ន្ធ រចនាសម្ព័ន្ធ និងការអនុវត្តទាំងឡាយណា​ ដែលអាច​នឹង​នាំមកនូវ​ការ​ធ្វើ​វិយោគ​ក​ម្ម (ការដាក់នៅដាច់ដោយឡែក​​) មិនចាំបាច់​សម្រាប់​​កុមារ​ដែ​ល​មា​នពិការភាព"។ [Oberti v. Board of Education of the Borough of Clementon School District, 789 F. Supp. 1322 (D.N.J. 1981).]

តុលាការ រួមទាំងតុលាការសហព័ន្ធនៅក្នុង​រដ្ឋកាលីហ្វ័រញ៉ាផងដែរ​ បានលើកឡើ​ង​ថា​បន្ទុកនោះ ​គឺ​ស្ថិត​នៅ​លើ​មណ្ឌល​​សិក្សា​​ធិការនៅ​ក្នុងការ​បញ្ជាក់ថា​សិស្សមិន​អាច​ទទួល​ការអប់រំ​បាន​ជោគជ័យ​នៅក្នុងថ្នាក់​រៀន​ធម្មតា​ទេ។ សូមមើលសេច​ក្តី​សម្រេចដែលមានចែងខាងក្រោម៖

មណ្ឌលសិក្សាធិការ មិនបានផ្ដល់​ហេតុផល​ទៅ​លើ​​សេចក្ដី​សម្រេចរបស់ខ្លួន​​ដើ​ម្បី​​ដក​សិស្ស​ចេញ​ពីថ្នាក់​រៀន​ធម្មតា​​ណាមួយ​ តាម​ការចង់បាន​របស់តុលាការ​ពិនិត្យ​​សំណុំរឿននេះឡើយ​​។ [Mavis v. Sobol, 839 F.Supp. 968 (N.D.N.Y. 1981).]

ការសន្មតយ៉ាង​មុត​មាំរបស់ច្បាប់​​ក្នុងការ​​គាំ​ទ្រដល់​ការបញ្ជ្រាប​នេះ​...អាចនឹង​ទទួ​ល​បាន​​លទ្ធផល​ផ្ទុយ​​​ពីការ​សន្មត​នេះ​​ ​​ប្រសិនបើ​ឪពុក​ម្តាយ​ចាំបាច់​ត្រូវបង្ហាញ   ភស្តុ​តា​ង​ថាកូន​របស់ពួកគេសម​នឹង​ត្រូវបាន​រាប់​បញ្ចូល​ក្នុង​ការសិក្សា​ ជាជាងឲ្យ​មណ្ឌលសិក្សា​ធិការ​ត្រូវ​ផ្តល់​ហេតុ​ផល​លើ​ការសម្រេចចិត្ត​ក្នុងការ​ដកកុមារនោះ​ចេញ​​ពី​ថ្នាក់រៀនធម្មតា។ [Oberti v. Board of Education, 995 F.2d 1204 (3rd Cir. 1981).] ការសន្មតរបស់ច្បាប់​ក្នុងការគាំទ្រ​ដល់​ការបញ្ជ្រាបនេះ​​ ត្រូវបានចាត់ទុក​ថា​ជា​ការ​ដាក់​បន្ទុក​លើ​មណ្ឌល​សិក្សា​ធិការនៅ​ក្នុងការ​បង្ហាញថាកុមារម្នាក់ ​មិនអាចទទួល​បានការ​បញ្ជ្រាបនោះទេ​។  [Sacramento City Unified School District v. Rachel Holland, 786 F.Supp. 874 (E.D. Cal. 1992).]

(7.4) តើកត្តាអ្វីខ្លះដែលអាចមានសារៈសំខាន់ក្នុងការកំណត់ថាតើកូន រប​ស់ខ្ញុំទទួលបាន​​ការអប់រំ​ ក្នុង​កម្រិត​អតិបរមា​សមស្រប ជាមួយ​មិត្ត​រួម​​ថ្នាក់​ដែលមិនមាន​ពិការភាពរបស់គាត់ដែឬអត់​​​?

ក្នុងសំណុំរឿង​របស់ Sacramento City Unified School District v. Rachel Hollan​d តុលាការបាន​កំណត់​នូវ​កត្តាជាច្រើន​ដែលមានសារៈ​សំខាន់ក្នុង​ការ​វិភាគថាតើការណែនាំ​លើ​ការដាក់​បញ្ចូល​របស់​មណ្ឌលសិក្សា​ធិការ ​គោរពតាម​បទប្បញ្ញត្តិមជ្ឈដ្ឋានដែលមានការរឹតបន្តឹង​តិចតួចដែរ​ឬអត់​។ កត្តាទាំងនេះ រួម​មាន​៖

1. អត្ថប្រយោជន៍អប់រំដែល​មាន​ផ្តល់ជូន​ដល់​សិស្សដែលមានពិការភា​ព​នៅក្នុងថ្នាក់រៀនធម្មតា បូករួម​ទាំង​​​ជំនួយនិងសេវាកម្មសមស្រប ធៀប​ទៅ​​នឹ​ងអត្ថ​ប្រយោជន៍នៃថ្នាក់​​អប់រំ​ពិសេស​។
2. អត្ថប្រយោជន៍ក្រៅពីការសិក្សានៃ​​ទំនាក់ទំនង​ជាមួយនឹងកុមារ​ដែល​មិនមាន​ពិការភាព​។
3. ផល​​ប៉ះពាល់​ទៅលើគ្រូបង្រៀន និងសិស្សដទៃ​ទៀតនៅក្នុង​ថា្នក់​រៀ​​ន ដោយសារ​តែ​វត្តមាន​របស់​សិស្សដែល​មាន​ពិការភាព មាន​ជាប់​ពាក់​ព័ន្ធ​ទៅ​នឹង​​​អាកប្បកិរិយា​ការ​រំខាន និង/ឬការចំណាយ​​ពេលវេលា​​​​របស់គ្រូ​ច្រើន​ពេក​។
4. ការចំណាយ​លើការបញ្ជ្រាបសិស្ស​ដែលមានពិការភាព​ទៅក្នុង​ថ្នាក់​អប់រំ​ធម្មតា ធៀបទៅ​នឹង​ការចំណាយ​​ក្នុងការដាក់បញ្ចូល​សិស្សនៅក្នុង​ថ្នាក់​អប់រំពិសេស។

គ្មានកត្តាតែមួយគត់ណាមួយ អាចកំណត់ថាតើមណ្ឌលសិក្សាធិការបា​នគោរព​តាម​​ការ​កំណត់​​នៃ​មជ្ឈដ្ឋាន​ LRE​ ដែរឬអត់នោះទេ​​។ ឧទាហរណ៍ ទោះបីជាសិ​ស្ស​​អាចមានការរីកចម្រើនទៅតាម​​គោលដៅនៃ​កម្មវិធី IEP នៅ​​ក្នុង​ថា្នក់​រៀន​ពិសេស​ក៏ដោយ ប៉ុន្តែ​ក្រុមការងារ​កម្មវិធី IEP គួរ​ពិចារណា​អំពី​កត្ដាទីពីរដែល​ពាក់ព័ន្ធ​​នឹង​​​អត្ថប្រយោជន៍​​ក្រៅពីការសិក្សា មុនពេលធ្វើការកំណត់​ទៅលើការដាក់បញ្ចូល​ក្នុង​ការសិក្សានោះ​​។ ដរាបណា​ការរីកចម្រើនបានប្រព្រឹត្ត​ទៅ​តាម​ការចង់បាន​ កត្តា​អត្ថប្រយោជន៍អប់រំរបស់ Holland នឹងត្រូវ​បាន​បំពេញ បើទោះបីជាការ​រីក​ចម្រើននោះ​មិនមានភាព​ខ្លាំង​ក្លាបំផុត​​ដែល​សិស្ស​អាចធ្វើបាន​​នៅក្នុង​មជ្ឈដ្ឋាន​ផ្សេងទៀតក៏ដោយ។

ប៉ុន្ដែ វាបញ្ជាក់យ៉ាងច្បាស់ពីការសម្រេចចិត្តរបស់តុលាការ ចាប់តាំង​ពីសំណុំ​រឿង​របស់​​ Holland មកម្លេះ​ ព្រោះថា​ប្រសិនបើសិស្សមិនអាចទទួលបាន​អត្ថ​ប្រយោ​ជ​ន៍​ពីការដាក់បញ្ចូលនៅក្នុងថា្នក់ ឬមជ្ឈដ្ឋាន​ធម្មតា​​​​ទេនោះ​ — ពោល​គឺ​គាត់មិនអាចរីកចម្រើនឆ្ពោះទៅដល់គោលដៅនៃកម្មវិធី IEP ទេ​ — ដូច្នេះ​ការ​ដាក់​​​បញ្ចូល​​​នៅ​ក្នុង​​ថា្នក់រៀនធម្មតា គឺមិនអាចប្រព្រឹត្ត​ទៅបាន​ទេ​។ [មើល Hartmann by Hartmann v. Loudoun County Bd. of Educ., 118 F.3d 996 (4th Cir. 1997); Poolaw v. Bishop, 67 F.3d 830 (9th Cir. 1995); County of San Die​go v. California Special Education Hearing Office, 93 F.3d 1458 (9th Cir. 198​1).] អត្ថប្រយោជន៍នៃការអប់រំមួយចំនួន​ ត្រូវតែកើត​មាន​។ ប៉ុន្ដែ នៅក្នុង​រដ្ឋកាលីហ្វ័រញ៉ា អត្ថប្រយោជន៍ដែលកើត​មាន​ឡើង​ដើម្បីឲ្យកម្មវិធី IEP និង​ការ​ដាក់​​បញ្ចូល​​ក្នុង​ការ​សិក្សា​មាន​ភាព​សមស្រប គឺមិនមានច្រើននោះទេ។ តុលាកា​រ​​នៅ​សំណុំរឿង​ Holland បានលើកឡើងថា៖ ការសន្មតទុកជាមុននៃ​ច្បាប់​ [IDE​A​] ក្នុងការគាំទ្រដល់​ការបញ្រ្ជាបនេះ​ តម្រូវឲ្យសិស្ស[ដែលមានពិការភាព] អាច​ទទួ​ល​​បានការអប់រំនៅក្នុងថា្នក់រៀនធម្មតា ប្រសិន​បើសិស្សអាច​ទទួល​បាន​ការ​អប់​រំ​តាមការចង់បាន​នៅ​ទីនោះ ទោះបីជាវាមិនមែនជាមជ្ឈ​ដ្ឋានសិក្សាដែល​ល្អ​បំផុ​តសម្រាប់កុមារ​ក៏ដោយ។ [786 F. Supp. at 879.] ម្យ៉ាងទៀត ការកំណត់​ថា​តើសិស្សម្នាក់​​នឹងមានការរីកចម្រើនឆ្ពោះ​​ទៅរកគោលដៅរបស់កម្មវិធី IEP ដែរ​ឬ​អត់ ត្រូវតែធ្វើឡើងនៅក្នុងបរិបទ​ដែល​ថាតើ​គាត់អាច​នឹង​មាន​ការ​រីក​ចម្រើនដែរ​ឬ​អត់​ ប្រសិនបើមានការផ្ដល់នូវជំនួយ និងសេវាកម្មបំពេញ​​បន្ថែម​ ដើម្បីគាំទ្រ​ដ​ល់​​សិស្ស​នៅ​ក្នុង​មជ្ឈដ្ឋាន​ធម្មតា​។ [20 U.S.C. Sec. 1412(a)(5)(A); 34 C.F.R. Sec. 300.114(a)(2); Cal. Ed. Code Sec. 56345(a)(4).]

(7.5) តើមណ្ឌលសិក្សាធិការត្រូវតែផ្ដល់នូវជំនួយ និងសេវាក​ម្មដើម្បី​ជួយ​ដល់ការរួមបញ្ចូលគ្នារបស់កូនខ្ញុំ​ដែរ​ឬ​ទេ​​? តើមានអ្វីកើត​ឡើង​ បើ​​មណ្ឌលសិក្សាធិការនិយាយថាការផ្ដល់នូវជំនួយ និងសេវាកម្ម​ទាំង​​នោះថ្លៃពេក?

មណ្ឌលសិក្សាធិការ ត្រូវតែផ្ដល់ជំនួយ និងសេវាកម្មបំពេញ​បន្ថែមដើម្បីបំពេញ​​តម្រូវ​ការ​សម្រាប់​ការ​អប់រំ​ពិសេស​របស់​សិស្សដែលមានពិកា​រភាពនៅក្នុង​មជ្ឈដ្ឋាន​រួមបញ្ចូលគ្នា។ តុលាការនៅក្នុងសំណុំរឿង​ Oberti v. Bd. of Educ. បាន​លើកឡើងថាមណ្ឌលសិក្សាធិការ ​ត្រូវចាត់វិធានការ​ពេញលេញ​ដើម្បី​បញ្ចូល​​​សិស្សដែលមានពិការភាពទៅក្នុងថ្នាក់រៀនធម្មតា ដោយមានជំនួយ និង​សេវាកម្ម​បំពេញ​​បន្ថែម​។ [789 F.Supp. at 1322.]

តាមយោបល់របស់តុលាការឧទ្ធរណ៍របស់​សហព័ន្ធមួយទៀត នៅក្នុងសំណុំ​រឿង​ Daniel R.R. v. El Paso Independent School District តុលាការបានបញ្ជាក់​ថា៖

ច្បាប់មិនអនុញ្ញាតឲ្យ​រដ្ឋបង្កើតនូវសកម្មភាពបន្ដិចបន្ដួចដើម្បី​ជួយសម្រួល​ដល់​សិ​ស្ស​ពិការនោះ​ទេ។ លក្ខខណ្ឌ​តម្រូវ​​​របស់ច្បាប់​​សម្រាប់​ការកែសម្រួល​ និងបំពេញ​បន្ថែម​ចំពោះការអប់រំធម្មតា​ គឺ​មានភាព​ទូលំទូលាយ​។ [874 F.2d at 1036 (5th Cir. 1981).] តាមយោបល់របស់តុលាការឧទ្ធរណ៍របស់​សហព័ន្ធមួយទៀត នៅ​ក្នុង​សំណុំ​រឿង Roncker v. Walter ​បាន​​លើកឡើង​នូវសេចក្តីបញ្ជាក់​ស្តីពី​បញ្ហា​មជ្ឈដ្ឋាន​ LRE ដូចខាងក្រោម៖

ក្នុង​ករណីដែល​កន្លែងដាច់ដោយឡែកត្រូវបានចាត់ទុកថាមានភាពល្អ​ប្រសើរ​បំផុត​​[សម្រាប់ការសិក្សារៀនសូត្រ​] តុលាការគប្បីកំណត់ថាតើសេវាកម្មដែលធ្វើ​ឲ្យ​ការដា​ក់បញ្ចូល​មានភាព​ល្អប្រសើរបំផុតនោះ​​ អាចត្រូវ​បាន​ផ្តល់ជូននៅក្នុង​មជ្ឈដ្ឋានមិន​ដាច់ដោយឡែកបាន​​ដែរឬអត់​។ ប្រសិនបើ​ពួកគេអាចធ្វើបាន នោះ​ការ​ដាក់បញ្ចូលនៅក្នុងសាលារៀន​ដាច់ដោយឡែក នឹងមិនសម​ស្រប​ទៅ​តាម​​[ច្បាប់]ទេ។

តុលាការក្នុងសំណុំរឿង​ Roncker ក៏កត់សម្គាល់ផងដែរថា៖

ការចំណាយ ​គឺជាកត្តាសមស្របមួយ​ដែលត្រូវពិចារណា ព្រោះការចំណាយច្រើ​ន​​​​​ពេកទៅលើកុមារ​ពិការម្នាក់ អាចធ្វើឲ្យកុមារ​ពិការដទៃទៀតខាតបង់​។ ប៉ុន្ដែ ការ​ចំណាយ គឺគ្មានការ​ការពារទេ ប្រសិនបើមណ្ឌលសិក្សាធិការ​មិនបានប្រើប្រាស់​​​ថវិការបស់ខ្លួនដើម្បី​ផ្តល់នូវ​ការ​ដាក់បញ្ចូល​ក្នុង​ការសិក្សា​ជំនួសតាមលំដាប់លំ​ដោ​យ​សមរម្យសម្រាប់កុមារពិការទេនោះ​។ ការ​ផ្តល់ជូនការដាក់បញ្ចូល​ទៅក្នុង​​ការសិក្សា​ផ្សេងជំនួស​នេះ​ ផ្តល់​​អត្ថប្រយោជន៍ដល់កុមារពិការគ្រប់​រូប​។

[700 F.2d at 1058 (6th Cir. 1981).]

ទោះបីជា​តុលាការក្នុងសំណុំរឿង​របស់​ Holland បានសម្រេចថាការចំណាយ គឺជាការពិចារណាលើ​ការ​កំណត់​​​ការដាក់បញ្ចូល​ក្នុងការសិក្សា​យ៉ាង​សមស្រប​សម្រាប់កុមារម្នាក់​ក៏ពិតមែន​ ប៉ុន្តែ​តុលាការ​បាន​រក​ឃើញ​​​ថាការផ្តល់ជំនួយ​ដល់​កា​របង្រៀនក្រៅម៉ោង និងការកែសម្រួល​កម្មវិធីសិក្សា នឹង​មិនចំណាយ​ច្រើន​ជាង​ការដាក់បញ្ចូល​ទៅក្នុង​ការអប់រំពិសេសនោះទេ។ [Holland, 14 F.3d at 140​2.] ថវិកា​​មិនគ្រប់គ្រាន់ មិនមែនជាហេតុផលសមស្រប​តាមផ្លូវ​ច្បាប់សម្រាប់ការ​បដិសេធ​មិន​ផ្តល់​សេវាកម្ម​ដែល​ចាំបាច់ទេ លើកលែងតែក្នុងករណីដែលកា​រ​ចំណាយនោះ​ អាច​ប៉ះពាល់​យ៉ាងខ្លាំង​ដល់​ការអប់រំ​របស់​សិស្ស​​ដទៃ​ទៀតនៅ​ក្នុង​មណ្ឌលសិក្សាធិការ។

(7.6) មណ្ឌលសិក្សាធិការ បានប្រាប់ខ្ញុំថាកូនរបស់ខ្ញុំនឹងមិនអាច​​ដាក់​ទៅ​ក្នុង​ការ​រួម​​បញ្ចូលនោះ​បាន​ទេ​​ ពីព្រោះ​គាត់មិន​អាច​ទទួល​​បាន​អត្ថ​ប្រ​យោជន៍​នៃការសិក្សាពីការបង្រៀនក្នុងថ្នាក់ធម្មតា។ តើវាជា​ការ​ពិតដែរឬទេ​​?

មិនពិតទេ។ តុលាការនៅក្នុង​សំណុំរឿង​របស់​ Holland បានកត់សម្គាល់ថាកា​រ​បញ្ជ្រាប​ តម្រូវឲ្យផ្តល់ការ​អប់រំ​ដល់​សិស្សដែលមានពិការភាព​នៅក្នុងថ្នាក់រៀន​ធម្មតា ប្រសិនបើគាត់​អាចទទួល​បាន​ការអប់រំដោយ​ជោគ​ជ័យ​​​​នៅទីនោះ។ តុលាការពិនិត្យ​មើលថាតើគោលដៅ និងវត្ថុ​បំណងកម្មវិធី IEP របស់សិស្ស​ អា​ច​នឹង​​ត្រូវបំពេញ​នៅ​ក្នុង​ថា្នក់​រៀននោះ​ ដោយ​មាន​ការកែសម្រួល​កម្មវិធី​សិក្សា​ខ្លះៗ ឬដោយផ្ដល់នូវជំនួយ និងសេវាកម្មបំពេញ​បន្ថែម​ដែរ​ឬ​អត់​។  មណ្ឌលសិក្សាធិការ​នៅក្នុង​សំណុំរឿង Holland អះអាងថាសិស្ស គួរតែបាន​​​រកឃើញថា មិន​មាន​ភា​ព​​​​សម​​ស្រប​សម្រាប់​ការដាក់បញ្ចូលក្នុងថ្នាក់ធម្មតានោះទេ​ ប្រសិនបើការដាក់​បញ្ចូ​លនោះ នឹង​តម្រូវ​ឲ្យមានការ​កែសម្រួល​ខ្លាំងទៅលើ​កម្មវិធី​សិក្សា​ធម្មតានោះ​។ តុលាការបានបដិសេធការលើកឡើង​​នេះ ហើយរកឃើញថា​សិស្ស​នៅក្នុង​អប់រំ​ពិសេស អាចនឹង​តម្រូវ​ឲ្យ​មាន​ការកែសម្រួល​​ និង​មាន​សិទ្ធិ​ទទួ​ល​បានកា​រ​កែ​ប្រែ​កម្មវិធីសិក្សាសំខាន់ៗ ដើម្បីជួយសម្រួល​ឲ្យ​ពួកគេ​ទទួល​បាន​​អត្ថ​ប្រយោជ​ន៍​ពី​ការ​ដាក់បញ្ចូលទៅក្នុងថ្នាក់ធម្មតា។ តុលាការបានបញ្ជាក់​ថា "ការកែ​ស​ម្រួល​កម្មវិធី​សិក្សាសម្រាប់កុមារពិការ ទោះបីជាមានការកែប្រែច្រើនយ៉ាង​ណា​ក្តី​​ ក៏​វា​​មិន​មាន​សារៈសំខាន់អ្វី​នោះដែរ​។ ច្បាប់​ IDEA នៅក្នុងលក្ខខណ្ឌ​ចែង​នៃ​ច្បា​ប់​​សម្រាប់​ដំណើ​រ​ការកម្មវិធី IEP បាន​ចាត់ទុ​ក​​ថា​កម្មវិធី​សិក្សា​​នេះ​ អាចនឹងត្រូវបា​ន​កែ​សម្រួ​ល ​ដើម្បីជួយសម្រួល​ដល់​តម្រូវការរបស់​កុមារពិការម្នាក់ៗ។" [Holland, 786 F. Supp. at 879-880.]

ការសម្រេចចិត្តមួយផ្សេងទៀត​របស់តុលាការឧទ្ធរណ៍​សហព័ន្ធ បានចែង​អំពី​ការ​ផ្ដល់យោបល់ទៅលើ "អត្ថប្រយោជន៍​​នៃការ​​សិក្សា” ដូចខាងក្រោម​៖

ច្បាប់​​[IDEA] មិនតម្រូវ​ឲ្យរដ្ឋ​ផ្ដល់បទពិសោធន៍​អប់រំ​ដល់​​កុមារ​ម្នាក់​ដែលមាន​ពិការ​ភាព ​ដូច​គ្នា​ទៅនឹង​ការផ្តល់​បទពិសោធន៍​​អប់រំជាទូទៅ​ដល់​កុមារដែល​មិន​មាន​ពិការភាពនោះទេ​... ផ្ទុយទៅវិញ រដ្ឋត្រូវតែដោះស្រាយ​បញ្ហា​តម្រូវការ​ពិសេ​ស​​​​រ​បស់កុមារដែលមានពិការភាព ដោយទទួលស្គាល់ថា​​កុមារអាច​​​នឹង​ទទួល​បា​ន​​អត្ថប្រយោជន៍ផ្សេងៗ​ពីការអប់រំក្នុងថា្នក់រៀនធម្មតា ខុសពី​សិស្សដទៃ​ទៀត... សរុបសេចក្ដីមក ការដែល​កុមារមានពិការភាព​ មាន​ការ​យល់ដឹង​ខុសគ្នាពី​ការ​អប់រំ​​នៅក្នុង​ថា្នក់​រៀន​ធម្មតា​​​របស់​គាត់​ គឺ​មិន​បញ្ជាក់ពីហេតុផលលើ​​ការដកចេញ​ពី​មជ្ឈដ្ឋាននោះទេ។ [Oberti v. Board of Education, 995 F.2d 1204 (3rd Cir. 1981).]

(7.7) តើមណ្ឌលសិក្សាធិការត្រូវតែពិចារណាអំពីការប្រើប្រាស់ជំនួយ និងសេវាកម្មបំពេញ​បន្ថែមនៅក្នុង​ថ្នាក់​អប់រំធម្មតាដែរឬទេ ដើម្បីអាច​កំ​ណត់ពីអាកប្បកិរិយារំខានរបស់កូនខ្ញុំ មុនពេលដែលដាក់គាត់​នៅ​ក្នុ​ងមជ្ឈដ្ឋាន​ដែល​មានការរឹតបន្តឹង​ខ្លាំង​ជាងនេះ?

បាទ/ចាស​។ មុនពេលកំណត់ថាសិស្ស​អប់រំពិសេសណាម្នាក់​ អាចនឹងបង្កការ​រំខាន​​រហូត​​ធ្វើ​ឲ្យការអប់រំរបស់​សិស្ស​ដទៃ​ចុះ​ខ្សោយនោះ មណ្ឌលសិក្សាធិការ​​ត្រូវ​តែពិចារណាទៅលើ​ជំនួយ និងសេវាកម្មបំពេញ​បន្ថែម​ផ្សេងៗ​ជា​ច្រើន​​​​ដែល​អាចផ្ដល់ឲ្យ​សិស្សនៅក្នុងមជ្ឈដ្ឋានអប់រំធម្មតាបាន​ ដើម្បីបំពេញ​តម្រូវការ​ពិសេ​ស​​របស់​គាត់​។ តុលាការនៅក្នុងសំណុំ​រឿង​ Sacramento City Unified School District v. Holland បានបញ្ជាក់​ថា៖

"នៅពេលដែលធ្វើការវាយតម្លៃលើ​បន្ទុកដែលអាចកើតមានតាមរយៈ​ការដាក់​បញ្ចូល​​កុមារពិការ​នៅក្នុង​ថ្នាក់អប់រំធម្មតា មណ្ឌលសិក្សាធិការត្រូវតែពិ​ចារណា​លើ​គ្រប់មធ្យោបាយដែលសមស្រប​ទាំង​អស់ ​ដើម្បី​កាត់​បន្ថយ​ការដាក់​សម្ពាធ​ទៅ​​លើ​​​គ្រូបង្រៀន៖ កុមារពិកា​រដែលគ្រាន់តែត្រូវការការយកចិ​ត្តទុកដាក់​បន្ថែមពី​គ្រូ​បង្រៀន​ច្រើនជាងកុមារដទៃទៀត ទំនង​ជាមិនមានការរំខានខ្លាំងរហូតដល់​ធ្វើ​ឲ្យប៉ះពាល់ដល់ការអប់រំរបស់កុមារដទៃទៀតឡើយ។ ក្នុងការថ្លឹងថ្លែងពីកត្តានេះ មណ្ឌលសិក្សាធិការ ត្រូវតែចងចាំពីកាតព្វកិច្ចរបស់ខ្លួនក្នុងការពិចារណាទៅ​លើ​ជំនួយ និងសេវាកម្មបំពេញ​បន្ថែម ដែលអាចបំពេញ​​តម្រូវការ​របស់​កុមារ​ពិការ​ដែលចង់បាន​ការយក​ចិត្ត​ទុក​​ដាក់បន្ថែម។ កត្តានេះ ធ្វើការ​​ថ្លឹងថ្លែងទៅលើ​ការ​ដាក់បញ្ចូល​​កុមារពិការនៅក្នុងការអប់រំធម្មតាលុះត្រា​តែបន្ទាប់ពីការ​អនុវត្ត​រាល់​វិធានការសមស្រប​ទាំងអស់ដើម្បីកាត់បន្ថយបន្ទុកដល់គ្រូបង្រៀនហើយ កុមារ​ដទៃ​ទៀតនៅក្នុងថ្នាក់ នឹង​នៅតែបន្ត​មិនទទួលបាន​​​ចំណែក​នៃ​ការយកចិត្តទុក​ដាក់​របស់​គ្រូបង្រៀន​ពួកគេ​។​ [786 F. Supp. 874 (E.D. Cal. 1992).]

ច្បាប់សហព័ន្ធ តម្រូវឲ្យក្រុមកម្មវិធី IEP ពិចារណាអំពីយុទ្ធសាស្ត្រ​អន្តរាគមន៍​អាកប្បកិរិយា​សម្រាប់​សិស្ស​មាន​ពិការភាពណាម្នាក់ ដែលអាកប្បកិរិយារបស់​ពួក​គេ​​អាចរា​រាំងការរៀនសូត្ររបស់គាត់ ឬរបស់​សិស្ស​ដទៃ​ទៀត​​។ [20 U.S.C. Sec. 1414(d)(3)(B)(i); 34 C.F.R. Sec. 300.324(a)(2)(i).]

(7.8) តើចំណុចអ្វីខ្លះ​​ដែលខ្ញុំអាចស្នើសុំ​ប្រភេទ​នៃ​​ការផ្ដល់ជំនួយ និង​សេវាកម្មបំពេញ​បន្ថែម ​​ដើម្បីជួយកូន​របស់ខ្ញុំ​នៅ​ក្នុងថ្នាក់រៀនធម្មតា?

ច្បាប់សហព័ន្ធ កំណត់​និយមន័យលើ​ជំនួយ និងសេវាកម្មបំពេញ​បន្ថែម​យ៉ាង​ទូលំ​ទូលាយថា​​ជា​៖​ "ជំនួយ សេវាកម្ម និងការគាំទ្រផ្សេងៗដែលត្រូ​វបានផ្ដល់​នៅក្នុងថ្នាក់អប់រំធម្មតា​ ឬមជ្ឈដ្ឋាន​ពាក់ព័ន្ធ​នឹង​ការអប់រំផ្សេងៗ ដើម្បីឲ្យ​កុមារ​ដែលមានពិការភាពទទួលបានការអប់រំជាមួយកុមារ​ដែល​មិនមាន​ពិការភាព​ ​នៅក្នុង​កម្រិតអតិបរមាយ៉ាង​សមស្រប...” [20 U.S.C. Sec. 1401(33); 34 C.F.R. Secs. 300.42 & 300.114.] ឧទាហរណ៍អំពី​ជំនួយ និងសេវាកម្មបំពេញ​បន្ថែ​​ម​ដែលអាចនឹងត្រូវប្រើប្រាស់ដើម្បីជួយសិស្សនៅក្នុង​ការ​អប់រំ​ពិសេស​នៅ​ក្នុ​​ង​ថ្នាក់រៀន​ធម្មតា រួមមានជាអាទិ៍​៖  មជ្ឈដ្ឋានសិក្សាក្នុង​រចនាសម្ព័ន្ធ ការនិយា​យ​​​សាចុះ​សាឡើង​ និង​ការសម្រួល​ពាក្យ​ពេចន៍​ក្នុង​ការ​​ណែនាំ​ទៅលើ​កិច្ច​ការលំហាត់​​នៅផ្ទះ ការបន្ថែម​ការបង្រៀន​ដោយមានការណែនាំ​ជារូបភាព​ ការ​ប្រើ​​ប្រាស់​បច្ចេក​ទេសគ្រប់គ្រងអាកប្បកិរិយា ការកែតម្រូវកាលវិភាគក្នុងថ្នាក់ ការកែ​សម្រួ​ល​​​ការប្រគល់តេស្ត​ ការ​ប្រើ​ឧបករណ៍ថតសំឡេង ការបង្រៀនដោយមាន​ជំនួយ​ពី​កុំព្យូទ័រ និង​ឧបករណ៍​ជំនួយ​សោតទស្សន៍​ផ្សេង​ទៀត សៀវភៅសិក្សា គោល​ឬ​សៀវភៅលំហាត់ដែលមាន​​កែសម្រួល​ ការ​កាត់បន្ថយចំនួនសិស្ស​ក្នុងថ្នាក់​​ ការ​ប្រើ​ប្រាស់ការបង្រៀនផ្ទាល់​មួយទល់នឹងមួយ គ្រូជំនួយ​ក្នុងថ្នាក់រៀន ​និង​ឧបករ​ណ៍​កាត់ត្រា​ ការចូលរួម​របស់ “អ្នកសម្របសម្រួលសេវាកម្ម” ដើម្បីត្រួតពិនិត្យការ​អនុវត្តកម្ម​វិធី​និង​សេវាកម្ម​ពិសេស ការកែសម្រួល​ពេលវេលានៃកម្មវិធីក្រៅ​ការ​សិក្សា (ដូចជា​បន្ទប់​ទទួលទានអាហារថ្ងៃត្រង់ ការឈប់សម្រាក និងការអប់រំ​កាយ)។

ឧទាហរណ៍ផ្សេងៗទៀត រួមមាន​៖ ការកែសម្រួល​ស្របតាម​កម្មវិធីសិក្សានៅក្នុង​ថា្នក់​ធម្មតា ការផ្ដល់ជំនួយ​គ្រូអប់រំ​ពិសេសចល័ត​​​ ការបង្ហាត់បង្រៀន​ពីការអប់រំ​ពិសេសសម្រាក់គ្រូបង្រៀនធម្មតា ការប្រើប្រាស់​ឧបករណ៍​​ជំនួយដោយ​កុំព្យូទ័រ និងការប្រើប្រាស់បន្ទប់ធនធាន។ [សំណួរ និងចម្លើយទៅលើលក្ខខណ្ឌតម្រូវ​របស់មជ្ឈដ្ឋានដែលមានការរឹតបន្តឹង​តិចតួចនៃ​ច្បាប់​ IDEA ក្រសួង​អប់រំ​សហរដ្ឋ​អាមេរិក ការិយាល័យអប់រំពិសេស និងសេវាកម្មការស្ដារនីតិសម្បទា OSEP-95-9, 11/23/94 សំណួរ និងចម្លើយលេខ 3 និង 4]

តុលាការឧ​ទ្ធរណ៍​សហព័ន្ធមួយ បានរៀបរាប់អំពីលក្ខខណ្ឌ​ស្ដីពីការផ្ដល់ជំនួយ និ​ង​​​សេ​វាកម្ម​បំពេញ​បន្ថែម​ដូចខាង​ក្រោម៖ “ច្បាប់​ IDEA មិនអនុញ្ញាត​ឲ្យរដ្ឋបង្កើ​ត​ត្រឹមតែ​សកម្មភាពបន្ដិចបន្ដួច ដើម្បីជួយ​សម្រួល​ដល់​សិស្សពិការ​នោះ​​ទេ​។ លក្ខខណ្ឌតម្រូវ​របស់ច្បាប់​សម្រាប់​ការកែសម្រួល​ និងការ​​បំពេញបន្ថែម​​ការ​អប់រំ​ធម្មតា​ គឺ​​មាន​លក្ខណៈ​ទូលំទូលាយ។” [Daniel R.R. v. El Paso Independent School District, 874 F.2d 1036 (5th Cir, 1989).] ប្រសិនបើកូនរបស់អ្នក ត្រូវការជំនួយនិងសេវាកម្មបំពេញ​បន្ថែម​ សេវាជំនួយ​​ ឬ​ការ​កែសម្រួល​នៅក្នុង​ថ្នាក់​រៀន​ធម្មតា ពេល​នោះ​អ្នកគួរ​ពិភាក្សាអំពីជំនួយគាំទ្រ​ទាំង​នេះ​ជាមួយក្រុមការងារ​កម្មវិធី IEP ដូចគ្នា​ទៅនឹង​​​សេវា​កម្ម ឬការដាក់​បញ្ចូល​ក្នុង​ការអប់រំដទៃទៀត​​ដែរ​។ តាមការ​ព្រមព្រៀងរបស់ក្រុមការងារ​ ត្រូវ​​បន្ថែមជំនួ​យ​គាំទ្រ​ការអប់រំទាំងនេះទៅក្នុងកម្មវិធី IEP របស់​កូនអ្នក។

(7.9) ប្រសិនបើកូនរបស់ខ្ញុំមិនត្រូវបានដាក់ក្នុងថ្នាក់រៀនធម្មតាទេ​នោះ​ តើមណ្ឌលសិក្សាធិការ​មាន​កាតព្វកិច្ច​ចំពោះ​មជ្ឈដ្ឋាន​ LRE ណាមួយ​ពាក់ព័ន្ធ​នឹងការអប់រំរបស់កូនខ្ញុំដែរឬទេ?

ទោះបីជាសិស្សមិនត្រូវបានដាក់ក្នុងថ្នាក់ធម្មតាក៏ដោយ ក៏​មណ្ឌលសិក្សាធិការ​ត្រូវ​តែមាន​វិធានការ​ដើម្បី​បង្កើន​​ឱកាសជាអតិបរមា​សម្រាប់ឲ្យ​គាត់​មាន​ទំនាក់​ទំនងជាមួយមិត្តរួមថ្នាក់​ដែលមិនមានពិការភាព ក្នុងកម្រិតមួយ​សមស្រប​ទៅ​នឹង​តម្រូវការរបស់គាត់។ នៅពេលដែលមណ្ឌលសិក្សាធិការស្នើ​សុំការ​ដាក់​បញ្ចូល​ផ្សេងក្រៅពីថ្នាក់រៀនធម្មតា មណ្ឌលសិក្សា​ធិការ​ត្រូវ​តែ​ផ្ដល់ការជូនដំណឺង​ជាលាយលក្ខណ៍អក្សរទៅដល់ឪពុកម្ដាយ ដោយធ្វើការ​​ពន្យល់បកស្រាយ​អំពី​​ជម្រើស​នៃ​ការ​ដាក់​បញ្ចូល​ដែល​បានពិចារណា និងហេតុផលសម្រាប់ការ​​បដិសេធ​ជម្រើសទាំងនោះ។ [34 C.F.R. Sec.300.503.] ក្រុមការងារ​កម្មវិធី IEP ត្រូវតែចងក្រង​ឯកសារ​បញ្ជាក់​ពី​ហេតុ​ផល​សមសម្រ​​ប​សម្រាប់​ការដាក់​បញ្ចូល​​នៅ​ក្នុង​ម​ជ្ឈដ្ឋានផ្សេងក្រៅពីសាលារៀន​ និងថ្នាក់រៀនរបស់សិស្ស ដែល​គាត់​នឹងចូលរៀន​នៅទីនោះ​ ​ប្រសិន​បើគាត់​មិន​​មាន​ពិការភាពណាមួយ​នោះទេ​​។ ការចងក្រង​ឯកសារ គប្បីបង្ហាញបន្ថែមពីមូលហេតុថាហេតុ​អ្វី​បាន​ជា​សិស្សមាន​ពិការភាព ត្រូវបាន​រារាំងមិន​ឲ្យ​​ទទួលបាន​​តម្រូវការរបស់គាត់នៅក្នុង​មជ្ឈដ្ឋាន​ដែ​ល​មានការរឹតបណ្ដឹងតិចតួច ទោះបីជាមានជំនួយ និង​សេវាកម្មបន្ថែមក៏ដោ​យ​​។ [5 C.C.R. Sec. 3042(b).]

(7.10) តើមានកត្តាណាខ្លះដែលមណ្ឌលសិក្សាធិការអាចនឹងមិនពិចារ​ណា​ក្នុងការកំណត់មជ្ឈដ្ឋាន​ LRE របស់​កូន​ខ្ញុំ?

មណ្ឌលសិក្សាធិការ មិនអាចធ្វើការសម្រេចចិត្តលើការដាក់បញ្ចូលដោយផ្អែ​កតែ​ទៅ​លើកត្តាដូចជា៖ ប្រភេទ​ចំណាត់ថ្នាក់​ពិការភាព ភាពធ្ងន់ធ្ងរនៃពិការភាពលក្ខ​​ណៈ​​​នៃ​​ប្រព័ន្ធផ្តល់សេវា​ លទ្ធភាព​​ផ្ដល់ជូនសេវា​អប់រំ ​ឬ​សេវាពាក់ព័ន្ធនានា​ លទ្ធភាព​ផ្ត​ល់​​​ជូន​ទី​កន្លែង​ ឬភាពងាយស្រួលផ្នែក​រដ្ឋបាល។

[71 Fed. Reg. 46540, 46588 (Aug. 14, 2006).]

(7.11) ប្រសិនបើកូនរបស់ខ្ញុំមិនអាចទទួលបានអត្ថប្រយោជន៍ពីកម្មវិធី​នៃការសិក្សាធម្មតានោះទេ​ តើគាត់អាច​ចូលរួមក្នុងកម្មវិធីដ​ទៃទៀត​របស់សាលាបាន​ដែរឬទេ?

បាទ/ចាស​។ ច្បាប់បានបញ្ជាក់ច្បាស់ថាសិស្សដែលមានពិការភាព មានសិទ្ធិ​ចូល​រួម​​ក្នុងសេវាកម្ម និងសកម្មភាពនៅក្នុង​កម្មវិធី​ក្រៅការសិក្សា និងកម្មវិធី​សិក្សាបន្ថែម ក្នុងកម្រិត​អតិបរមា​សមស្រប​តាម​​តម្រូវការ​របស់ពួកគេ។ លើស​ពី​​នេះទៀត មណ្ឌលសិក្សាធិការ ត្រូវតែផ្ដល់នូវសកម្មភាពទាំងនេះ​ ក្នុង​រូបភាព​មួយ​​ដែល​សិស្ស​​មាន​ពិការភាព ​អាចមានឱកាសស្មើភាពគ្នាក្នុងការចូលរួម។ សេវាកម្ម និងសកម្មភាពទាំងនេះ រួមមានអាហារ ការសម្រាក សេវាកម្ម​ពិគ្រោះ​យោបល់ អត្ដពលកម្ម មធ្យោបាយ​​ធ្វើដំណើរ សេវាសុខភាព សកម្មភាពកម្សាន្ត​ ក្រុមឬក្លឹបក្រុម​អ្នក​មាន​​ចំណាប់អារម្មណ៍​ពិសេស និង​ឱកាសការងារ។ [34 C.F.R. Secs. 300.117 & 300.107.] កម្មវិធី IEP នីមួយៗ ត្រូវតែរួម​បញ្ចូលនូ​វ​របាយការណ៍អប់រំពិសេស និងសេវាកម្មពាក់ព័ន្ធ​នានា​ ដែល​នឹង​ត្រូវ​​ផ្ដល់ជូន​សម្រាប់​សិស្សនៅក្នុង​ការរួមចំណែក ឬ​ការ​ចូលរួមក្នុងសកម្មភាពកម្មវិធីសក្សា​បន្ថែ​ម និង​សកម្មភាព​ក្រៅការសិក្សាដទៃទៀត។ [20 U.S.C. Sec.141​4(​d)​(1)​(A​)(i)(IV); 34 C.F.R. Sec. 300.320(a)(4)(ii).]

(7.12) នៅពេលដែលខ្ញុំបង្កើតនូវកម្មវិធី IEP​ របស់កូនខ្ញុំ តើខ្ញុំអាចរួម​បញ្ចូល​​សេវាកម្ម និង​ការ​ដាក់​បញ្ចូល​នៅក្នុង​មជ្ឈដ្ឋាន​ដែលមានការ​រឹតបណ្ដឹងតិចតួចបានយ៉ាង​ដូចម្តេច​?  តើក្រុមការងារ​កម្មវិធី IEP អាច​សរសេរចំណុចនេះ​យ៉ាង​​ជាក់លាក់បាន​​ដូចម្តេច​?

ច្បាប់សហព័ន្ធ តម្រូវឲ្យសិស្ស​អប់រំពិសេសចូលទៅ​​​ប្រើប្រាស់​ និងទទួល​បាន​អត្ថប្រយោជន៍​​​ពី​កម្មវិធី​​អប់​រំ​ទូទៅ​។ សមាសភាគ​សំខាន់ៗទាំងអស់នៃកម្មវិធី IE​P គួរ​ផ្ដោតសំខាន់ទៅលើការ​រួមបញ្ចូល​សិស្សអប់រំពិសេស​ទៅ​ក្នុង​កម្ម​វិធីសិ​ក្សាទូ​ទៅ​ សកម្មភាពកម្មវិធី​សិក្សាបន្ថែម/កម្មវិធីជំនួយ​ការសិក្សា​បន្ថែម​ និងការធ្វើតេស្ត​​បញ្ច​​ប់​​​ការ​សិក្សា ឬទំនាក់ទំនងសង្គមសមស្របនៅក្នុងមជ្ឈដ្ឋានអប់រំ​ទូទៅ៖

1. របាយកាណ៍ស្តីពី​កម្រិតសកម្មភាព​សិក្សារបស់សិស្សបច្ចុប្បន្ននៅ​ក្នុង​​កម្មវិធី IEP ត្រូវតែមាន​​រៀបរាប់អំពីលក្ខណៈ​ដែល​​ពិការភាព​របស់​គាត់ អាចជះឥទ្ធិពល​ដ​ល់ការចូលរួម និងវឌ្ឍនភាព​របស់គាត់​នៅ​ក្នុង​​កម្មវិធីសិក្សាទូទៅ (ពោលគឺ ដូចគ្នាទៅនឹង​កម្មវិធីសិក្សាសម្រាប់​កុមារ​ដែល​មិនមានពិការភាពដែរ​) និង​សមត្ថភាពរបស់គាត់ក្នុ​ងការចូលរួម​ក្នុង​សកម្មភាព​កម្មវិធី​សិក្សាបន្ថែម​ និង​សកម្មភាព​ក្រៅ​ការ​សិក្សា​ដទៃ​ទៀត។ [34 C.F.R. Sec. 300.320(a)(1).]
2. របាយការណ៍ស្តីពី​គោលដៅ និងចំណុចគោល​/វត្ថុ​បំណង (គោល​​ដៅ​) នៅក្នុងកម្មវិធី IEP ត្រូវតែ​មាន​ជាប់​ពាក់ព័ន្ធ​ទៅ​នឹងការ​បំពេ​ញ​តម្រូ​វការរបស់សិស្សដែលបណ្តាលមកពី​ពិការភាពរបស់គាត់ និង​ជំរុញ​​ឲ្យ​គាត់មានការ​​​ចូលរួម និងមានវឌ្ឍនភាព​នៅក្នុងកម្មវិធីសិក្សា​ទូទៅ​។  [34 C.F.R. Sec. 300.320(a)(2)(i)(A).]
3. ការអប់រំពិសេស និងសេវាកម្មពាក់ព័ន្ធ​ និងជំនួយនិងសេវាកម្ម​បន្ថែ​ម​នានាដែលមានចែងបញ្ជាក់​ក្នុង​កម្មវិធី IEP​ ត្រូវតែផ្ដល់ជូន​ដើ​ម្បីឲ្យ​សិស្ស​អាចមាន​ការ​ចូលរួម និង​មានវឌ្ឍនភាព​នៅក្នុង​កម្មវិធី​សិក្សា​​ទូទៅ និង​ចូល​រួមទៅ​ក្នុងសកម្មភាពកម្មវិធីសិក្សា​បន្ថែម​ និងសកម្ម​ភា​ព​ក្រៅការ​សិក្សា​ផ្សេងទៀត។ [34 C.F.R. Sec. 300.320(a)(4)(ii).]
4. កម្មវិធី IEP ត្រូវតែមាន​របាយការណ៍ស្តីពី​ការកែសម្រួល​ស្របតា​ម​បុគ្គល​​មួយចំនួន​ ដែល​ប្រើប្រាស់​ក្នុង​គ្រប់គ្រង​ការវាយតម្លៃរប​ស់​រដ្ឋ​​ ឬ​ក្នុង​​​មណ្ឌលសិក្សាធិការទាំងមូល ​ទៅលើ​លទ្ធផលសិក្សា​របស់​សិស្ស​។ [34 C.F.R. Sec. 300.320(a)(6)(i).]

គោលដៅដែលផ្អែកទៅលើកម្មវិធីសិក្សាទូទៅ មិនត្រូវការទាមទារឲ្យមានភាព​ចេះ​​ស្ទាត់​ជំនាញ​លើ​មុខវិជ្ជា ឬជាពិសេសមិនទាមទារឲ្យមាន​​ការ​​បញ្ចប់គ្រប់​កិច្ចការ ឬសកម្មភាពទាំងអស់​នោះទេ។ គោលដៅអាចចាំបាច់​ត្រូវ​ធ្វើ​ការសិក្សា​លើផ្នែក​ណាមួយ​ ឬបំណិន​ដំណាក់កាល​ដំបូងមួយចំនួន​ដែល​សិស្សមិន​មាន​ពិកា​រភាព​ អាច​នឹង​ត្រូវ​​បំពេញតែប៉ុណ្ណោះ។ កត្តាសំខាន់ក្នុងការវិភាគទៅលើ​ភាពសមស្របនៃការដាក់បញ្ចូលការសិក្សា​ណាមួយ​ អាចជា​កម្រិត​នៃ​ការ​ចូល​រួម​ក្នុងសកម្មភាពរបស់ថ្នាក់រៀនទាំងមូល​។ បន្ថែមពីលើនេះទៀត គោលដៅ​ដែលតម្រូវឲ្យមានសកម្មភាពរួមបញ្ចូលគ្នា គឺជាមធ្យោបាយ​មួយទៀត​ក្នុង​ការ​ធានា​លើ​ការរួមបញ្ចូលគ្នា។ គោលដៅអាច​មានដូចជា៖  “Sandra នឹងចូល​រួម​ក្នុងក្រុមកីឡាជាមួយមិត្តរួមថ្នាក់​ដែលមិនមានពិការភាព បីដងក្នុងមួយសប្ដាហ៍ រយៈពេល 45 នាទីនៅក្នុង​សកម្មភាពមួយ។” គោលដៅទាំងនេះ ធានាឲ្យ​កូនអ្ន​ក​មានទំនាក់ទំនង​ជា​មួយ​កុមារដែលមិនមានពិការភាព។

ការសិក្សាមិនមែនជាការវាស់វែងតែមួយគត់សម្រាប់អត្ថប្រយោជន៍នៃការអប់រំនោះទេ។ [Holland, 786 F. Supp. at 878.] កុមារដែលមានពិការភាព នឹងមាន​ករណី​​​ផ្តោតការយកចិត្ត​​សំខាន់ជាងនេះ​​សម្រាប់​មជ្ឈដ្ឋានរួមបញ្ចូលគ្នា ឬ​​ការដាក់​បញ្ចូល​នៅក្នុងថា្នក់រៀនធម្មតា ប្រសិនបើកម្មវិធី IEP របស់គាត់រួមបញ្ចូល​គោលដៅ និង​​ចំណុច​គោល​​​/វត្ថុ​បំណងដែលពាក់ព័ន្ធ​នឹងកម្មវិធីសិក្សា​ ត្រូវបានប្រើប្រាស់​នៅ​ក្នុងការ​ដាក់បញ្ចូល​ក្នុង​ការ​សិក្សា​​តាម​ការចង់បាន​។​

ករណីសំណុំរឿង​របស់ Holland ក៏បានសង្កត់ធ្ងន់ទៅលើសារៈសំខាន់នៃ​អត្ថ​ប្រយោ​ជន៍​​ក្រៅការសិក្សា ដែល​បាន​មកពីការដាក់បញ្ចូលសិស្សដែលមាន ពិការភា​ព​ទៅ​ក្នុងថ្នាក់រៀននៃការអប់រំធម្មតា។ ដោយសារតែសារៈសំខាន់​ដែល​តុលាការក្នុងសំណុំ​រឿង​របស់ Holland បានផ្ដល់​ទៅដល់​​អត្ថប្រយោជន៍​ក្រៅ​ការ​សិក្សា ដូច្នេះ​ កម្មវិធី IEP ក៏គួរ​តែ​រួម​បញ្ចូលនូវព័ត៌មាន និងគោលដៅ និងចំណុច​គោល​​​/វត្ថុ​បំណង ដែល​ពាក់​ព័ន្ធ​នឹងអត្ថប្រយោជន៍ក្រៅការសិក្សានៃការដាក់ការ​បញ្ចូលក្នុងការសិក្សា​រួម​គ្នាណាមួយ​ផងដែរ។ អត្ថប្រយោជន៍​សម្រាប់សិស្ស​ដែល​មានពិការភាពនេះ អាចរួមមានគំរូផ្នែក​ភាសា និងគំរូ​អាកប្បកិរិយា ការលើកម្ពស់​ការ​​ឲ្យតម្លៃលើខ្លួនឯង និងការ​បង្កើនការលើកទឹកចិត្តសម្រាប់​ការសិក្សា ឬការ​លើក​កម្ពស់​បំណិន​សង្គម។

ប្រសិនបើអាចធ្វើបាន​ អ្នកគួរ​ជួបជាមួយគ្រូបង្រៀនរបស់កូនអ្នក មុនការប្រជុំ​របស់​កម្មវិធី IEP ឬការ​ពិនិត្យ​ប្រចាំឆ្នាំ។ នៅ​ក្នុងកិច្ច​ការប្រជុំ​ អ្នកនិងគ្រូបង្រៀន អាច​បង្ហាញពីអាទិភាពនៃគោលដៅរបស់អ្នក ពិភាក្សាអំពី​ជម្រើស​​​​សម្រាប់ការ​រួម​បញ្ចូលគ្នា និង/ឬការបញ្ជ្រាប និងឈានទៅរកការឯកភាព​​មតិរួមគ្នា​ពាក់ព័ន្ធ​នឹង​អាទិ​ភាព​នៃការអប់រំ។ នេះ​អាចនឹង​ជួយអ្នកឲ្យ​លើកឡើងអំពីអាទិភាព​របស់អ្នក​​នៅក្នុ​​ងការប្រជុំរបស់កម្មវិធី IEP ដោយផ្ទាល់​ និង​ជា​​មធ្យោបាយ​វិជ្ជមាន​មួយ​ក្នុង​ការបង្កើតនូវគោលដៅនានា​។

ច្បាប់សហព័ន្ធ តម្រូវឲ្យគ្រូបង្រៀនផ្នែក​អប់រំធម្មតា ចូលរួមរាល់ការប្រជុំរបស់​កម្មវិធី IEP​ សម្រាប់​សិស្ស​ណា​ម្នាក់ដែលចូលរួម​ ឬអាចនឹងចូល​រួមក្នុង​មជ្ឈដ្ឋាន​អប់រំធម្មតា។ [34 Sec. 300.321(a)(2).] អ្នកគប្បីជួបជាមួយគ្រូបង្រៀននេះ ក៏ដូច​ជាគ្រូ​អប់រំ​ពិសេសណាម្នាក់​ ដែលកូនរបស់អ្នកអាច​ទទួលបាន​ដើម្បី​ផ្តល់​ឲ្យអ្នក​នូវ​គំនិតយោបល់​ និងព័ត៌មានអំពីគោលដៅដែលអ្នកអាចស្នើសុំនៅក្នុងកិច្ច​ប្រជុំរប​ស់​​កម្មវិធី IEP។ លើស​ពីនេះទៀត អ្នកគប្បីសាក​សួរព័ត៌មានអំពី​សេវាកម្ម​ពិសេស ឬសេវាកម្មពាក់ព័ន្ធនានាដូច​ជា​សេវា​កម្ម​បន្ថែម សេវាកម្មផ្នែក​អាកប្ប​កិរិ​យា​ និងជំនួយពីបុគ្គលិកដែលកូនរបស់អ្នកអាចនឹងត្រូវការ។ កិច្ច​ប្រជុំនេះ ក៏ជា​មធ្យោ​បា​​យក្នុងការ​ផ្ដល់យោបល់ទៅគ្រូបង្រៀនផងដែរ ​ដើម្បី​ឲ្យពួកគេចាប់​ផ្ដើម​​ពិចារណា​​ទៅលើ​ការកែសម្រួល​កម្មវិធីសម្រាប់កូនរបស់អ្នក ឬការគាំទ្រនានា​ដែល​ពួកគេ​នឹង​ត្រូវការ​ដើម្បី​អប់រំ​កូនរបស់អ្នកឲ្យបានសមស្របផងដែរ។ [34 C.F.R. Sec. 300.320(a)(4).]

ច្បាប់រដ្ឋតម្រូវយ៉ាងជាក់លាក់ថាក្រុមរបស់កម្មវិធី IEP គប្បីចងក្រង​ឯកសារបញ្ជា​ក់​ពី​​ហេតុផល​សម្រាប់ដាក់បញ្ចូល​ទៅ​ក្នុង​ទីកន្លែងសិក្សាផ្សេងទៀត​ក្រៅពីសាលា​រៀ​ន និង​ថ្នាក់រៀនរបស់សិស្សដែល​សិស្ស​អាច​នឹងចូលរួម ប្រសិនបើសិស្ស​មិន​មាន​​ពិការភាពនោះទេ​។ សំណុំឯកសារនេះ គប្បីបង្ហាញថាហេតុ​អ្វី​បាន​ជា​ពិការភា​ពរបស់សិស្សរារាំងមិនឲ្យ​បំពេញ​បាននូវ​តម្រូវការ​របស់គាត់​នៅក្នុង​មជ្ឈដ្ឋាន​ដែលមានការរឹតបណ្ដឹងតិចតួច ទោះបីជាមានជំនួយ និង​សេវាកម្ម​បន្ថែម​​ក៏​ដោយ​នោះ​។ [5 C.C.R. Sec. 3042(b).]

លើស​ពីលើនេះទៀត ច្បាប់សហព័ន្ធនិងច្បាប់រដ្ឋ តម្រូវឲ្យកម្មវិធី IEP រួម​បញ្ចូល​នូវ​របាយការណ៍​ស្តីពី​កម្រិត​ដែល​សិស្សមិនអាចចូលរួមជាមួយកុមារដែលមិនមា​ន​ពិការភាព​នៅក្នុងថ្នាក់ធម្មតា និង​នៅក្នុង​សកម្មភាព​​កម្មវិធី​សិក្សាបន្ថែម​ និង​សកម្ម​ភាព​​ក្រៅការសិក្សាផ្សេង​ទៀត។ [20 U.S.C. Sec. 1414(d)(1)(A)(i)(V); 34 C.F.R. 300.320(a)(5).]

បន្ថែមពីលើនេះទៀត​ អ្នកអាចចងក្រង​ឯកសារ​ការចូលរួម​របស់កូនអ្នក​ជាមួយ​នឹង​មិត្ត​រួមថ្នាក់​ដែល​មិន​មាន​ពិការភាពរបស់គេ ដោយរៀបរាប់ពីថ្នាក់សិក្សា​ជាក់​លាក់ (ដូចជាការ​សិក្សាសង្គម ការសិក្សា​ភាសា តូរ្យ​តន្រ្ដី ទស្សន៍សិល្បៈ (សិល្បៈ​រូប​ភាព​)​ ឬវិទ្យាសាស្រ្ដកុំព្យូទ័រ) ឬសកម្មភាពជាក់លាក់ (ដូចជាការជួប​ប្រជុំ អាហារ​​ថ្ងៃត្រង់ ការសម្រាក និងពេលវេលាជាមួយមិត្តរួមថ្នាក់​ដែលមិនមាន​ពិការភា​ព) នៅក្នុងកម្មវិធី IEP។ វាក៏ជា​ការ​សមស្របផងដែរ​សម្រាប់កូន​របស់​អ្នកនៅក្នុង​ការ​ចូលរួមទៅ​ក្នុងប្រព័ន្ធ “មិត្តភក្តិ”។ មិត្តភក្តិ គឺជាមិត្តរួមថ្នាក់​ដែល​មិន​មានពិការភាព ដែលពួកគេ​ជួយដល់​កូនអ្នកនៅក្នុង ឬក្រៅបរិវេណ​ថ្នាក់​​រៀន​សម្រាប់​សកម្មភាពជាក់លាក់ណាមួយ។ គោលដៅរបស់ប្រព័ន្ធមិត្តភក្តិ គឺ​ការ​បង្កើន​ទំនាក់ទំនង និងមិត្ដភាព។ អ្នកក៏គប្បីចងក្រង​ឯកសារស្តីពី​ការគាំទ្រ​នេះ​ទៅ​ក្នុងកម្មវិធី IEP ដែរ។

ពាក់ព័ន្ធ​នឹង​ការរួមបញ្ចូលគ្នានេះ អ្នក​មានបំណង​ចង់​រួម​បញ្ចូល​ទំនាក់ទំនងជា​មួយ​មិត្តភក្តិ​នៅ​ក្នុង​ការ​អប់រំ​​ទូទៅ សម្រាប់​​ជា​ផ្នែកមួយនៃគោលដៅជាក់​លាក់​នានា​។ វាអាចជាសមាសភាគមួយនៃស្ថានភាព​ ឬមជ្ឈដ្ឋានដែលមានចែង​នៅ​ក្នុងគោលដៅនេះ​។ ឧទាហរណ៍៖

1. Ricardo នឹងប្រើប្រាស់សញ្ញា “សួស្ដី” ដើម្បីស្វាគមន៍​មិត្តភក្ដិ​ដែល​មិនមានពិការភាព​នៅពេល​អាហារ​ថ្ងៃត្រង់ និង​នៅកន្លែង​ក្មេងលេង​ជា​រៀងរាល់ថ្ងៃ។
2. Denise នឹងចូលរួមក្នុងការ​ល្បែងកម្សាន្ត​ដែលបានរៀបចំ​ជា​រចនា​សម្ព័​ន្ធ​ ជាមួយនឹង​ការបង្ហាត់បង្រៀន​ពី​មិត្តភក្តិ​ដែល​​​មិន​មាន​ពិការភាព មក​ពីថ្នាក់ដទៃផ្សេងទៀត​ ចំនួន​បីដងក្នុងមួយសប្ដាហ៍ ក្នុង​អំ​ឡុងពេល​នៃ​ការកម្សាន្ត​បន្ទាប់ពីអាហារថ្ងៃត្រង់ ឬ
3. Ying-Lee នឹង​ចាប់ផ្ដើមកម្មវិធីទទួល​ទាន​​ចំណី​អាហារ​​ខ្លួនឯង ដោយ​ដួស​​អាហារ​របស់​គាត់​នៅ​ពេលញាំ​អាហារថ្ងៃត្រង់ នៅចំពោះ​មុខមិត្ត​រួម​​ថ្នាក់​ដែលមិនមានពិការភាព។

ការរួមបញ្ចូលគ្នា អាចបង្កើត​ឡើង​ និងគប្បីត្រូវបានបង្កើតឡើង​ទៅជាគោលដៅ​ជំនា​ញឆ្លង​​​វិស័យ (ផ្នែក​​​ទំ​​​នាក់ទំនង ចល័តភាព សង្គម) និងវិស័យធំៗ​​ (ផ្នែក  ​វិ​ជ្ជា​ជី​វៈ ការកម្សាន្ត​ គេហកិច្ច​ សហគមន៍)។ ទំនាក់ទំនង​ជាមួយសិស្ស​ដែលមិន​មានពិការភាព និងសិស្សដែលមានពិការភាព​មិនសូវធ្ងន់ធ្ងរនៅក្នុង​សាលា​រៀន អាច​នឹងកើតមានក្នុងអំឡុងពេលមួយ​ចំនួន ​ដូចជាការ​បង្រៀនអំពី​ជំនាញ​សហគ​ម​​ន៍ ការរៀបចំអាហារ និង​ពេលញ៉ាំ​អាហារថ្ងៃត្រង់ ការបណ្ដុះបណ្ដាល​ជំនាញ​វិជ្ជាជីវៈ​។ល។

នៅក្នុងលក្ខខណ្ឌនៃការបញ្ជ្រាប​ ឬការធ្វើ​បរិយាបន​​ពេញលេញ សិស្សដែលអាច​ចូ​លរួមក្នុងកម្មវិធីធម្មតា ឬ​ថ្នាក់សិក្សា​ធម្មតា អាចតម្រូវឲ្យមានការជួយសម្រួល​ ការ​កែសម្រួល​ ជំនួយ និងសេវាកម្មបំពេញ​បន្ថែម នៅ​ក្នុងថ្នាក់​ដើម្បីសិក្សា​រៀន​សូត្រ។ ទាំងនេះ ត្រូវតែសរសេរជាលាយលក្ខណ៍អក្សរ​យ៉ាងជាក់លាក់​នៅក្នុង​កម្មវិធី IEP របស់កូនអ្នក។ [34 C.F.R. Sec. 300.320(a)(4).]

កម្មវិធី IEP​ គប្បីរៀបរាប់អំពីការដាក់បញ្ចូលឲ្យបានជាក់លាក់នៅក្នុងមជ្ឈដ្ឋាន​ LRE។ នេះ​អាចត្រូវបានសរសេរជាលាយលក្ខណ៍អក្សរ​នៅក្នុ​ងផ្នែកនៃការដាក់​បញ្ចូល​ក្នុងការសិក្សា​ នៅក្នុង​ផ្នែក​កំណត់​សម្គាល់ ឬនៅក្នុងសេចក្ដីបន្ថែមដែល​ភ្ជាប់មកជាមួយនឹង​កម្មវិធី IEP នេះ​។ ឧទាហរណ៍មួយ​ស្តីពី​របាយការណ៍នៃកា​រ​ដាក់បញ្ចូលក្នុងការសិក្សា​ រួមមាន​៖

1. ការដាក់បញ្ចូលនៅក្នុងថ្នាក់ពិសេសពេលថ្ងៃ​ (SDC) ទៅនឹងទីតាំង​​សាលារៀន​ធម្មតា​ដែល​សមស្រប​តាមអាយុ ដោយមាន​ឱកាសប្រចាំ​ថ្ងៃសម្រាប់ការរួមបញ្ចូលគ្នា និងការបញ្ជ្រាប។​
2. ការដាក់បញ្ចូលនៅក្នុងកម្មវិធីមត្តេយ្យសិក្សាគំរូដែលមានការ​បញ្ជ្រា​បពេញលេញ​ ដែលត្រូវបាន​បង្រៀន​ជា​ក្រុម​ដោយគ្រូបង្រៀន​ផ្នែក​អប់រំពិសេស និងផ្នែកអប់រំ​ធម្មតា។
3. ការដាក់បញ្ចូល​នៅក្នុងកម្មវិធីជំនាញធនធាន (RSP) ចំនួន​ 30% នៃ​ថ្ងៃ​សិក្សា​។ បញ្ជ្រាបសម្រាប់ការ​សិក្សាសង្គម គណិតវិទ្យា កុំព្យូរទ័រ និងថ្នាក់ក្រៅការសិក្សាទាំងអស់ ដោយ​រៀបចំកន្លែង​អង្គុយនៅជួរមុខ​ និងការប្រឡងផ្ទាល់មាត់នៅក្នុងថ្នាក់ទាំងអស់។
4. ការដាក់​បញ្ចូលនៅសាលា Rosa Parks Elementary School SDC ដោយមាន​ជំនួយ​ក្នុងការ​​បញ្ជ្រាប​​សម្រាប់​​ផ្នែក​ដូរ្យ​តន្ដ្រី សិល្បៈ ថ្នាក់រៀ​ន​ និងអាហារថ្ងៃត្រង់
5. ការដាក់បញ្ចូលនៅក្នុ​ង SDC នៅសាលា​ César Chávez High School ជាមួយនឹងកម្មវិធីរួមបញ្ចូលគ្នា និង​នៅតាមសហគមន៍ ដែល​មាន​ការកំណត់នៅក្នុងកម្មវិធី IEP ឬ
6. ការដាក់បញ្ចូល​នៅក្នុងបរិយាប​ន​ពេញលេញ​នៅក្នុង​ថ្នាក់ទីមួយ​សម្រាប់​​កា​រអប់រំ​ធម្មតា​​ ដោយមាន​ជំនួយ​នៃការបង្រៀនពេញម៉ោង។

មើលនៅផ្នែកឧបសម្ព័ន្ធ ឧបសម្ព័ន្ធ O សូចនាករនៃកម្មវិធីដែលបាន បរិយាបន​ពេញ​លេញ​សម្រាប់​សិស្ស​ដែល​មានពិការភាព សម្រាប់ការណែនាំបន្ថែម។

(7.13) តើសកម្មភាព និងកម្មវិធីសិក្សា​សម្រាប់​ថ្នាក់​​អប់រំទូទៅ​របស់កូន​ខ្ញុំ អាចត្រូវបាន​បង្កើត​ឡើង​ក្រុមការងារ​កម្មវិធី IEP ដោយរបៀបណា?

កម្មវិធី IEP របស់កូនអ្នក គប្បីរួមបញ្ចូលទៅក្នុងការបង្រៀន សកម្មភាព​ និង​កាលវិភាគ​​នៃ​ថ្នាក់រៀន​ដែល​គាត់ត្រូវបានដាក់បញ្ចូល​។ នេះមិនត្រឹមតែ​ជាអ្វី​ដែល​រដ្ឋតម្រូវប៉ុណ្ណោះទេ​ ប៉ុន្ដែវាមានសារៈសំខាន់សម្រាប់សិស្សក្នុងការ​ក្លាយ​ខ្លួន​ទៅ​ជា​សមាជិក​​​​​ដែលដាក់​បញ្ចូលនៅក្នុងថា្នក់ និងមិនត្រូវបានដាក់​ឲ្យ​នៅ​ដាច់​ដោយឡែក​តាមរយៈ​សម្ភារៈ​បរិក្ខារ​ ឬ សកម្មភាព​របស់​គាត់​ឡើយ​។

ឧទាហរណ៍ កូនរបស់អ្នក អាចនឹងមិនមានជំនាញក្នុងម៉ោង​សកម្មភាពសំណេរ​ ហើយ​មាន​គោលដៅ​កម្មវិធី IEP ដើម្បីដោះស្រាយ​ពីតម្រូវការនេះ។ ប្រសិនបើ​អ្នក​ដែលនៅក្នុងថ្នាក់ទាំងអស់ រក្សាទុក​ទិនានុប្បវត្ដិប្រចាំថ្ងៃសម្រាប់​ជា​ផ្នែកមួយ​នៃសកម្មភាព​សិក្សា​របស់ពួកគេ ពេលនោះ​កូនរបស់អ្នក អាចនឹង​ចូលរួម​តាម   រយៈ​​ការសរសរ​ដាន​ពាក្យ​ ឬការប្រើប្រាស់អក្សរដែលបានកាត់ចេញ។ ប្រសិន​បើសកម្មភា​ពនោះជាការសរសេររៀបរាប់វែង កូនរបស់អ្នក អាច​នឹងបំពេញ​នូវ​កិច្ចការ​ដោយ​ការ​សរសេរ​​តាមអាន​ទៅលើ​​​ចម្លើយទៅនឹង​សិស្សម្នាក់ទៀត​ដើម្បី​កត់​ត្រា ឬដោយប្រើនូវឧបករណ៍ថតសំឡេង។ កូនរបស់​អ្ន​ក ក៏អាចនឹងប្រើផ្ទាំ​ង​ឃីបត​កុំព្យូទ័រដើម្បីជាជំនួយក្នុងស្គាល់​ និងតម្រៀប​អក្សរ​តាម​​លំដាប់​ផង​ដែរ។ ធ្វើដូចនេះ​ គោលដៅរបស់កម្មវិធី IEP សម្រាប់បំណិន​ផ្នែក​ភាសាសរ​សេរនិង​និយាយ និងបំណិន​ចលករ​តូច​ អាច​ត្រូវ​បាន​ដោះស្រា​យ​​​នៅ​ក្នុងសកម្មភាព​ថ្នាក់​រៀនដូចគ្នា​។

សម្រាប់គណិតវិទ្យា កូនរបស់អ្នកអាចប្រើប្រាស់សម្ភារៈឧបទេស​សម្រាប់​សកម្ម​ភា​​ពរាប់ចំនួន​ និង​ការ​បូក​លេខ ជាជាងការគណនាលេខនៅលើក្រដាស។ មេរៀ​​ន​គណិតវិទ្យា អាចត្រូវបានកំណត់បញ្ហា​លំបាកដូចគ្នានេះ​នៅត្រឹមចំនួន​តិច​​តួច​ ឬ​កំណត់​បញ្ហា​លំបាក​​​ទាំង​អស់​​ឲ្យនៅត្រឹមកម្រិត​​តិចតួច​ជាងមុន​។ ប្រសិនបើសិ​ស្ស​​​ផ្សេងទៀត​ក្នុងថ្នាក់ កំពុងដោះស្រាយ​ប្រមាណវិធី​ចែកលេខ​វែង​​ដល់លេខ​​ 20 ​នៅលើ​ក្រដាស​មួយ​សន្លឹក​ ដូច្នេះ​គោលដៅគណិតវិទ្យារបស់កូនអ្នក អាចជាការ​រាប់លេខដល់លេខ​​ 20។ សិស្សដែលមានពិការភាព គប្បីប្រើប្រាស់​នូវ​សម្ភារៈ​ដូច​គ្នា ឬស្រដៀងគ្នា ទៅនឹងសម្ភារៈ​ដែល​ត្រូវ​បាន​ប្រើ​ប្រាស់​​ដោយសិស្សដ​ទៃ​ទៀ​តនៅក្នុងថ្នាក់ ដើម្បីធ្វើឲ្យមាន​អារម្មណ៍​ថា​ជាថ្នាក់​រៀន​មួយ​ដែល​មាន​សមាជិ​ក​​ពេញ​លេញ​។

កម្មវិធីប្រ​ភេ​ទនេះ​ តម្រូវឲ្យគ្រូបង្រៀនមានជំនាញ មាន​គំនិតច្នៃប្រឌិត និងចំណេះ​ដឹង​ទាំង​ចំ​ពោះ​កម្មវិធីសិក្សា និងចំពោះសិស្សដែលមានពិការភាព។​ ការសហកា​រ​គ្នារវាងបុគ្គលិកផ្នែក​អប់រំធម្មតា និងផ្នែកអប់រំ​ពិសេស មានសារៈសំខាន់ណាស់​ក្នុងការ​បណ្ដុះ​បណ្ដាល និងគាំទ្រដល់គ្រូបង្រៀននៅក្នុងថ្នាក់រៀន។ កម្មវិធីដែល​ជោគជ័យ ក៏អាចនឹងតម្រូវឲ្យមានការគាំទ្រពីអ្នកជំនាញផ្នែក​បរិយាបននេះ​ផង​ដែរ​​។

(7.14) តើកម្មវិធី IEP របស់កូនខ្ញុំ អាចពង្រីកសកម្មភាពនៃការរួមបញ្ចូល​គ្នា​នេះ​​ទៅ​ក្នុង​សហគមន៍​​​បានដែរ​ឬទេ?

បាទ/ចាស​។  ផ្នែក​ដ៏​សំខាន់មួយនៃការអប់រំសម្រាប់សិស្សដែលមានពិការភាព គឺជា​របៀប​ដែលត្រូវ​បំពេញ​មុខងារ​ឲ្យ​បាន​សមស្របនៅក្នុងសហគមន៍។ គោល​ដៅ​​របស់កម្មវិធី IEP គប្បីដោះស្រាយនូវការរួមបញ្ចូលគ្នានៅក្នុងមជ្ឈដ្ឋានពិភពជាក់ស្តែង​ ដែលពួក​គេ​​នឹងបំពេញមុខងារ​​ក្នុងនាម​ជា​មនុស្សពេញវ័យ។ ទាំងនេះរួម​មានមជ្ឈដ្ឋាន​កម្សាន្ត​ មជ្ឈដ្ឋាន​​សហគមន៍ និងមជ្ឈដ្ឋានមុខងារ​វិជ្ជាជីវៈ។ ជំនាញ​ដែលនឹង​ជួយ​សម្រួលដល់យល់ព្រមទទួលយក​របស់កូនអ្នក (ដូចជាជំនាញសង្គ​ម ឬ​ទំនាក់​ទំនង​​ជាដើម​​) គប្បីត្រូវបានបញ្ចូលទៅក្នុងគោលដៅនៃការអប់រំរបស់គាត់។ ប្រសិនបើកម្មវិធីប្រភេទនេះចាប់ផ្ដើមដំណើរការ​នៅអំឡុង​ឆ្នាំ​សិក្សា នោះ​ការរួ​ម​បញ្ចូល​គ្នាដោយ​ជោគជ័យ​ក្នុងនាម​ជា​មនុស្សពេញវ័យ គឺ​មានភាពងាយ​ស្រួល​ក្នុង​ការសម្រេចបាន​ជោគជ័យ​។

អ្នក ជាមួយនឹង​គ្រូ​បង្រៀនរបស់កូនអ្នក ដំបូងឡើយ​ចាំបាច់​ត្រូវ​ពិនិត្យ​មើល​សកម្ម​ភា​ព​នា​នា​ដែលអាច​មាន​នៅតាម​សហគមន៍​​ ដែលកូនរបស់អ្ន​កអាច​ចូ​ល​រួមបាន ឧទាហរណ៍ ក្លឹបកុមារា/កុមារី កន្លែង​ហាត់​ប្រាណ ថ្នាក់លំហាត់ប្រាណ ឧទ្យាន សួនកុមារ កម្មវិធី​តាម​សួនឧទ្យាន​និង​ការកម្សាន្ត​ បណ្ណាល័យ រោងកុន ភោជនីយដ្ឋាន និងមជ្ឈមណ្ឌល​លក់ទំនិញ។

ចំពោះគំនិតទាំងនេះ អ្នកអាចបង្ហាញអំពីជំនាញដែលកូនរបស់អ្នកចាំបាច់​ត្រូវ​សិក្សា​រៀនសូត្រ​ដើម្បី​ចូលរួម​នៅក្នុងសហគមន៍ និងកសាង​ជំនាញ​ទាំងនេះ​ទៅ​ក្នុងកម្មវិធី IEP​។ ឧទាហរណ៍៖

1. Suzanne នឹងរៀនស្វែង​យល់​ពីការដើរទិញគ្រឿងទេស​ដោយខ្លួន​ឯ​ង​ពី​ក្នុង​តារាងរូបភាព ជ្រើស​រើសមុខ​​​ទំនិញតាម​ធ្នើរដាក់អីវ៉ាន​ ប្រគល់លុ​យ និង​ទទួលយកលុយអាប់ ទៅតាម​ការ​វាស់ស្ទង់​ដោយ​ការអង្កេត​របស់​គ្រូ​បង្រៀន រយៈ​ពេល​បីដងក្នុងមួយសប្ដាហ៍។
2. តាមរយៈផ្ដល់កន្លែងធ្វើការនៅក្នុងសហគមន៍ ដូច្នេះ​ Stephen នឹង​ចេះ​​សម្អាត​ និងជូតតុ និង​បោស​សម្អាត​​កម្រាល​ទៅតាម​​កម្រិតស្តង់ដា​នៃ​​ការ​ប្រកួតប្រជែង ដូចដែលបាន​វាស់ស្ទង់​ដោយ​ការអង្កេត​របស់​គ្រូ​និង​និយោជក ក្នុងរយៈពេលមួយម៉ោង ពីរដងក្នុងមួយសប្ដាហ៍។​
3. ពេលនៅក្នុងភោជនីយដ្ឋាន Joseph នឹងកម្ម៉ង់អាហារ និងអរគុណ​ដល់​​អ្នករត់តុយ៉ាង​សមស្រប ក្នុង​កម្រិត​ 80% នៃ​ពេលវេលា​ ដូចដែល​បាន​​វាស់វែងដោយការអង្កេតរបស់គ្រូបង្រៀន។

ការបង្រៀនមិត្តរួមថ្នាក់​ ឬមិត្តភក្ដិដែលចូលរៀននៅសាលារបស់កូនអ្នក ក៏អាច​ជួយ​​លើ​ក​កម្ពស់​ដល់​ការ​រួមបញ្ចូល​នៅក្នុងសហគមន៍ផងដែរ។ ពួកគេអា​ចនឹង​ទទួល​បាន​ការជំរុញ​លើកទឹកចិត្ត៖

1. ទៅលេងផ្ទះរបស់អ្នក
2. អញ្ជើញ​កូនរបស់អ្នកទៅលេងផ្ទះរបស់ពួកគេ ឬ
3. ចូលរួមជាមួយកូនរបស់អ្នកនៅក្នុងសកម្មភាពតាម​សហ​គមន៍ ឬ អង្គការនានា​។

(7.15) តើនឹងមានអ្វីកើតឡើង បើការដាក់បញ្ចូលក្នុងការអប់រំតែ​មួយ​គត់​ដែល​សាលារៀនផ្តល់ជូន​ដល់កូន​របស់​ខ្ញុំ គឺ​ជាមជ្ឈ​ម​ណ្ឌ​ល​ពិសេ​ស​សម្រាប់សិស្សដែលមានពិការភាព ដែលដំណើរការដោយខោន​ធី​នោះ​​?

មណ្ឌលសិក្សាធិការ ត្រូវតែផ្ដល់ឲ្យនូវជម្រើសនៃការដាក់បញ្ចូល​ក្នុងការសិក្សា​ជំនួស​តាមលំដាប់​ថ្នាក់​ពេញលេញ​ ដើម្បី​ធានា​ថាសិស្សទទួល​បាននូវ​សេវាកម្ម​នៅក្នុងមជ្ឈដ្ឋានដែលមានការរឹតបន្តឹង​តិចតួច។ នេះ​រួមមានចំណុចមួយចំនួន​ដូច​ខាងក្រោម៖

1. ការដាក់បញ្ចូលនៅក្នុងថ្នាក់រៀន​ធម្មតា។
2. ថ្នាក់រៀន​​ធម្មតាដែលមាន​ធនធាន ឬសេវាកម្ម​បង្រៀនចល័ត​។
3. ថ្នាក់​រៀន​ធម្មតាដែលមាន​សេវាកម្មដែលពាក់ព័ន្ធនឹងការអប់រំពិ​សេ​ស​។​
4. ថ្នាក់រៀន​ពិសេស ឬសាលារៀនពិសេស (ជា​រឿយៗ ទីកន្លែង​ទាំង​ពី​​នេះ​ ​​មានរួមបញ្ចូល​នូវ​ការផ្តល់​សេវាកម្ម​​ពាក់ព័ន្ធនានា)។
5. សាលារៀនមិនមែន​សាធារណៈ
6. សាលារដ្ឋសម្រាប់សិស្សដែលមានពិការភាព​ “កម្រកើត​មាន​”។​ និង
7. ការបង្រៀននៅក្នុងមជ្ឈដ្ឋាន​ផ្សេង​ក្រៅពីថ្នាក់រៀន (ដូចជានៅផ្ទះ ឬ​មន្ទីរពេទ្យ)។

[34 C​.F.R. Secs. 300.115 & 300.39; Cal. Ed. Code Sec. 56361.]

គោលនយោបាយយូរអង្វែងរបស់សហព័ន្ធនិងរដ្ឋ បានហាមឃាត់​យ៉ាងជាក់​លា​ក់​មិន​ឲ្យមាន​ការ​ដាក់បញ្ចូល​សិស្ស​នៅក្នុងមជ្ឈដ្ឋាន​ដែលដាច់ដោយឡែកនៅក្នុង​មជ្ឈ​ដ្ឋាន​អប់រំទូទៅនោះទេ​ ប្រសិនបើការសម្រេច​ចិត្ត​លើ​ការដាក់បញ្ចូលនេះ ​ផ្អែក​លើ​មូលដ្ឋាន​នៃ​កត្តារដ្ឋបាល និងមិនផ្អែកលើ​មូលដ្ឋាន​តម្រូវការរបស់​សិស្ស​នោះ​ទេ​។ មណ្ឌលសិក្សាធិការ មិនអាចប្រើប្រាស់កង្វះខាត​នៃ​ការដាក់បញ្ចូល​ក្នុង​កន្លែង​សិក្សា​សមស្រប​ធ្វើជា​ហេតុ​ផល​ដោះសារ​សម្រាប់ការ​បដិសេធមិនផ្តល់ឲ្យ​សិស្ស​នូវ​ការ​អប់រំនៅ​ក្នុង​មជ្ឈដ្ឋាន​ដែល​មាន​ការរឹត​បន្តឹង​តិច​តួច​របស់ពួកគេ​នោះ​ទេ។ [34 C.F.R. Sec. 300.39; Federal Policy Letter on LRE, Education for the Handicapped Law Reporter (EHLR) page 211:384, March 21, 1986; CDE, Office of Special Education, Policy Statement on Least Restrictive Environment (October 10, 1986).]

(7.16) តើសិស្សដែលមិនមានពិការភាព អាចទទួល​បានអត្ថប្រយោជន៍​ពីសេវាកម្ម​ដែលផ្ដល់​ឲ្យ​សិស្ស​ដែល​មាន​ពិការភាព​នៅក្នុងថ្នាក់រៀន​ដែល​មានការអប់រំទូទៅដែរឬទេ?

បាទ/ចាស​។ ច្បាប់​ IDEA អនុញ្ញាតយ៉ាងជាក់លាក់ឲ្យប្រើប្រាស់ នូវមូលនិធិ​របស់​សហព័ន្ធ​នៃការអប់រំពិសេស​ដែល​ផ្ដល់​ឲ្យ​សាលារៀន​ “សម្រាប់ចំណាយ​លើ​ការ​អប់រំពិសេស និងសេវាកម្ម​ពាក់ព័ន្ធនានា និងជំនួយ​និង​សេវាកម្ម​បំពេញ​​បន្ថែម​ដែល​ផ្ដល់ជូន​នៅក្នុងថ្នាក់រៀ​ន​ធម្មតា ឬមជ្ឈដ្ឋានពាក់ព័ន្ធនឹងការអប់រំនានា ទៅ​ដល់​កុមារ​ដែល​មានពិការភាព ស្រប​តាមកម្មវិធី IEP របស់កុមារ ទោះបីជាកុមារ​ដែល​មិនមានពិការភាព​យ៉ាង​ហោចណាស់​ម្នាក់ ​ទទួលបានអត្ថប្រយោជន៍ពី  សេវាកម្មនេះក៏ដោយ។” [20 U.S.C. Sec. 1413(a)(4); 34 C.F.R. Sec. 30​0.​20​8​(a)(1).] នេះ​មានន័យថាមណ្ឌលសិក្សាធិការ មិនអាចបដិសេធការផ្ដល់នូវជំនួយ ឬ​សម្ភារៈផ្នែក​បង្រៀន ឬផ្នែក​អាកប្បកិរិយា ដោយសារតែ​ជំនួយឬឧបករ​ណ៍​នោះ ក៏​អាច​ផ្ដល់អត្ថប្រយោជន៍ ឬត្រូវបាន​ប្រើប្រាស់​ដោយ​សិស្ស​ដែលមិនមានពិការភា​ព​បាន​ផង​ដែរ។

(7.17) តើលក្ខណៈ​ ឬភាពធ្ងន់ធ្ងរនៃពិការភាពរបស់កូនខ្ញុំ​អាចត្រូវ​បា​ន​ប្រើ​ប្រាស់ដើម្បីបង្ហាញហេតុផល​ពីមជ្ឈដ្ឋាន​អប់រំដាច់​ដោយឡែក​បាន​ដែរ​ឬទេ?

សិស្ស​ដែលមានពិការភាពទាំងអស់ មានសិទ្ធិទទួលបាន​ការអប់រំនៅក្នុងមជ្ឈដ្ឋា​ន​ LRE ដោយពឹងផ្អែក​ទៅ​លើ​តម្រូវ​ការ​នៃ​កា​រ​អប់រំបុគ្គលរបស់ពួកគេ ជាជាងចំណា​ត់​ថ្នាក់​ដែល​រៀបរាប់ពីពិការភាពរបស់ពួកគេ។ ទោះបីជាកុមា​រគ្រាន់តែត្រូវ​បាន​គេ​ចាត់ទុកថាជាកុមារដែលមាន “ពិការភាពផ្នែកបញ្ញា” ឬ “វិបត្តិ​ផ្លូវចិត្ត​” ក៏ដោ​យ​ ប៉ុន្តែ​​មិនមាន​ន័យថា​ទំនាក់ទំនង​ជាមួយសិស្ស​ដែលមិនមាន​ពិការភាព អាចនឹង​មិនមាន​ភាព​សម​ស្របនោះទេ​។

តាមរយៈករណីសំណុំ​រឿង​របស់​ Holland មណ្ឌលសិក្សាធិការត្រូវតែ​អនុវត្ត​រាល់​វិធាន​ការ​​សមស្រប​ទាំងអស់ (រួម​​មានការផ្ដល់នូវជំនួយ និងសេវាកម្មបំពេញ​បន្ថែ​ម​) ដើម្បីកាត់បន្ថយ​បន្ទុក​របស់​គ្រូបង្រៀន​ផ្នែក​អប់រំ​ធម្មតា និងកុមារដទៃ​ទៀត​នៅ​ក្នុង​ថា្នក់នោះ​ មុនពេលដែលដកសិស្សដែលមានពិការភាព​ណាម្នាក់​ចេញ​ពី​ថ្នាក់​អប់រំធម្មតានោះ​។ ច្បាប់របស់សហព័ន្ធក្នុងពេលបច្ចុប្បន្ន តម្រូវឲ្យ កម្មវិធី IEP នីមួ​យៗមានរបាយការណ៍​ពីការកែសម្រួល​ ឬ ការ​គាំទ្រកម្មវិធី​ ដែលបុគ្គលិកសា​លា​រៀននឹងត្រូវការចាំបាច់​ដើម្បីឲ្យសិស្សអាចមានការ​ចូលរួម និងមាន​វឌ្ឈនភាព​​នៅ​ក្នុង​កម្មវិធីសិក្សាទូទៅ អាចចូលរួមក្នុងសកម្មភាពកម្មវិធីសិក្សាបន្ថែ​ម និងសកម្ម​ភា​ព​​​ក្រៅ​​ការ​សិក្សា​ដទៃទៀត និង​អាចទទួលបា​នការអប់​រំជាមួយសិស្ស​ដែលមិន​មាន​ពិការភាព។ [20 U.S.C. Sec. 1414​(d)(1)(A)(i)(IV); 34C.F.R. Sec. 300.​320​(a)​(4).] តុលាការនៅក្នុងសំណុំរឿង​ Holland បាននិយាយថា ការ​ដែលគ្រាន់តែតម្រូ​វ​​ឲ្យ​មាន​ ការយកចិត្ត​ទុកដាក់​បន្ថែម​ជាងកុមារភាគច្រើនប៉ុណ្ណោះ​ គឺមិនធ្វើឲ្យប៉ះពា​​ល់​​​ដល់ការអប់រំ​របស់​កុមារ​ដទៃ​ទៀត​ឡើយ។ [Holland, 786 F. Supp. at 87​9.]

ច្បាប់ទទួលស្គា​ល់ថាលក្ខណៈ​ ឬភាពធ្ងន់ធ្ងររបស់​សិស្សដែលមានពិការភាព អាច​នឹងបង្ហាញ​ពីការដក​សិស្ស​ចេ​ញ​ពីថ្នាក់រៀន​ធម្មតា ជា​ពិសេស​នៅពេលដែ​ល​សិស្សនោះបង្ក​ការ​រំខានដល់សិស្សដទៃទៀត។ ប៉ុន្ដែ ការដកចេញពីមជ្ឈដ្ឋានអប់​រំ​ធម្មតាទាំងស្រុង នឹងមិនត្រូវបានធានា​នោះទេ។ មណ្ឌល​សិក្សាធិការ គួរតែ​បន្តផ្តល់​ឱកាសសម្រាប់​ការទំនាក់ទំនងជាមួយមិត្តរួមថ្នាក់​ដែល​មិនមាន​ពិការភាព នៅក្នុ​ង​មជ្ឈដ្ឋាន​កម្មវិធី​សិក្សាបន្ថែម​ ឬមជ្ឈមដ្ឋាន​ក្រៅ​ការសិក្សាដទៃទៀត ប្រសិនបើ​សម​​ស្រប​។ [34 C.F.R. Sec. 300.117.]

(7.18) តើមជ្ឈដ្ឋាន ​“LRE” អនុវត្តចំពោះសិស្សដែលនៅក្នុងស្ថាប័ន សាធារណៈ កន្លែងស្នាក់នៅថែទាំ​ ឬការដាក់បញ្ចូលនៅសាលារៀន​មិន​មែន​សាធារណៈដែរឬទេ?

បាទ/ចាស​។ ទោះបីជាកុមារត្រូវការទទួលបាន​សេវាកម្មនៅមជ្ឈមណ្ឌលអភិវឌ្ឍ ឬ​មន្ទីរពេទ្យរដ្ឋ​ វេជ្ជសាស្ត្រ​ស្នាក់នៅថែទាំ​ ឬការដាក់បញ្ចូលនៅសាលារៀន​មិន​មែ​​ន​សាធារណៈ​ក៏ដោយ ប៉ុន្តែ​ឱកាស​សមស្រប​សម្រាប់​ការ​ចូលរួម​នៅ​ក្នុង​​កម្មវិធី និងសកម្មភាពអប់រំធម្មតា​ ចាំបាច់​ត្រូវតែបង្កើតឡើង​។ ជាថ្មីម្ដងទៀត ការកំណត់​នេះគឺ​ពឹងផ្អែកទៅលើតម្រូវការបុគ្គលរបស់សិស្ស ដូចដែលបាន​សរសេរ​ជា​លាយ​​លក្ខណ៍​​អក្ស​រនៅក្នុងកម្មវិធី IEP របស់គាត់។ [34 C.F.R. Sec. 300.118.] សាលា​​ឆាទ័រសាធារណៈ​ តម្រូវឲ្យ​ផ្តល់សេវា​ដល់សិស្សដែល​មានពិការភាព ដែ​ល​ពួកគេ​កំពុង​តែចូល​រៀន​ក្នុង​សាលាទាំងនោះ ក្នុងលក្ខណៈមួយ​ដូចគ្នា​ទៅ​នឹងអ្វី​ដែ​ល​សិស្ស​ទាំងនេះ​នឹង​ទទួលបាន​នៅក្នុង​សាលារៀន​សាធារណៈ​​​ដទៃ​ទៀតដែរ​។ [20 U.S.C. Sec. 1413(a)(4); 34 C.F.R. Sec. 300.209.]

(7.19) តើបុគ្គលិកផ្នែក​អប់រំធម្មតាមានកាតព្វកិច្ចអ្វីខ្លះ នៅក្នុង​​កា​​រផ្ដល់​ឲ្យ​​សិស្ស​នូវឱកាសក្នុងការរួមបញ្ចូលគ្នា ការធ្វើបរិយាបន​ពេញលេ​ញ និង​ការបញ្ជ្រាប?

ច្បាប់អប់រំពិសេស តម្រូវឲ្យកម្មវិធី IEP បញ្ជាក់ពីជំនួយ និងសេវាកម្មបន្ថែម​ដែល​ចាំ​បាច់ ដើម្បី​ធានា​ដល់ការ​​ចូលរួមរបស់សិស្សក្នុងកម្មវិធីអប់រំធម្មតា។ [20 U.S​.​C​.​ Se​c. 1414(d)(1)(A)(i)(IV).]

កម្មវិធី IEP អនុវត្តចំពោះសកម្មភាព​ថ្នាក់រៀន ឬ សកម្មភាពកម្មវិធី​សិក្សា​បន្ថែម​នានា​​ដែល​សិស្ស​អាច​នឹង​ចូលរួម។ [34 C.F.R. Secs. 300.117 & 300.32​0​(a)​(4)(ii).] ឧទាហរណ៍ វិទ្យាសាស្រ្ដ ភូមិវិទ្យា ការអប់រំកាយ សិល្បៈ តន្ដ្រី និងការ​អប់រំវិជ្ជាជីវៈ ផ្នែកទាំង​អស់នេះ​មាន​លក្ខណៈសម្បត្តិគ្រប់គ្រាន់​ទទួលបាន​ការ​ជួយ​សម្រួល​ដល់​កម្មវិធី IEP និងសេវាកម្ម​គាំទ្រ​ការអប់រំដទៃទៀត។  

កម្មវិធី IEP របស់សិស្សម្នាក់ៗ ត្រូវតែមានផ្តល់ជូន​ដល់​គ្រូទាំងអស់របស់គាត់ និង​បុគ្គលិកផ្សេង​ទៀត​ដែល​ទទួលខុសត្រូវចំពោះការអនុវត្តកម្មវិធី​ ហើយ​ពួក​គេ​ម្នាក់ៗ​ត្រូវតែ​ទទួល​បាន​ដំណឹងគ្រប់គ្រាន់​អំពី​ទំនួល​ខុស​ត្រូវ​ជាក់លាក់​របស់​ពួកគេ ទាក់ទងនឹងការអនុវត្តកម្មវិធី IEP និង​ការគាំទ្រ​ជាក់លាក់​ដែលត្រូវ​តែ​ផ្តល់​​ជូន​​ដល់​សិស្ស​។ [34 C.F.R. Sec. 300.323(d).]

បន្ថែមពី​លើ​នេះទៀត ក្រុមការងារ​កម្មវិធី IEP ត្រូវតែបញ្ចូល​គ្រូបង្រៀន​នៅក្នុង​ការ​​អប់រំ​ធម្មតា​យ៉ាង​តិច​ម្នាក់​សម្រាប់សិស្ស ប្រសិនបើសិស្សកំពុង​តែ​ចូលរួម​ ឬ​អាច​នឹងកំពុង​តែ​ចូលរួមនៅក្នុងការអប់រំទូទៅ។  [20 U.S.C. Sec. 1414(d)​(1)​(B)​(ii); 34 C.F.R. Sec. 300.321(a)(2).] គ្រូបង្រៀនផ្នែក​អប់រំធម្មតា ត្រូវតែ​ចូល​រួម​ក្នុងការអភិវឌ្ឍរបស់កម្មវិធី IEP នៅក្នុងកម្រិតមួយ​សមស្រប រួមមាន​ការ​កំណត់ពីការអន្តរាគមន៍​អាកប្បកិរិយាវិជ្ជមាននិង​យុទ្ធសាស្ត្រ​សមស្រប​ ជំនួយ​និង​​សេវាកម្ម​បំពេញ​បន្ថែម ការកែសម្រួល​កម្មវិធី និងការគាំទ្រ​សម្រាប់​បុគ្គលិក​សាលារៀននៅក្នុងការផ្ដល់ឲ្យនូវជំនួយ សេវាកម្ម និងការកែសម្រួល​ទាំងនេះ​។ [20 U.S.C. Sec. 1414(d)(3)(C); 34 C.F.R. Sec. 300.324(a)(3).] គ្រូបង្រៀន​​ផ្នែក​អប់រំធម្មតា ក៏ត្រូវតែចូលរួមក្នុងការពិនិត្យ និងការកែប្រែណាមួយ​របស់កម្មវិ​ធី IE​P ផងដែរ​។ [20 U.S.C. Sec. 1414(d)(4)(B).] ម៉្យាងវិញទៀត មណ្ឌលសិក្សា​ធិការ ត្រូវតែធ្វើជា​តំ​ណាងនៅក្នុង​កិច្ចប្រជុំកម្មវិធី IEP ​ដោយ​មន្ត្រីសាលារៀន​ដែ​ល​​​មាន​​ចំណេះដឹងលើ​កម្មវិធីសិក្សាទូទៅ និងអំពីធនធានមណ្ឌលសិក្សាធិកា​រដែល​មាន​ផ្តល់ជូន​។ [20 U.S.C. Sec. 1414(d)(1)(B)(iv); 34 C.F.R. Sec. 300.32​1​(a)(4).]

ដើម្បី​ធា​នានូវ​ការសហការរវាងកម្មវិធីអប់រំធម្មតានិងកម្មវិធី​អប់រំ​ពិសេស ដូច្នេះ​កា​រ​បណ្ដុះបណ្ដាល និង​ការគាំទ្រ​គ្រប់​គ្រាន់​ត្រូវតែមានសម្រាប់បុគ្គលិកផ្នែក​អប់រំ​ធម្មតា ពាក់ព័ន្ធនឹង​តម្រូវការរបស់កូនអ្នក។ អ្នកអាចជំរុញឲ្យ​គ្រូបង្រៀននៅក្នុង​ការ​អប់រំធម្មតារបស់កូនអ្នក ជួយធ្វើពង្រាង​កម្មវិធី IEP ដោយការ​បញ្ចេញមតិ​យោបល់​អំពីតម្រូវការរបស់គាត់​សម្រាប់ការ​កែសម្រួល​ និងសេវាការគាំទ្រនានា​។ លើសពីនេះ​ទៀត ជំនួយបច្ចេកទេស និងការបណ្ដុះបណ្ដាលនៅក្នុងការអនុវត្ត​លក្ខ​ខណ្ឌ​តម្រូវរបស់មជ្ឈដ្ឋាន​ LRE ក៏ដូចជាការត្រួតពិនិត្យ​ជាបន្ត​ ត្រូវតែមាន​ផ្តល់​ជូន​​ពីក្រសួងអប់រំរដ្ឋ (State Department of Education) ទៅដល់​មណ្ឌលសិក្សា​ធិ​ការក្នុងមូលដ្ឋាន​របស់អ្នក។ [34 C.F.R. Secs. 300.119 & 300.120.]

(7.20) តើមណ្ឌលសិក្សាធិការ គួរ​ផ្ដល់នូវការគាំទ្រ និងជំនួយទៅដល់​គ្រូបង្រៀនផ្នែក​អប់រំ​ទូទៅរបស់កូនខ្ញុំ​​ គ្រូ​បង្រៀនផ្នែក​អប់រំពិសេស ឬបុគ្គលិកដទៃទៀតដែលជួយកូនខ្ញុំដែរឬទេ?

នាយកដ្ឋាន​ CDE និងមណ្ឌលសិក្សាធិការតាមមូលដ្ឋាន​ មានទំនួលខុសត្រូវទូ​ទៅ​ដើម្បី​ធានា​ថា​ទាំង​បុគ្គលិក​ផ្នែក​អប់រំ​ធម្មតា និងផ្នែក​អប់រំ​ពិសេស ត្រូវតែត្រៀមខ្លួ​ន​ឲ្យបាន​​គ្រប់គ្រាន់​ដើម្បី​ផ្ដល់​​ការ​បង្រៀន​ទៅដល់​សិស្សដែលត្រូ​វការការ​អប់រំ​ពិសេស​។ ជាការពិតណាស់ ច្បាប់តម្រូវឲ្យកម្មវិធី IEP មាននូវរបាយការណ៍​ស្តីពី​ “ការ​គាំទ្រ​ដល់​បុគ្គលិក​​សាលារៀន”​​ ដើម្បី​​ជំរុញ​ឲ្យពួកគេផ្តល់ការ​អប់រំដល់​​សិស្ស​នៅក្នុងមជ្ឈដ្ឋានដែលមានការរឹតបណ្ដឹងតិចតួច។ របាយការណ៍នេះ គួរ​តែ​ផ្អែក​ទៅលើការគាំទ្រដែលត្រូវចាំបាច់​ដោយបុគ្គលិករបស់សាលារៀន ដើម្បី​អនុវត្ត​កម្មវិធី IEP របស់កូនអ្នក។ ឪពុកម្តាយ​ គប្បីត្រូវ​រួម​បញ្ចូលតម្រូវការសេវាកម្មនេះ សម្រាប់​​ជា​ផ្នែកមួយ​នៃការចូលរួមមតិយោបល់​ក្នុងនាម​ជា​​ឪពុកម្តាយ ទៅដល់​ក្រុម​ការងារ​កម្មវិធី IEP។ 

[34 C.F.R. Sec. 300.320(a)(4)(iii); Cal. Ed. Code Sec. 56345(a)(4)].

“ការគាំទ្រ” ទាំងនេះអាចរួម​បញ្ចូលទាំង​ការបណ្តុះ​បណ្តាល​​វិក្រិត្យការ​ដល់​គ្រូ​បង្រៀនផ្នែក​អប់រំទូទៅ ផ្នែក​អប់រំពិសេស និងបុគ្គលិកគាំទ្រផ្សេងទៀតដែលបម្រើ​សេវា​​ដល់សិស្សក្នុង​ការអប់រំពិសេស។ កម្មវិធីនេះ គប្បីរួម​បញ្ចូលនូវព័ត៌មា​ន​ទៅ​លើការអនុវត្តការអប់រំចុងក្រោយ ក៏ដូច​ជា​ការ​​បណ្ដុះ​បណ្ដាលរួមគ្នា​​​​សម្រាប់​បុគ្គលិ​​កសាលារៀន និងឪពុកម្ដាយផងដែរ​។ [Cal. Ed. Code Secs. 56001(o), 56240, 56241 & 56243.]

(7.21) តើមាន​អ្វីកើតឡើង បើគ្មានគ្រូបង្រៀនផ្នែក​អប់រំធម្មតាណាម្នាក់​ស្ម័គ្រចិត្ត ឬមានលទ្ធភាព​បង្រៀន​កូន​របស់ខ្ញុំបាននោះទេ​​?

កង្វះ​ខាតបុគ្គលិក ឬធនធានគ្រប់គ្រាន់ មិនធ្វើដោះ​បន្ទុក​មណ្ឌលសិក្សាធិការ​ឲ្យ​រួច​ផុត​ពីកាតព្វកិច្ច​របស់​ពួកគេនៅក្នុងការ​​អប់រំកុមារនៅក្នុងថា្នក់រៀនធម្មតា ស្រ​ប​ទៅ​តាម​ការសម្រេច​ចិត្តណាមួយ​របស់​ក្រុម​ការងារ​​​កម្មវិធី IEP​ របស់គាត់ ឬមន្ដ្រី​សវនាការ។ ការដាក់បញ្ចូល​សិស្សណាម្នាក់​នៅក្នុងថ្នាក់រៀន​ធម្មតាណាមួយ​ ផ្អែ​ក​តាម​​សមត្ថភាព​របស់​គ្រូ​បង្រៀន ​​ត្រូវ​បាន​​ទទួល​ការ​​អនុញ្ញាត​។ មណ្ឌល​សិក្សា​ធិកា​រ មានទំនួលខុសត្រូវ​ក្នុងការ​​ធានា​ឲ្យមាន​គ្រូបង្រៀនផ្នែក​អប់រំធម្មតា​គ្រប់​ចំនួន​ដែល​ពួក​គេ​មានលក្ខណៈសម្បត្តិគ្រប់គ្រាន់​ (ដោយមាន​ជំនួយ និងការគាំទ្រ​ចាំ​បាច់នានា​) ដើម្បីផ្ដល់​នូវសេវាកម្ម​ទៅដល់​សិស្សដែលមានពិការភាព នៅក្នុង​មជ្ឃដ្ឋាននៃការអប់រំធម្មតា។ មណ្ឌលសិក្សាធិការ “មិនត្រូវធ្វើសេចក្ដីសម្រេ​ច​លើ​ការ​ដាក់បញ្ចូលណាមួយ​ដោយផ្អែកទៅលើតម្រូវការ​[ផ្ទាល់ខ្លួន​]​ ឬ ធនធាននានា​ រួម​ទាំងការ​ពិចារណាលើ​ថវិកា និងសមត្ថភាពរបស់​ភ្នាក់ងារសាធារណៈនៅ​ក្នុង​ការ​​ទទួលយក​ឬ​ជ្រើសរើសបុគ្គលិកដែលមានលក្ខណៈសម្បត្តិគ្រប់គ្រា​ន់​មកបម្រើ​ការងារ​។ [71 Fed. Reg. 46540, 46587 (Aug. 14, 2006).

(7.22) ប្រសិនបើខ្ញុំគិតថាសិទ្ធិរបស់កូនខ្ញុំក្នុងការទទួលបានការអប់រំ​ក្នុង​​មជ្ឈដ្ឋានដែល​មានការរឹ​តបន្តឹង​តិចតួចរបស់កូនខ្ញុំត្រូវបានបដិសេធ តើខ្ញុំអាចនឹង​ត្រូវ​ធ្វើដូចម្ដេច?

ប្រសិនបើកម្មវិធី IEP របស់កូនអ្នក ស្នើសុំការដាក់បញ្ចូលក្នុងការសិក្សា​រួមបញ្ចូ​ល​គ្នា​ (ឬចំនួនសកម្មភាព​​សកម្មភាព​​រួមបញ្ចូលគ្នាជាក់លាក់​) ហើយមណ្ឌ​ល​សិក្សា​ធិការមិនអនុវត្តតាមកម្មវិធី IEP​ នោះទេ ដូច្នេះ​អ្នក​អាច​ដាក់ពាក្យបណ្តឹងសម្រា​ប់​ការ​អនុលោមតាមច្បាប់ទៅកាន់​នាយកដ្ឋាន​អប់រំ​ CDE។ ប្រសិនបើ​សាលារៀន​បដិសេធការដាក់បញ្ចូល​សេវាកម្ម ឬសកម្មភាព​រួមបញ្ចូលគ្នា​ដែល​អ្នកជឿថា​សម​ស្រប​នៅ​ក្នុងកម្មវិធី IEP អ្នកអាចស្នើសុំសវនាការសម្រាប់​កិច្ច​ដំណើរ​ត្រឹម​ត្រូវ​តាមច្បាប់​។ មើលជំពូក​ 6 ព័ត៌មាន​ស្តីពីនីតិវិធី​នៃ​កិច្ចដំណើរការសមស្រប​​​/ការអនុវត្តតាមច្បាប់។

(7.23) តើខ្ញុំអាចធានាថាមណ្ឌលសិក្សាធិការរបស់ខ្ញុំ​មានគំរូដ៏​មា​នប្រសិ​ទ្ធិ​​ភាព​នៃ​សេវាកម្មរួមបញ្ចូលគ្នា​សម្រាប់សិស្សដែល​មានពិការភាព​ទាំង​អស់​បាន​យ៉ាង​ដូចម្ដេច​?

អ្នកអាចអនុវត្ត​វិធាន​ការ​មួយចំនួន​។ ឧទាហរណ៍ អ្នកអាចទាក់ទង​គណៈកម្មា​ធិ​កា​រ​ប្រឹក្សាយោបល់របស់សហគមន៍ (Community Advisory Committee, CAC)។  គណៈកម្មាធិការដែលកំណត់ដោយរដ្ឋទាំងអស់នេះ ដែល​រួម​មានសមាស​ភាព​ឪពុកម្តាយ សមាជិក​សហគមន៍ បុគ្គលិកមណ្ឌលសិក្សាធិការ និងបុគ្គលិក​ភ្នាក់​ងារសាធារណៈ ត្រូវ​មានវត្តមាននៅគ្រប់ផ្នែក​ផែនការ​ SELPA ទាំងអស់​។ [Cal. Ed. Code Secs. 56190 - 56194.] សាកសួរទៅគណៈកម្មាធិការ​ CAC រប​ស់​អ្នកថាតើ​ផែនការអប់រំពិសេសតាមមូលដ្ឋាន​ ដោះស្រាយ​បញ្ហា​​ការ​រួមបញ្ចូ​ល​នេះ​​​យ៉ាង​ដូចម្តេច​ តើ​មាន​ជម្រើសអ្វីខ្លះ​ដែលមានផ្តល់ជូន​នា​ពេលបច្ចុប្បន្ន តើ​គណៈកម្មាធិការ​ CAC មានគម្រោងចូលរួម និង/ឬត្រួតពិនិត្យទៅលើ​ផែនការ​រួម​បញ្ចូលគ្នាយ៉ាង​ដូចម្តេច។ល។ គណៈកម្មាការ CAC អាចមាន​បំណង​ចង់​រៀប​ចំ​ការ​ធ្វើបទ​បង្ហាញ​ប្រកបដែលមាន​ព័ត៌មាន​ពេញលេញ​មក​ពី​​មណ្ឌល​សិក្សា​ធិការ​ជិត​ខាង ឪពុកម្ដាយ ឬក្រុមសាកលវិទ្យាល័យដែលចូលរួម​ជាមួយ​កម្មវិធី​រួម​បញ្ចូ​ល​​​គ្នាដូចគ្នា​នេះ​។ ពួកគេក៏អាចចង់រៀបចំ​កាលវិភាគប្រជុំ​ជាមួយ​រដ្ឋបាល​របស់​ពួក​គេ​​ពាក់ព័ន្ធ​ទៅនឹង​ការអភិវឌ្ឍផែនការ​តាមមូលដ្ឋាន​ផងដែរ។

មណ្ឌលសិក្សាធិការមួយចំនួន និងផ្នែក​ផែនការ​ SELPA មាន​ក្រុមការងារផ្នែក​រួ​ម​បញ្ចូលគ្នា (ដែល​រួម​មាន​សមាសភាព​​អាណាព្យាបាល សមាជិកគណៈកម្មាកា​រ​ CAC គ្រូបង្រៀន បុគ្គលិកសេវាកម្មពាក់ព័ន្ធនានា​ រដ្ឋបាលផ្នែក​អប់រំ​ធម្មតា​និង​ផ្នែក​អប់រំ​ពិសេស សមាជិក​នៅក្នុងសហគមន៍​ដែលមានឬគ្មាន​ពិការភាព​ដែល​ពួក​គេ​មានចំណាប់អារម្មណ៍​រួមគ្នា​ មជ្ឈមណ្ឌលក្នុងតំបន់ អ្នកតំណាង​ក្រុមតស៊ូ​ម​តិ ។ល។) ដែលពួកគេ​ទាំងអស់​​បាន​បង្កើត​កិច្ចខិតខំប្រឹងប្រែង​ធ្វើផែនការតាម​បែប​សហការ ក្នុង​​​​គោលដៅ​សម្រេចឲ្យ​បាន​ការ​បញ្ចូលគ្នា​ប្រកប​​ដោយ​ប្រសិទ្ធិ​ភា​ព​។ ឪពុក​ម្ដាយ និងគ្រូប​ង្រៀន ក៏អាចជួយដល់មណ្ឌលសិក្សាធិការ ក្នុងការ​វាយតម្លៃ​ពី​​ទីតាំង​សាលារៀន​ដ៏​មាន​សក្តានុពល​​សម្រាប់​ការរួមបញ្ចូល​គ្នានៅ​ពេល​អនា​គត​​ផងដែរ។ ជាចុងក្រោយ មណ្ឌលសិក្សាធិការ/ខោនធី​មួយចំនួន បានបង្កើតក្រុមប្រឹក្សា​គោលនយោបាយ​អប់រំ​ស្តីពី​ការ​រួមបញ្ចូលគ្នា ការធ្វើ​បរិយាប​ន​ពេញលេញ និងការបញ្ជ្រាប ទៅតាម​​សំណូមពររបស់​គណៈកម្មការ​ CA​C និង​/​ឬ​រដ្ឋបាលរប​ស់​សាលារៀនរបស់ពួកគេ​។ គោល​នយោបាយ​របស់​ក្រុមប្រឹក្សា អាចមានប្រសិទ្ធិភាពខ្ពស់ក្នុងការ​អភិវឌ្ឍដំណើរ​ការ​នៃ​ការ​រួម​បញ្ចូល​គ្នា​ណា​មួយ​​។

ការរួម​បញ្ចូលគ្នា តម្រូវឲ្យមាន​រចនាសម្ព័ន្ធ និងការធ្វើផែនការ​យ៉ាង​ប្រុងប្រយ័ត្ន​។ ក្រុម ឬ​ក្រុមការងារ​ធ្វើ​​ផែនការតាម​បែប​សហការ ដែល​ធ្វើជា​តំណាង​ឲ្យគ្រប់ភាគី​ដែលមានចំណាប់អារម្មណ៍​រួម​ទាំងអស់​​​ គឺ​មាន​សារៈ​សំខាន់ណាស់​។ ប្រសិន​បើ​មណ្ឌលសិក្សាធិការរបស់អ្នក មិនសហការក្នុងការអភិវឌុ្ឍសេវាកម្មរួមបញ្ចូលគ្នា ឬបដិសេធការ​សរសេរ​ជាលាយលក្ខណ៍អក្ស​នូវ​ពាក្យពេចន៍រៀបរាប់អំពី​ការ​រួម​បញ្ចូល​គ្នានេះ​ទៅក្នុងកម្មវិធី​ IEP របស់​កូន​អ្នកនោះទេ​ ដូច្នេះ អ្នកអាច​ប្រើប្រាស់​ពាក្យ​បណ្តឹងលើ​ការអនុវត្តវច្បាប់​ ឬនីតិវិធី​កិច្ចដំណើរការ​ត្រឹមត្រូវ​តាម​ច្បាប់ដែ​ល​មានចែង​ដោយ​ច្បាប់​រដ្ឋនិងសហព័ន្ធ។ មើលជំពូក​ 6 ព័ត៌មាន​ស្តីពីនីតិវិធី​នៃ​កិច្ច​ដំណើរការសមស្រប​​​/ការអនុវត្តតាមច្បាប់​​។

(7.24) តើនឹងមានអ្វីកើតឡើង បើមណ្ឌលសិក្សាធិការប្រាប់ខ្ញុំថា កូនរប​ស់​ខ្ញុំ​​អាចត្រឹម​តែទទួល​បាន​សេវាកម្ម​ពាក់ព័ន្ធ​តែប៉ុណ្ណោះ​ ប្រសិនបើគាត់​ចូល​សាលារៀននៅកន្លែងដាច់ដោយឡែកពីគេ?

មណ្ឌលសិក្សាធិការ មិនអាចប្រើប្រាស់ទីតាំង ឬលទ្ធភាព​ផ្តល់​សេវាកម្មពាក់ព័ន្ធ​នានា​ ដើម្បីផ្តល់ហេតុ​ផល​សម្រាប់​ការដាក់បញ្ចូលទៅក្នុងទី​កន្លែងមួយ​ដាច់ដោ​យ​ឡែកពីគេនោះ​បានទេ។ មណ្ឌលសិក្សាធិការ មានទំនួលខុសត្រូ​វក្នុងការ​ផ្ដល់​សេវាកម្មពាក់ព័ន្ធ​ចាំបាច់​ដែលសមស្រប​សម្រាប់​សិស្ស​ម្នាក់ៗ​​នៅក្នុងមជ្ឈដ្ឋាន​ដែល​មានការរឹតបន្តឹង​តិចតួច។ [34 C.F.R. Sec. 300.116.]

(7.25) តើវាអាចទៅរួចទេ សម្រាប់កូនរបស់ខ្ញុំដើម្បីនៅក្នុង “ថ្នាក់ធនធា​ន​” សម្រា​ប់​​​ថ្ងៃភាគច្រើន ហើយនៅតែចូលរួមក្នុងថ្នាក់ធម្មតាទៀត?

បាទ/ចាស​។ ជាមួយនឹងការអនុញ្ញាតពីក្រុមការងារ​កម្មវិធី IEP សិស្សអាច​ចុះ​ឈ្មោះ​នៅ​ក្នុងកម្មវិធីជំនាញធនធាន (RSP) សម្រាប់ថ្ងៃ​សិក្សា​ភាគច្រើន​។ ប្រសិនបើអ្នកជឿថាកូនរបស់អ្នកអាចទទួលបានអត្ថប្រយោជន៍ពីមជ្ឈដ្ឋានថ្នាក់រៀន​​ធម្មតា (ឬប្រសិនបើ​មាន​សេវាគ្រូ​ធនធានច្រើនជាង​ពាក់កណ្ដាល​នៃថ្ងៃ​សិក្សា​​) ពេលនោះ​អ្នក​គប្បី​ពិភាក្សា​អំពី​ជម្រើសនេះ​ជា​មួយ​នឹងក្រុមការងារ​កម្មវិ​ធី IEP ដូចគ្នា​ទៅនឹង​សេវាការអប់រំ ឬការដាក់បញ្ចូល​នៅ​ក្នុងការសិក្សាដទៃ​​ទៀត​ដែរ​​។  [Cal. Ed. Code Sec. 56362(e).]

(7.26) តើលក្ខខណ្ឌតម្រូវ​នៃ​មជ្ឈដ្ឋាន​ LRE អនុវត្តចំពោះកុមារដែល​គ្រប់​​​អាយុចូល​រៀន​មត្តេយ្យសិក្សាដែរឬទេ? ប្រសិនបើមណ្ឌ​លសិក្សាធិកា​រ​របស់ខ្ញុំមិនផ្តល់​សាលា​មត្តេយ្យសិក្សាដល់​កុមារ​ដែល​មិន​មាន​ពិការភា​ព​នោះទេ​ តើកូនរបស់ខ្ញុំអាចត្រូវបាន​រួមបញ្ចូល​ជាមួយ​កុមារដែល​មិន​មាន​ពិការភាពដ​ទៃ​ទៀត​ដែរឬទេ?

បាទ/ចាស​។ គ្រប់​បញ្ញត្តិ​នៃ​ច្បាប់អប់រំពិសេសរបស់សហព័ន្ធនិង​រដ្ឋទាំងអស់​ អនុ​វត្តចំ​ពោះសិស្ស​ដែល​មាន​អាយុ​ចាប់​ពីអាយុ​បី​ឆ្នាំឡើង​ទៅ​ ដែលរួមបញ្ចូល​នូ​វ​​សិស្ស​អប់រំ​ពិសេស​ដែល​គ្រប់​អាយុចូល​រៀនថ្នាក់​​មត្តេយ្យសិក្សា​ផងដែរ​។​ សិ​ស្ស​ថ្នាក់​​​មត្តេយ្យ ក៏មានលក្ខណៈសម្បត្តិគ្រប់គ្រាន់ទទួលបាន​ “ការដាក់បញ្ចូ​ល​ក្នុង​ការ​សិក្សាជំនួ​ស​តាម​លំដាប់​​លំដោយ​...ដើម្បីបំពេ​ញតាមតម្រូវ​ការរបស់កុមារ​ដែល​មានពិការភាព...” [34 C.F.R. Secs. 300.115(b) & 300.116.] ដូច្នេះ សិស្ស​​​ថ្នាក់​​មត្តេយ្យ អាចទទួលបានការបង្រៀននៅក្នុងថ្នាក់រៀន​ធម្មតា ថ្នាក់​រៀន​​​ពិសេស សាលារៀន​ពិសេស ការបង្រៀននៅ​ផ្ទះ និងការបង្រៀន​នៅក្នុង​មន្ទីរ​ពេទ្យ និងស្ថាប័ននានា​។ [34 C.F.R. Sec. 300.115(b).] តម្រូវការ​របស់​មជ្ឈដ្ឋាន​ LRE សម្រាប់សិស្សថ្នាក់មត្តេយ្យ​ អាចរួមបញ្ចូល​នូវ​ការដាក់បញ្ចូល​ទៅ​​ក្នុងកម្មវិធី​សិក្សា​​​ថ្នាក់ដំបូង​ (Head Start) ឬ​ការដាក់បញ្ចូល​នៅថ្នាក់មត្តេយ្យ​សិក្សាឯកជន។

ប្រសិនបើមណ្ឌលសិក្សាធិការដំណើរការកម្មវិធីការអប់រំថ្នាក់​មត្តេយ្យសិក្សាទូ​ទៅ នោះលក្ខខណ្ឌតម្រូវ​សម្រាប់​ការទទួលបាន​គ្រូបង្រៀនផ្នែក​អប់រំទូទៅម្នាក់​នៅ​ក្នុង​កិច្ចប្រជុំរបស់កម្មវិធី IEP នីមួយៗ​ នឹងត្រូវអនុវត្ត​ ប្រសិន​បើកុមារកំពុង​ចូល​រួម​ ឬ​អាចនឹង​កំពុងតែ​​ចូលរួមនៅក្នុងកម្មវិធីអប់រំទូទៅ។ [34 C.F.R. Secs. 300.​321, 300.324(a)(3) & (b)(3).] មើលជំពូក 13 ព័ត៌មានស្ដីពីសេ​វាកម្មអប់រំ​នៅ​ថ្នាក់​មត្តេយ្យសិក្សា

(7.27) កូនរបស់ខ្ញុំកំពុងតែផ្ទេរចេញពីការអប់រំពិសេសនៅថ្នាក់វិទ្យាល័យ ចូល​ទៅក្នុង​ឱកាសនៃកម្មវិធីអប់រំ​សម្រាប់​មនុស្សពេញវ័យច្រើន​ជាង​មុន។ តើលក្ខខណ្ឌតម្រូវ​នៃ​មជ្ឈដ្ឋាន​ LRE អនុវត្តចំពោះ​សិស្សដល់​អាយុ​​ត្រូវផ្ទេរចេញ​ដែរឬទេ?

បាទ/ចាស​។ ច្បាប់សហព័ន្ធនិងរដ្ឋ តម្រូវឲ្យមានការ​ផ្ដល់ជូន​ការដាក់បញ្ចូល​ទៅ​ក្នុង​​មជ្ឍដ្ឋាន​ដែល​មាន​ការរឹត​បន្តឹង​តិចតួច។  [34 C.F.R. Sec. 300.114(a)(2); Cal. Ed. Code Sec. 56342(b)]. ឧទាហរណ៍ “គោលដៅនៃ​សេវាកម្មផ្ទេរ​ការ​សិក្សា[​នោះ] គឺជាការផ្លាស់ប្តូរ​ពី​ការអប់រំនៅ​​មធ្យមសិក្សា​ចូល​ទៅ​កាន់​​ជីវិតមនុ​ស្ស​ពេញ​វ័យ ដែល​ផ្តល់នូវឱកាសនានា​ដោយ​បង្កើនជា​អតិបរមា​​នូវ​ឯករាជ្យភាព​ផ្នែក​​​សេដ្ឋកិច្ច​​និងសង្គម ក្នុងមជ្ឍដ្ឋានដែលមានការរឹតបន្តឹង​តិចតួច។ . .” [Cal. Ed. Code Sec. 56460(e).]

(7.28) កូនរបស់ខ្ញុំត្រូវបានដាក់បញ្ចូលទៅក្នុងថ្នាក់រៀនធម្មតាក្នុង​អំ​ឡុង​ពេលនៃឆ្នាំសិក្សាធម្មតា។ តើការរៀបចំ​កម្មវិធីរួមបញ្ចូលនោះ គួរ​មាន​ផ្តល់ជូន​នៅអំឡុង​ “ឆ្នាំសិក្សាបន្ថែម​” ដែរឬទេ?

ប្រសិនបើសេវាកម្ម “ឆ្នាំសិក្សាបន្ថែម​” (ESY) អាចមានផ្តល់ជូន​ដល់​សិស្ស​អប់រំ​ទូទៅ​​នៅក្នុង​មណ្ឌលសិក្សា​ធិការ​របស់អ្នក ហើយប្រសិនបើកម្មវិធី IEP របស់​កូ​ន​​អ្នក រួមបញ្ចូល​នូវ​ការ​ដាក់​​បញ្ចូលគ្នា​នៅ​ក្នុង​ថ្នាក់​រៀន​ធម្មតា​​ក្នុង​អំ​ឡុង​ឆ្នាំសិក្សា​ធម្មតា ដូច្នេះ​ សេវាកម្មរួមបញ្ចូលគ្នា​ទាំងនោះ ត្រូវ​តែផ្ដល់​ជូន​នៅ​ក្នុង​អំឡុង​ឆ្នាំ​សិក្សា​​​បន្ថែមនោះ​។ [5 C.C.R. Sec. 3043(h).]។

(7.29) តើឪពុកម្ដាយមានតួនាទីអ្វីខ្លះ​នៅ​​ក្នុងការកំណត់កន្លែងអប់រំ​របស់​​កូ​នពួកគេ?

ឪពុកម្ដាយ ត្រូវតែជាផ្នែកមួយនៃក្រុម​អ្នក​ធ្វើការសម្រេចចិត្ត​ទៅលើការដាក់បញ្ចូ​ល​ទៅក្នុង​ការ​អប់រំពិសេស​ណាមួយ។ [20 U.S.C. Sec. 1414(e); 34 C.F.R. sec. 300.327.] លើស​ពី​នេះទៀត ក្រុម (រួមទាំងឪពុកម្ដាយ) ដែលធ្វើការ​សម្រេចចិត្ត​ទៅ​លើ​ការដាក់បញ្ចូលនេះ ត្រូវតែទទួល​បាន​ការណែនាំ​លក្ខខ​ណ្ឌតម្រូវ​ដែល​កំណត់ថាថ្នាក់ពិសេស ការអប់រំ​ដាច់ដោយឡែកនៅសាលា​ ឬការដក​កុមារ​​ដែល​មានពិការភាពចេញពីថ្នាក់រៀន​ទូទៅ អាចប្រព្រឹត្ត​ទៅ​បាន​ លុះត្រាតែ​លក្ខណៈ ឬ​ភាព​ធ្ងន់ធ្ងរ​នៃ​ពិការភាព គឺស្ថិតនៅក្នុងកម្រិត​មួយ​ដែលការអប់រំ (ដោយមាន​ជំនួ​យ និងសេវាបំពេញ​បន្ថែម) មិន​អាច​សម្រេច​បានជោគជ័យ នៅក្នុង​មជ្ឈដ្ឋាន​អប់រំទូទៅ។ [34 C.F.R. Sec. 300.114(a)(2)(ii); Cal. Ed. Code Sec. 56342​(b)​.]

(7.30) តើខ្ញុំគប្បីដឹងអំពីអ្វីខ្លះ ប្រសិនបើកូនរប​ស់ខ្ញុំត្រូវ​តែទទួល​បាន​ការ​អប់រំរបស់គាត់​នៅផ្ទះ ឬនៅក្នុង​មន្ទីរពេទ្យ​?

ប្រសិនបើក្រុមការងារ​កម្មវិធី IEP កំណត់ថាសិស្សត្រូវទទួលបានការអប់រំនៅផ្ទះ ឬនៅក្នុងមន្ទីរពេទ្យ ពេលនោះ​​ មណ្ឌល​សិក្សាធិការ ត្រូវតែផ្ដល់ការអប់រំពិសេស និង​សេវាកម្មពាក់ព័ន្ធនានាដែល​ត្រូវការ​ដើម្បី​ដោះស្រាយ​បញ្ហា​តម្រូវការអ​ប់រំ​របស់កូនអ្នកនៅផ្ទះ ឬនៅក្នុងមន្ទីរពេទ្យ។  នៅពេលផ្ដល់ការណែនាំ​លើ​ការដាក់​បញ្ចូលសម្រាប់ការបង្រៀននៅផ្ទះ ក្រុមការងារ​កម្មវិធី IEP ត្រូវ​តែ​មាន​របាយការ​ណ៍​វេជ្ជសាស្រ្តមួយ​នៅក្នុង​ព័ត៌មានស្តីពី​ការវាយតម្លៃពីគ្រូពេទ្យព្យាបាល​ និង​គ្រូពេទ្យ​វះកាត់​ ឬ​របាយការណ៍របស់អ្នកចិត្ត​សាស្រ្ត​ យ៉ាង​សមស្រប ដោយមាន​បង្ហាញ​អំពី​ស្ថានភាពរោគវិនិច្ឆ័យ​ និងដោយ​មាន​ការ​បញ្ជាក់​ថា​ភាព​ធ្ងន់ធ្ងរ​នៃ​ស្ថានភាព​នេះ​​​ បាន​រារាំង​កូន​សិស្ស​មិនឲ្យ​ចូលរួមនៅក្នុង​ការ​ដាក់បញ្ចូល​ក្នុង​​ការសិក្សា​​​ដែ​ល​​មាន​ការរឹត​បន្តឹង​​តិចតួច។ របាយការណ៍ ក៏ត្រូវរួមបញ្ចូល​កាលបរិច្ឆេទ​តាម​ប្រតិទិ​នដែលបាន​ព្យាករណ៍ សម្រាប់ការ​វិល​ត្រឡប់​មក​សិក្សា​នៅ​សាលា​វិញ​របស់សិស្ស។  ក្រុមការងារ​កម្មវិធី IEP ត្រូវតែពិចារណាឡើងវិញ​អំពីកម្មវិធី IEP នៅមុន​កាលបរិច្ឆេទតាម​ប្រតិទិន​ដែល​បាន​​ព្យាករណ៍​សម្រាប់ការវិល​ត្រឡប់​មក​សិក្សា​វិញរបស់សិស្ស។  ប្រសិនបើសិស្សមានស្ថា​នភាពវេជ្ជសាស្រ្តណា​មួ​យ​​ ដូចជាស្ថានភាព​ទាំ​ងឡាយដែលមាន​ពាក់ព័ន្ធ​នឹង​ការ​វះកាត់​នានា គ្រោះថ្នាក់​ចៃដន្យ​ មាន​ជំងឺរយៈពេលខ្លី ឬការព្យាបាលបែប​វេជ្ជសាស្រ្តសម្រាប់​ជំងឺរ៉ាំរ៉ៃ​ជា​ដើម​ ដូច្នេះ​ ក្រុមការងារ​កម្មវិធី IEP ត្រូវតែពិនិត្យ និងធ្វើការកែប្រែកម្មវិធី IEP ប្រសិ​នបើសមស្រប នៅពេល​ដែល​មានការផ្លាស់ប្ដូរសំខាន់ៗ​ណាមួយ​ចំពោះ​ស្ថាន​ភាពវេជ្ជសាស្រ្តរបស់សិស្សក្នុងពេលបច្ចុប្បន្ន។

ការបង្រៀន​​នៅផ្ទះ ឬមន្ទីរពេទ្យ អាចនឹងត្រូវធ្វើឡើងជាលក្ខណៈបុគ្គល​ ជា​ក្រុម​តូច​​​ៗ ឬដោយការសិក្សា​ពី​ចម្ងាយ​។  ការបង្រៀនេះ​ ត្រូវបានផ្តល់​ជូន​​​តាមរយៈ​​គ្រូបង្រៀននៅថ្នាក់រៀន​ធម្មតា គ្រូបង្រៀននៅថ្នាក់រៀន​ពិសេស ឬគ្រូបង្រៀន​ជំនាញ​​​​​ធនធាន ប្រសិនបើគ្រូបង្រៀន ឬអ្នកជំនាញមានស​មត្ថភាព​ផ្ដល់​ការ​បង្រៀ​​ន និង​សេវាកម្ម​​ទាំង​នោះ​ និង​ប្រសិនបើការផ្ដល់ការបង្រៀន និង​សេវាក​ម្ម​ដោយគ្រូបង្រៀ​ន​ ឬ​អ្នក​ជំនាញ​ទាំង​នោះ​​អាច​ប្រព្រឹត្ត​ទៅបាន​។  បើមិន​ដូច្នោះ​ទេ​ អ្នកជំនាញដែលពាក់ព័ន្ធនឹងសេវាកម្មសមស្របនានា គប្បីផ្ដល់​នូវការ​បង្រៀន​នោះ​។  គ្រូបង្រៀនដែលផ្ដល់ការបង្រៀននៅផ្ទះ គប្បីទាក់​ទងទៅ​សា​លា និង​គ្រូបង្រៀន​ពីមុន​របស់​សិស្ស​ ដើម្បី​កំណត់​​​ពី៖

1. សៀវភៅសិក្សាដែលត្រូវបង្រៀន
2. សៀវភៅ និងសម្ភារៈដែលត្រូវ​ប្រើប្រាស់ និង
3. អ្នក​ទទួលខុសត្រូវក្នុងការចេញពិន្ទុ និងឲ្យសិស្សឡើងថ្នាក់ នៅពេល​​​​សមស្រប។

សម្រាប់សិស្សថ្នាក់ទី7 ដល់ថ្នាក់ទី12 គ្រូបង្រៀន​គប្បីត្រូវ​ពិភាក្សា​ជាមួយ​អ្នក​ប្រឹក្សា​យោបល់​របស់​សាលា​ដើម្បី​កំណត់​ពី៖

1. ម៉ោងដែលសិស្សទទួលបានក្រេឌីតពីវគ្គសិក្សាតាម​ឆមាស​នៅ​ក្នុង​​មុខវិជ្ជានីមួយៗដែល​រួមបញ្ចូល​ទៅក្នុង​កម្មវិធី IEP និងពិន្ទុគិត​មក​មកត្រឹម​ថ្ងៃ​មានវត្តមានចុងក្រោយ។
2. អ្នកទទួលខុសត្រូវក្នុងការចេញក្រេឌីតនៅកិច្ច​ការក្នុងវគ្គសិក្សា​ ត្រូវ​បាន​បំពេញ​ និង​
3. អ្នកចេញសញ្ញាបត្រ ប្រសិនបើសិស្សបញ្ចប់ការសិក្សា។

[5  C.C.R. 3051.4.]