សេចក្ដីថ្លែងការណ៍អំពីគោលដៅ “ក្រោយមធ្យមសិក្សា” និងសេវាកម្មផ្ទេរការសិក្សា នៅក្នុងកម្មវិធី IEP របស់សិស្សគួរតែទាក់ទងដោយផ្ទាល់ទៅនឹងគោលដៅរបស់សិស្សហួសពីការ អប់រំមធ្យមសិក្សា។ វាក៏ត្រូវតែបង្ហាញពីរបៀបដែលការសិក្សាដែលបានគ្រោងទុក និងកិច្ចការសិក្សារបស់សិស្សត្រូវផ្សារភ្ជាប់ទៅនឹងគោលដៅទាំងនេះ។
- ជាឧទាហរណ៍ សម្រាប់សិស្សដែលចាប់អារម្មណ៍ក្នុងការស្វែងរកអាជីពផ្នែកវិទ្យាសាស្ត្រកុំព្យូទ័រ សេចក្ដីថ្លែងការណ៍អំពីតម្រូវការសេវាកម្មផ្ទេរការសិក្សាអាចរួមបញ្ចូលវគ្គសិក្សាបច្ចេកវិទ្យា។
- សេចក្តីថ្លែងការណ៍របស់សិស្សម្នាក់ទៀតអំពីតម្រូវការសេវាកម្មផ្ទេរការសិក្សាអាចរួមបញ្ចូលការបណ្តុះបណ្តាលការប្រើប្រាស់រថយន្តក្រុងសម្រាប់ឯករាជ្យភាពនាពេលអនាគតនៅក្នុងសហគមន៍។
គោលដៅគឺជ្រើសរើសមុខវិជ្ជាសិក្សាដែលនឹងមានន័យសម្រាប់អនាគតរបស់សិស្ស និងជំរុញសិស្សឱ្យបញ្ចប់ការសិក្សារបស់គាត់។
ដូចសេវាកម្មអប់រំពិសេសផ្សេងទៀត សេវាកម្ម និងសកម្មភាពផ្ទេរការសិក្សាត្រូវតែផ្តល់ជូនក្នុងមជ្ឈដ្ឋានដែលមានការរឹតបន្តឹងតិចបំផុត។ សិស្សគួរតែចូលរួមក្នុងកម្មវិធីអប់រំវិទ្យាល័យជាមួយមិត្តរួមថ្នាក់ដែលមានអាយុស្រករគ្នាដែលមិនមានពិការភាពក្នុងកម្រិតអតិបរមាដែលអាចធ្វើទៅបាន។ ឧទាហរណ៍ សិស្សអាចចូលរៀនក្រៅម៉ោង ឬពេញម៉ោងក្នុងថ្នាក់អប់រំចំណេះទូទៅនៅវិទ្យាល័យ ដោយមានការគាំទ្រពី “កម្មវិធីបរិយាបន្ន”។ គ្រូអប់រំពិសេស ជំនួយការគ្រូ និងអ្នកផ្តល់សេវាសហការជាមួយគ្រូអប់រំចំណេះទូទៅ ដើម្បីសម្របកម្មវិធីសិក្សា និងផ្តល់ការបង្រៀនជាលក្ខណៈបុគ្គលនៅក្នុងបរិបទសមាហរណកម្មទាំងនេះ ដើម្បីអាចឱ្យសិស្សបំពេញតាមគោលដៅនៃកម្មវិធី IEP។ លើសពីនេះទៀត សិស្សអាចចាប់ផ្តើមចូលរួមក្នុងបទពិសោធការងារសមាហរណកម្មផ្ទាល់ខ្លួន និងមានប្រយោជន៍ ដូចជាការបណ្តុះបណ្តាលនៅនឹងកន្លែងសម្រាប់មួយរយៈពេល មួយ ឬពីរថ្ងៃក្នុងមួយសប្តាហ៍។ ការបណ្តុះបណ្តាលជំនាញអាចធ្វើឡើងទាំងក្នុង និងក្រៅបរិវេណវិទ្យាល័យ។