មជ្ឈមណ្ឌលក្នុងតំបន់ ឬមណ្ឌលសិក្សាធិការ ត្រូវតែធ្វើការវាយតម្លៃដើម្បីធ្វើផែនការសម្រាប់សេវាកម្មដែលត្រូវផ្តល់ជូនដល់កូន និងគ្រួសាររបស់អ្នក។ “ការវាយតម្លៃសម្រាប់ការធ្វើផែនការ” ត្រូវតែកំណត់គ្រប់ចំណុចទាំងអស់ដូចខាងក្រោម៖
- ចំណុចខ្លាំង និងតម្រូវការពិសេសរបស់កូនអ្នកនៅក្នុងផ្នែកនីមួយៗក្នុងចំណោមផ្នែកទាំងប្រាំនៃការវាយតម្លៃពោលគឺ៖ ការលូតលាស់ផ្នែកយល់ដឹង ការលូតលាស់ផ្នែករាងកាយ និងចលករ រួមទាំងគំហើញ និងការស្តាប់ ការលូតលាស់ផ្នែកប្រាស្រ័យទាក់ទង ការលូតលាស់ផ្នែកសង្គមនិងអារម្មណ៍ និងការលូតលាស់ផ្នែកសម្របខ្លួន
- អន្តរាគមន៍ពីដើមទី និងសេវាកម្មផ្សេងទៀតដែលសមស្របដើម្បីបំពេញតម្រូវការរបស់កូនអ្នក និង
- ធនធាន អាទិភាព និងក្តីកង្វល់របស់គ្រួសារអ្នក និងការគាំទ្រនិងសេវាកម្មដែលចាំបាច់ដើម្បីលើកកម្ពស់សមត្ថភាពរបស់គ្រួសារអ្នកក្នុងការបំពេញតម្រូវការផ្នែកលូតលាស់របស់ទារក ឬកុមារទើបចេះដើរដែលមានពិការភាព (ប្រសិនបើអ្នកយល់ព្រមទៅនឹងការវាយតម្លៃគ្រួសារ)។1
មជ្ឈមណ្ឌលក្នុងតំបន់ និងមណ្ឌលសិក្សាធិការ អាចប្រើប្រាស់សម្ភារៈវាយតម្លៃដែលមានស្រាប់ ប្រសិនបើក្រុមការងារពហុជំនាញបានឯកភាពថាសម្ភារៈទាំងនេះរៀបរាប់យ៉ាងក្បោះក្បាយអំពីកម្រិតនៃតម្រូវការផ្នែកលូតលាស់ និងសេវាកម្មសម្រាប់ទារក ឬកុមារទើបចេះដើរ។ ការវាយតម្លៃសម្រាប់ការធ្វើផែនការសេវាកម្ម គប្បីត្រូវបានធ្វើឡើងនៅក្នុងមជ្ឈដ្ឋានធម្មតា ប្រសិនបើអាចធ្វើបាន។2
ការវាយតម្លៃ ត្រូវផ្អែកលើវិធីសាស្ត្រ និងនីតិវិធីសមស្របតាមវ័យ ដែលអាចរួមមានចំណុចមួយចំនួនដូចខាងក្រោម៖
- ការត្រួតពិនិត្យនូវព័ត៌មានពាក់ព័ន្ធទៅនឹងស្ថានភាពសុខភាព និងប្រវត្តិវេជ្ជសាស្ត្ររបស់កូនអ្នក ដែលផ្តល់ជូនដោយអ្នកជំនាញវិជ្ជាជីវៈសុខភាពដែលមានលក្ខណៈសម្បត្តិគ្រប់គ្រាន់ ដែលពួកគេបានធ្វើការវាយតម្លៃ ឬផ្តល់រង្វាយតម្លៃទៅលើកូនរបស់អ្នក
- ការអង្តេតតាមដានការលូតលាស់ដោយអ្នក និងដោយបុគ្គលិកដែលមានលក្ខណៈសម្បត្តិគ្រប់គ្រាន់
- នីតិវិធីផ្សេងទៀតដែលបានប្រើប្រាស់ដោយបុគ្គលិកដែលមានលក្ខណៈសម្បត្តិគ្រប់គ្រាន់ ដើម្បីកំណត់វត្តមាននៃការលូតលាស់យឺតយ៉ាវ ស្ថានភាពហានិភ័យពីមុនមក ឬហានិភ័យខ្ពស់ប្រឈមនឹងពិការភាពផ្នែកលូតលាស់ និង
- តេស្ត ឬឯកសារស្តង់ដារ។3
ការវាយតម្លៃលើធនធានគ្រួសារ បញ្ហាអាទិភាព និងក្តីកង្វល់ពាក់ព័ន្ធនឹងការលើកកម្ពស់ការលូតលាស់របស់កូនរបស់អ្នក ត្រូវតែជាការស្ម័គ្រចិត្ត ហើយត្រូវ៖
- ធ្វើ់ឡើងដោយបុគ្គលិកមានលក្ខណៈសម្បត្តិគ្រប់គ្រាន់ដែលទទួលបានការបណ្តុះបណ្តាលដើម្បីប្រើប្រាស់វិធីសាស្ត្រ និងនីតិវិធីសមស្រប
- ផ្អែកលើព័ត៌មានដែលផ្តល់ជូនដោយគ្រួសាររបស់អ្នកតាមរយៈការសម្ភាសផ្ទាល់ខ្លួន
- រួមបញ្ចូលការពិពណ៌នាអំពីធនធាន អាទិភាព និងក្តីកង្វល់របស់គ្រួសារពាក់ព័ន្ធនឹងការលើកកម្ពស់ការលូតលាស់របស់កូនអ្នក និង
- ធ្វើឡើងជាភាសាដែលគ្រួសារអ្នកនិយាយ ឬរបៀបប្រាស្រ័យទាក់ទងផ្សេងទៀត លើកលែងតែច្បាស់លាស់ថាមិនអាចធ្វើដូច្នោះបានមែន។4