អ្នកគួរតែត្រៀមខ្លួនដើម្បីពិភាក្សាសំណួរនីមួយៗដែលត្រូវឆ្លើយមុនពេលដែលមណ្ឌលសិក្សាធិការអាចផ្តល់ការណែនាំឲ្យកូនរបស់អ្នកត្រូវបណ្តេញចេញពីសាលា។ ក្រុមការងារកម្មវិធី IEP ផ្នែកកំណត់ឲ្យឃើញពិការភាពត្រូវតែឯកភាពថាអាកប្បកិរិយារបស់កូនអ្នកមិនពាក់ព័ន្ធដោយផ្ទាល់ទៅនឹងពិការភាពរបស់គាត់ទេ ហើយថាកម្មវិធី IEP ត្រូវបានអនុវត្តយ៉ាងត្រឹមត្រូវមុនពេលមណ្ឌលសិក្សាធិការអាចផ្លាស់ប្តូរកន្លែងរៀនរបស់សិស្សនៅក្នុងផ្នែកអប់រំពិសេសនោះ។ អ្នកអាចប្រើបុគ្គលិកមណ្ឌលសិក្សាធិការ (ប្រសិនបើពួកគេយល់ស្របនឹងគោលជំហររបស់អ្នក) ឬឯកសាររបស់សាលា អ្នកជំនាញឯករាជ្យនិងអ្នកផ្តល់សេវា និងមតិចូលរួមរបស់អ្នកដើម្បីគាំទ្រដល់ការយល់ឃើញរបស់អ្នក។ ដូច្នេះ ប្រសិនបើអ្នកមិនបានធ្វើដូច្នោះទេ អ្នកគួរតែពិចារណាទទួលនូវគំនិតយោបល់របស់អ្នកជំនាញខាងផ្លូវចិត្ត ឬអ្នកជំនាញពិគ្រោះយោបល់ពាក់ព័ន្ធសំណួរទាំងពីរដែលក្រុមការងារត្រូវឆ្លើយ។ អ្នកគួរតែនាំយកអ្នកជំនាញនោះ (ឬរបាយការណ៍របស់ពួកគេ) មកកាន់កិច្ចប្រជុំ។ អ្នកក៏គួរពិចារណានាំយកអ្នកតស៊ូមតិ ឬមេធាវីទៅកាន់កិច្ចប្រជុំស្តីពីការកំណត់ឲ្យឃើញពិការភាពរបស់អ្នកបាន ប្រសិនបើអាចធ្វើបាន។
ជាផ្នែកមួយនៃការតស៊ូមតិរបស់អ្នកនៅកិច្ចប្រជុំកម្មវិធី IEP ស្តីពីការកំណត់ឲ្យឃើញពិការភាពអ្នក គួរតែពិចារណាថាតើសមាសធាតុទាំងអស់នៃកម្មវិធី IEP ត្រូវបានអនុវត្តដែរឬអត់។ តើសេវាកម្មដែលត្រូវបានចែងជាលាយលក្ខណ៍អក្សរទៅក្នុងកម្មវិធី IEP ពិតជាត្រូវបានផ្តល់ជូននៅពេលអាកប្បកិរិយានោះមានការសង្ស័យដែរឬទេ? ប្រសិនបើផែនការ BIP មានពីមុនមកស្រាប់ តើវាត្រូវបានអនុវត្តតាមការកំណត់ដោយកម្មវិធី IEP នៅពេលកើតមានអាកប្បកិរិយានេះដែរឬទេ? ប្រសិនបើកម្មវិធី IEP រួមបញ្ចូលផែនការ BIP ឬគោលដៅដែលបានដោះស្រាយបញ្ហាអាកប្បកិរិយាសំខាន់ៗ ពេលនោះក្រុមការងារផ្នែកការកំណត់ឲ្យឃើញពិការភាព ទំនងជាអាចនឹងរកឃើញថាអាកប្បកិរិយានេះមានជាបពាក់ព័ន្ធនឹងពិការភាពរបស់កូនអ្នក។ លើសពីនេះទៀត អ្នកក៏គួរតែពិចារណាថាតើមណ្ឌលសិក្សាធិការបានដោះស្រាយរាល់តម្រូវការអាកប្បកិរិយាទាំងអស់របស់កូនអ្នកហើយឬនៅ។ តើបញ្ហាអាកប្បកិរិយាបង្ហាញឲ្យឃើញច្បាស់ដែរឬទេ នៅចំពោះមុខការប្រព្រឹត្តខុសដែលនាំឲ្យមានកិច្ចប្រជុំកំណត់ឲ្យឃើញពិការភាព? បើដូច្នេះមែន តើការវាយតម្លៃ FBA ធ្លាប់បានធ្វើដែរឬទេពីមុនមក? តើផែនការអាកប្បកិរិយាមានពីមុនមកស្រាប់ដែរឬទេ? តើកម្មវិធី IEP បានបញ្ជាក់អំពីទំហំ ឬប្រភេទថ្នាក់ជាក់លាក់ណាមួយ ប្រភេទនៃមជ្ឈដ្ឋានថ្នាក់រៀន ឬកម្មវិធីសិក្សាពិសេស ឬកែប្រែផ្សេងទៀតដែរឬទេ? បើដូច្នេះមែន តើសមាសធាតុកម្មវិធី IEP ទាំងនោះត្រូវបានផ្តល់ជូននៅពេលដែលការប្រព្រឹត្តខុសកំពុងត្រូវបានពិភាក្សាដែរឬទេ? ប្រសិនបើបញ្ហាអាកប្បកិរិយាដែលកំពុងកើតមាន មិនត្រូវបានដោះស្រាយដោយបុគ្គលិកឲ្យបានសមស្របនោះទេ អ្នកអាចបញ្ជាក់ប្រាប់មណ្ឌលសិក្សាធិការនេះថាសិស្សមិនគួរត្រូវបានផ្ដល់ការណែនាំឲ្យការបណ្តេញចេញនោះទេ។