បាទ/ចាស។ ក្នុងកាលៈទេសៈជាក់លាក់មួយចំនួន មណ្ឌលសិក្សាធិការអាចប្ដូរកន្លែងរៀនរបស់កូនអ្នកទៅទីកន្លែងផ្សេងទៀតណាមួយបានភ្លាមៗ និងបន្តទុកកូនរបស់អ្នកនៅទីនោះរហូតដល់រយៈពេល 45 ថ្ងៃសិក្សា បើទោះបីជាអាកប្បកិរិយានោះត្រូវបានរកឃើញថាជាការបង្ហាញឲ្យឃើញពិការភាពរបស់គាត់ក៏ដោយ។ ក្នុងសា្ថនភាពនេះ ការដាក់នៅកន្លែងសិក្សាផ្សេងទៀតនោះ ត្រូវបាន ហៅថា “មជ្ឈដ្ឋានអប់រំជំនួសបណ្តោះអាសន្ន”។
កូនរបស់អ្នកអាចត្រូវបានគេដាក់បញ្ជូលក្នុង “មជ្ឈដ្ឋានអប់រំជំនួសបណ្តោះអាសន្ន” ប្រសិនបើមណ្ឌលសិក្សាធិការអះអាងថាគាត់បានប្រព្រឹត្តអំពើណាមួយដូចខាងក្រោម៖
- បានយកអាវុធទៅសាលារៀន ឬបានកាន់កាប់អាវុធនៅសាលារៀន ឬនៅក្នុងបរិវេណសាលារៀន ឬនៅកម្មវិធី/ព្រឹត្តិការណ៍របស់សាលារៀន
- មានចេតនាយកតាមខ្លួន ឬប្រើប្រាស់ថ្នាំញៀនខុសច្បាប់ ឬលក់ ឬជំរុញឲ្យមានការលក់ថ្នាំញៀនណាមួយនៅពេលនៅសាលា ក្នុងបរិវេណសាលា ឬក្រៅបរិវេណសាលារៀន
- ធ្វើឲ្យរងរបួសរូបរាងកាយធ្ងន់ធ្ងរលើមនុស្សម្នាក់ផ្សេងទៀត ពេលនៅសាលា ក្នុងបរិវេណសាលា ឬក្រៅបរិវេណសាលារៀន។ “របួសរាងកាយធ្ងន់ធ្ងរ” មានន័យថា៖ ហានិភ័យខ្ពស់ប្រឈមនឹងការស្លាប់ ឬការឈឺចាប់លើរូបរាងកាយធ្ងន់ធ្ងរ ឬការខូចទ្រង់ទ្រាយរូបរាងជាក់ស្តែងនិងរយៈពេលវែង ឬការបាត់បង់រយៈពេលវែង ឬភាពចុះខ្សោយមុខងារសារពាង្គកាយ សរីរាង្គ ឬផ្លូវចិត្ត។1
ទោះបីមណ្ឌលសិក្សាធិការព្យាយាមដកយកកូនរបស់អ្នកទៅកាន់មជ្ឈដ្ឋានអប់រំជំនួសបណ្តោះអាសន្នក៏ដោយ ប៉ុន្តែមណ្ឌលសិក្សាធិការនៅតែត្រូវជួបអ្នកក្នុងរយៈពេល 10 ថ្ងៃសិក្សា ដើម្បីបើកកិច្ចប្រជុំកំណត់ឲ្យឃើញពិការភាព។
អ្នកអាចដាក់ពាក្យបណ្ដឹងសុំនីតិវិធីត្រឹមត្រូវតាមផ្លូវច្បាប់ ដើម្បីមិនឯកភាពនឹងការសម្រេចរបស់កិច្ចប្រជុំកម្មវិធី IEP ផ្នែកកំណត់ឲ្យឃើញពិការភាព ទៅលើការបណ្តេញចេញនោះ រួមទាំងការផ្លាស់កូនរបស់អ្នកទៅមជ្ឈដ្ឋានអប់រំជំនួសបណ្តោះអាសន្នណាមួយផងដែរ។ ប្រសិនបើអ្នកដាក់ពាក្យសុំនីតិវិធីត្រឹមត្រូវតាមផ្លូវច្បាប់ដើម្បីជំទាស់នឹងការដាក់កូនរបស់អ្នកនៅក្នុងមជ្ឈដ្ឋានបណ្តោះអាសន្នណាមួយ ឬការសម្រេចចិត្តផ្សេងទៀតរបស់ក្រុមការងារអំពីថាតើអាកប្បកិរិយានេះជាការកំណត់ឲ្យឃើញពិការភាពណាមួយឬយ៉ាងណា ពេលនោះ ALJ នឹងសម្រេចចិត្ត—ក្នុងសវនាការពន្លឿនមួយ—ថាតើត្រូវបញ្ជូនកូនរបស់អ្នកមកកន្លែងដើមវិញ ឬត្រូវទុកឲ្យគាត់ (ឬបញ្ជាឲ្យគាត់) ស្ថិតនៅក្នុងកន្លែងរៀនជំនួសណាមួយក្នុងរយៈពេល 45 ថ្ងៃ។2
ក្នុងអំឡុងពេលជំទាស់ទៅនឹងមជ្ឈដ្ឋានបណ្តោះអាសន្ន ឬការកំណត់របស់មណ្ឌលសិក្សាធិការដែលថាអាកប្បកិរិយានេះមិនមែនជាការកំណត់ឲ្យឃើញពិការភាពរបស់កូនអ្នកទេ នោះកូនរបស់អ្នកនឹងត្រូវបន្តស្ថិតនៅក្នុងមជ្ឈដ្ឋានណាមួយដែលមណ្ឌលសិក្សាធិការបានដាក់បញ្ចូលគាត់ក្នុងកន្លែងនោះ។3 សវនាការនោះត្រូវតែធ្វើឡើងក្នុងរយៈពេល 20 ថ្ងៃសិក្សា គិតចាប់ពីថ្ងៃដែលអ្នកស្នើសុំ ហើយ ALJ ត្រូវតែចេញសេចក្តីសម្រេចក្នុងរយៈពេល 10 ថ្ងៃសិក្សាក្រោយពីបានបញ្ចប់សវនាការ។ ត្រូវមាន “កិច្ចប្រជុំរកដំណោះស្រាយ” ឬការសម្រុះសម្រួលដែលបានធ្វើឡើងក្នុងរយៈពេលប្រាំពីរថ្ងៃបន្ទាប់ពីការស្នើសុំនោះផងដែរ។4 សូមមើល ជំពូក 6 ព័ត៌មានស្ដីពីនីតិវិធីត្រឹមត្រូវតាមផ្លូវច្បាប់/ពាក្យបណ្តឹងពីបទអនុលោមភាព។
មណ្ឌលសិក្សាធិការក៏អាចស្នើសុំឲ្យមានសវនាតាមនីតិវិធីត្រឹមត្រូវតាមផ្លូវច្បាប់ណាមួយ ដើម្បីស្នើសុំ ALJ បង្គាប់ឲ្យផ្លាស់ប្តូរទីកន្លែងរៀនផងដែរ ប្រសិនបើមណ្ឌលសិក្សាធិការ “ជឿជាក់ថាការទុកនៅកន្លែងបច្ចុប្បន្នរបស់កុមារ ច្បាស់ជាអាចបង្កឲ្យមានការរងរបួសដល់កុមារ ឬអ្នកដទៃទៀតបាន”។5 ប្រសិនបើ ALJ កំណត់ថាការទុកសិស្សនៅក្នុងកន្លែងរៀនបច្ចប្បន្ន ច្បាស់ជាអាចបណ្តាលឲ្យសិស្ស ឬអ្នកផ្សេងទៀតរងរបួស ដូច្នេះគាត់អាចបង្គាប់ឲ្យមានការផ្លាស់ប្តូរកន្លែងរៀនជំនួសបណ្តោះអាសន្នដែលសមស្រប ក្នុងរយៈពេលមិនលើសពី 45 ថ្ងៃសិក្សាឡើយ។6
ខណៈពេលដែលស្ថិតនៅក្នុងមជ្ឈដ្ឋានអប់រំជំនួសបណ្តោះអាសន្ន ក្នុងអំឡុងពេលនៃការផ្អាករយៈពេលវែង (ឬការបណ្តេញចេញ) សិស្សនៅតែមានសិទ្ធិទទួលបានការអប់រំសាធារណៈសមស្របដោយឥតគិតថ្លៃ ដែលអាចឲ្យសិស្សមានវឌ្ឍនភាពយ៉ាងសមស្របនៅក្នុងកម្មវិធីសិក្សាទូទៅ និងមានវឌ្ឍភាពយ៉ាងសមស្របឆ្ពោះទៅរកការសម្រេចគោលដៅដែលបានកំណត់នៅក្នុងកម្មវិធី IEP របស់កុមារ។ នេះរួមបញ្ចូលនូវសេវាកម្ម និងការកែសម្រួលអន្តរាគមន៍អាកប្បកិរិយា ដើម្បីឲ្យអាកប្បកិរិយាដែលនាំឲ្យមានការដាក់សិស្សបញ្ចូលទៅក្នុងមជ្ឈដ្ឋានអប់រំបណ្តោះអាសន្ននោះ កុំឲ្យកើតមានសាជាថ្មី។7
- 20 U.S.C. Secs. 1415(k)(1)(G) & (7)(d)); 34 C.F.R. Sec. 300.530(g).[↩]
- 20 U.S.C. Sec. 1415(k)(3)(B); 34 C.F.R. Sec. 300.532(b).[↩]
- 20 U.S.C. Sec. 1415(k)(4)(A).[↩]
- 20 U.S.C. Sec. 1415(k)(4)(B); 34 C.F.R. Sec. 300.532(c).[↩]
- 34 C.F.R. Sec. 300.532(a).[↩]
- 20 U.S.C. Sec. 1415(k)(3)(B)(ii)(II); 34 C.F.R. Sec. 300.532(b)(2)(ii).[↩]
- 34 C.F.R. Sec. 300.530(d).[↩]