អ្នកសម្របសម្រួលសេវាកម្មដែលបានចាត់តាំងដោយក្រុមការងារផែនការ IFSP ជាអ្នកទទួលខុសត្រូវចំពោះការអនុវត្តផែនការដោយផ្ទាល់ ក៏ដូចជាការសម្របសម្រួលជាមួយទីភ្នាក់ងារ ឬអ្នកផ្តល់សេវាផ្សេងទៀតផងដែរ។ សេវាកម្ម DDS ត្រូវធានាថាអ្នកសម្របសម្រួលសេវាកម្មទទួលបានការបណ្តុះបណ្តាលក្នុងការធ្វើការងារជាមួយកុមារ និងគ្រួសាររបស់គាត់ និងបំពេញបានតាមលក្ខខណ្ឌតម្រូវផ្នែកសមត្ថភាព និងផ្នែកច្បាប់របស់រដ្ឋនិងសហព័ន្ធ។1
អ្នកសម្របសម្រួលសេវាកម្មគួរតែមានបទពិសោធ និងចំណេះដឹងអំពី៖
- ទារក និងកុមារទើបចេះដើរដែលត្រូវបានបញ្ជូនបន្តទៅទទួលការវាយតម្លៃ និងរង្វាយតម្លៃ ឬអ្នកដែលមានសិទ្ធិទទួលបានសេវាអន្តរាគមន៍ពីដើមទី។
- ការធ្វើការជាមួយគ្រួសារ និងធនធានសហគមន៍ និង
- លក្ខខណ្ឌតម្រូវរបស់សហព័ន្ធ និងរដ្ឋទាក់ទងនឹងកម្មវិធី Early Start របស់រដ្ឋកាលីហ្វ័រញ៉ា។2
ក្រោមច្បាប់រដ្ឋកាលីហ្វ័រញ៉ា មណ្ឌលសិក្សាធិការ ផ្នែកផែនការតាមមូលដ្ឋាននៅក្នុងការអប់រំពិសេស (Special Education Local Plan Area, SELPA) ឬការិយាល័យខោនធី ត្រូវទទួលខុសត្រូវចំពោះការផ្តល់ជូនសេវាកម្មតាមរយៈក្រុមការងារជំនាញចម្រុះ។ បន្ថែមពីលើនេះមាតាបិតា/អាណាព្យាបាល/អ្នកមានសិទ្ធិអប់រំផ្សេងទៀត ក្រុមការងារក៏អាចរួមបញ្ចូលនូវអ្នកជំនាញវិជ្ជាជីវៈមកពីផ្នែកអប់រំពិសេស ផ្នែកព្យាបាលការនិយាយនិងភាសា ផ្នែកព្យាបាលដោយចលនា ផ្នែកព្យាបាលដោយការងារ ផ្នែកប្រព័ន្ធការស្តាប់ ផ្នែកថែទាំ ដែលមានកម្រិតជំនាញមិនទាបជាងគិលានុប្បដ្ឋាកដែលបានទទួលស្គាល់ ផ្នែកសង្គមកិច្ច ផ្នែកចិត្តសាស្ត្រ ផ្នែកសុខភាពផ្លូវចិត្ត ឬការគាំទ្រពីក្នុងចំណោមឪពុកម្តាយដូចគ្នា។ បុគ្គលម្នាក់នៅក្នុងក្រុមការងារនេះ ត្រូវបានចាត់តាំងឲ្យសម្របសម្រួល និងផ្តល់សេវាកម្ម និងដើរតួនាទីជាអ្នកប្រឹក្សាទៅដល់សមាជិកក្រុមការងារផ្សេងទៀត។ អ្នកផ្តល់សេវាក៏ត្រូវមានបទពិសោធសមស្របផងដែរនៅក្នុងផ្នែក “ការលូតលាស់របស់ទារកធម្មតា និងខុសធម្មតា”3