សិស្សដែលមានពិការភាពត្រូវស្ថិតនៅក្រោមវិធាននៃការព្យួរការសិក្សាដូចគ្នានឹងសិស្សដែលមិនមានពិការភាពដែរ។ ប៉ុន្តែ មុនពេលមណ្ឌលសិក្សាធិការអាចផ្តល់ការណែនាំឲ្យធ្វើការបណ្តេញចេញសិស្សដែលមានពិការភាព ពេលនោះត្រូវរៀបចំកិច្ចប្រជុំស្តីពី “ការកំណត់ឲ្យឃើញពិការភាព” ដើម្បីពិភាក្សាថាតើអាកប្បកិរិយារបស់សិស្សមានពាក់ព័ន្ធនឹងពិការភាពរបស់គាត់ដែរឬអត់ ឬថាតើកម្មវិធី IEP របស់គាត់ត្រូវបានអនុវត្តដែរឬយ៉ាងណា។1
បើអាកប្បកិរិយានេះពាក់ព័ន្ធទៅនឹងពិការភាពរបស់សិស្ស ឬបើកម្មវិធី IEP របស់គាត់មិនត្រូវបានអនុវត្តនោះទេ ពេលនោះសិស្សមិនអាចត្រូវបានបណ្តេញចេញពីការសិក្សាទេ ហើយសេវាកម្មសមស្របចាំបាច់ត្រូវបានកំណត់ និងផ្តល់ដល់សិស្ស។ ការកំណត់កន្លែងរៀន គឺជាការសម្រេចចិត្តរបស់ក្រុមការងារកម្មវិធី IEP ហើយការបណ្តេញចេញពីសាលាគឺជា “ការផ្លាស់ប្តូរកន្លែងរៀន”។ ការផ្លាស់ប្តូរកន្លែងរៀនដូចជាការបណ្តេញចេញនេះជាដើម មិនអាចធ្វើទៅបានទេ បើគ្មានការរៀបចំកិច្ចប្រជុំស្តីពី “ការកំណត់ឲ្យឃើញពិការភាព” នោះទេ។ ក្រុមការងារកម្មវិធី IEP ត្រូវតែមានការរៀបចំកិច្ចប្រជុំ “ការកំណត់ឲ្យឃើញពិការភាព” នៅពេលមាន “ការផ្លាស់ប្តូរកន្លែងរៀន”។
“ការផ្លាស់ប្តូរកន្លែងរៀន” ក៏ប្រព្រឹត្តទៅផងដែរ នៅពេលដែលសិស្សត្រូវបានព្យួរការសិក្សាច្រើនជាងរយៈពេល 10 ថ្ងៃជាប់ៗគ្នា ឬនៅពេលដែលសិស្សទទួលបានការព្យួរការសិក្សាបង្គរលើសពី 10 ថ្ងៃដែលបង្កើតបានជាទម្រង់នៃដកចេញពីការសិក្សា ដោយសារតែលក្ខណៈប្រហាក់ប្រហែលគ្នានៃការព្យួរការសិក្សា និង/ឬភាពស្រដៀងគ្នានៃឧបត្តិហេតុកើតឡើង។2 ក្នុងស្ថានភាពនេះ មណ្ឌលសិក្សាធិការក៏ត្រូវរៀបចំកិច្ចប្រជុំស្តីពីការកំណត់ឲ្យឃើញពិការភាពផងដែរ ដើម្បីកំណត់តម្រូវការ និងសេវាកម្មអប់រំ អាកប្បកិរិយា និងកន្លែងរៀនរបស់សិស្ស។ មណ្ឌលសិក្សាធិការមិនអាចផ្លាស់ប្តូរកន្លែងរៀនរបស់កូនអ្នកដោយគ្មានការយល់ព្រមពីអ្នក ឬដោយគ្មានកិច្ចប្រជុំកំណត់ឲ្យឃើញពិការភាពឡើយ លើកលែងតែអាកប្បកិរិយាធ្ងន់ធ្ងរជាក់លាក់មួយចំនួន។ (សូមមើលសំណួរទី 11 ខាងក្រោម)
ច្បាប់រដ្ឋព្រមតាមច្បាប់សហព័ន្ធចំពោះវិធានភាគច្រើនដែលគ្រប់គ្រងលើការផ្អាក និងការបណ្តេញចេញនៃសិស្សដែលត្រូវការការអប់រំពិសេស។3 ច្បាប់សហព័ន្ធនិងរដ្ឋអនុញ្ញាតឲ្យមានការព្យួរការសិក្សារបស់សិស្សនៅក្នុងការអប់រំពិសេសរហូតដល់ 10 ថ្ងៃជាប់ៗគ្នាដោយមិនចាំបាច់មានលក្ខខណ្ឌតម្រូវនៃការកំណត់ឲ្យឃើញពិការភាពនោះទេ ប៉ុន្តែសម្រាប់ការព្យួរការសិក្សាលើសពី 10 ថ្ងៃ ដាច់ខាតត្រូវតែមានកិច្ចប្រជុំពិសេស។4 ហេតុដូច្នេះ ពេលខ្លះ នាយកសាលាត្រូវពន្យារពេលព្យួរការសិក្សារបស់សិស្ស 5 ថ្ងៃនេះក្នុងរយៈពេលចំនួនប្រាំថ្ងៃបន្ថែមទៀត។ សិស្សអាចត្រូវបានព្យួរការសិក្សានៅក្នុងការល្មើសលើកដំបូង លុះត្រាតែដោយសារមូលហេតុ (1) ដល់ (5) នៅក្នុងការចែងបញ្ជាក់នៅក្នុងសំណួរទី 2 ខាងលើ ឬដោយសារតែវត្តមានរបស់គាត់បង្កគ្រោះថ្នាក់ដល់បុគ្គលផ្សេងទៀត។5