បាទ/ចាស។ ប្រសិនបើកូនរបស់អ្នកមានអាកប្បកិរិយាដែលប៉ះពាល់ដល់ការសិក្សារបស់កូនអ្នក ឬដល់កុមារដទៃ ច្បាប់សហព័ន្ធតម្រូវឲ្យក្រុមការងារកម្មវិធី IEP ត្រូវធ្វើការពិចារណាថាតើការគាំទ្រផ្នែកអាកប្បកិរិយា យុទ្ធសាស្រ្ត និងសេវាកម្មបែបណាដែលត្រូវការផ្តល់ជូន ដើម្បីឲ្យកូនរបស់អ្នកអាចទទួលបានអត្ថប្រយោជន៍ពីការអប់រំនៅក្នុងមជ្ឈដ្ឋានដែលមានការរឹតបន្តឹងតិចបំផុត (LRE)។1 ប្រសិនបើអ្នកមានការព្រួយបារម្ភអំពីអាកប្បកិរិយារបស់កូនអ្នកនៅក្នុងសាលារៀន សូមសរសេរលិខិតទៅសាលារបស់កូនអ្នកដោយស្នើសុំឱ្យមណ្ឌលសិក្សាធិការវាយតម្លៃអាកប្បកិរិយារបស់កូនអ្នក និងប្រាប់គាត់អំពីភារកិច្ចរបស់គាត់ក្នុងការមានគោលដៅ និងសេវាកម្មទាក់ទងនឹងតម្រូវការអាកប្បកិរិយារបស់កូនអ្នកនៅក្នុងកម្មវិធី IEP របស់គាត់។
មណ្ឌលសិក្សាធិការមានទំនួលខុសត្រូវផ្លូវច្បាប់ក្នុងការកំណត់អត្តសញ្ញាណ និងផ្តល់នូវប្រភេទនៃការវាយតម្លៃ ផែនការអប់រំ និងសេវាកម្ម ឬការគាំទ្រដែលក្រុមការងារកម្មវិធី IEP របស់កូនអ្នកកំណត់ថាចាំបាច់ដើម្បីជួយកូនរបស់អ្នកកែលម្អអាកប្បកិរិយារបស់គាត់នៅក្នុងសាលារៀន។ សេវាកម្ម និងជំនួយទាំងនេះត្រូវបានផ្តល់ជូន ដូច្នេះកូនរបស់អ្នកអាចទទួលបានអត្ថប្រយោជន៍ពីការអប់រំ ហើយមិនចាំបាច់ផ្លាស់ទីបរិបទដែលមានការរឹតបន្តឹងបន្ថែមទៀត ដូចជាថ្នាក់ថ្ងៃពិសេស ឬកម្មវិធីព្យាបាលពេលថ្ងៃ។
កម្មវិធី IEP របស់កូនអ្នកគួររួមបញ្ចូលសេចក្តីថ្លែងការណ៍អំពីការអប់រំពិសេស និងសេវាកម្មពាក់ព័ន្ធ និងជំនួយ និងសេវាកម្មបន្ថែមដែលត្រូវផ្តល់ជូនកូនរបស់អ្នក។ នេះរួមបញ្ចូលទាំងសេចក្តីថ្លែងការណ៍អំពីគោលដៅអាកប្បកិរិយាប្រចាំឆ្នាំដែលអាចវាស់ស្ទង់បានដែលត្រូវបានបង្កើតឡើងដើម្បីដោះស្រាយតម្រូវការអាកប្បកិរិយារបស់កូនអ្នក។2 ប្រសិនបើអាកប្បកិរិយានេះកំពុងរារាំងដល់ការសិក្សារបស់កូនអ្នក ឬបន្តស្ថិតនៅក្នុងថ្នាក់រៀនអប់រំចំណេះទូទៅ ឬក្នុងមជ្ឈដ្ឋានមានការរឹតបន្តឹងតិចតួច នោះកម្មវិធី IEP របស់គាត់ គួរតែមានចែងនូវសេចក្តីថ្លែងការណ៍អំពីសេវាកម្មគាំទ្រផ្នែកអាកប្បកិរិយាដែលគាត់ត្រូវការ។3 សេចក្តីថ្លែងការណ៍នៃសេវាកម្មនេះហៅថាផែនការគាំទ្រអាកប្បកិរិយា (BSP) ហើយ អាចរួមបញ្ចូលបច្ចេកទេសគ្រប់គ្រងអាកប្បកិរិយា បុគ្គលិកចាំបាច់ និងសេវាកម្មគាំទ្រផ្សេងទៀត ដែលត្រូវការដើម្បីអនុវត្តគោលដៅអាកប្បកិរិយារបស់កូនអ្នក។
ប្រសិនបើសាលារបស់កូនអ្នកយល់ព្រមថា កូនរបស់អ្នកមានតម្រូវការអាកប្បកិរិយា ហើយកម្មវិធី IEP មិនរួមបញ្ចូលការគាំទ្រ ឬយុទ្ធសាស្ត្រដើម្បីដោះស្រាយអាកប្បកិរិយា និង/ឬមិនបញ្ជាក់ពីគោលដៅដែលទាក់ទងនឹងអាកប្បកិរិយារបស់កូនអ្នកទេ សាលារៀនអាចនឹងបដិសេធកូនរបស់អ្នកនូវការអប់រំសាធារណៈសមស្របដោយឥតគិតថ្លៃ (FAPE)។ អ្នកអាចពិចារណាដាក់ពាក្យបណ្តឹងស្តីពីអនុលោមភាពទៅក្រសួងអប់រំរដ្ឋកាលីហ្វ័រញ៉ា (CDE) បាន។ ទោះយ៉ាងណាក៏ដោយ អ្នកក៏អាចពិចារណាលើការដាក់ពាក្យសុំសវនាការតាមនីតិវិធីត្រឹមត្រូវតាមផ្លូវច្បាប់ផងដែរ។ សូមមើល ជំពូក 6 ព័ត៌មានស្តីពីនីតិវិធីត្រឹមត្រូវតាមផ្លូវច្បាប់/នីតិវិធីនៃអនុលោមភាព។
ប្រសិនបើកម្មវិធី IEP របស់កូនអ្នកមានសេវាកម្ម ការគាំទ្រ ឬយុទ្ធសាស្ត្រដើម្បីដោះស្រាយតម្រូវការអាកប្បកិរិយាទាំងនេះ ប៉ុន្តែវាមិនមានប្រសិទ្ធភាព នោះមណ្ឌលសិក្សាធិការរបស់អ្នកគួរតែអំពាវនាវឲ្យកម្មវិធី IEP ពិភាក្សាអំពីសេវាកម្មអាកប្បកិរិយាផ្សេងៗ ឬបន្ថែមដែលនឹងមានប្រសិទ្ធភាព។4 ទោះយ៉ាងណាក៏ដោយ អ្នកអាចស្នើសុំការត្រួតពិនិត្យកិច្ចប្រជុំកម្មវិធី IEP ដោយខ្លួនអ្នកផ្ទាល់ ដើម្បីដោះស្រាយបញ្ហាកង្វះការរីកចម្រើនរបស់កូនអ្នក។ មណ្ឌលសិក្សាធិការត្រូវតែកោះកិច្ចប្រជុំកម្មវិធី IEP ក្នុងរយៈពេល 30 ថ្ងៃបន្ទាប់ពីទទួលបានសំណើសុំជាលាយលក្ខណ៍អក្សររបស់អ្នក ដោយមិនរាប់បញ្ចូលថ្ងៃរវាងម៉ោងសិក្សា ឆមាស ឬថ្ងៃនៃវិស្សមកាលសាលា និងថ្ងៃឈប់សម្រាកលើសពីប្រាំថ្ងៃសិក្សា។ ប្រសិនបើអ្នកធ្វើសំណើរបស់អ្នកដោយផ្ទាល់មាត់ នោះមណ្ឌលសិក្សាធិការត្រូវជូនដំណឹងដល់អ្នកអំពីតម្រូវការដើម្បីធ្វើសំណើជាលាយលក្ខណ៍អក្សរ និងតាមនីតិវិធីដើម្បីធ្វើដូច្នេះ។5