គណៈកម្មការអប់រំនៃមណ្ឌលសិក្សាធិការត្រូវអនុម័តនូវវិធាននិងបទប្បញ្ញត្តិនានាក្នុងមូលដ្ឋានដែលបង្កើតនូវនីតិវិធីសម្រាប់កិច្ចដំណើរការស្នើសុំការអនុញ្ញាតឲ្យសិស្សដែលត្រូវបានបណ្តេញចេញឲ្យចូលរៀនវិញ។ ប៉ុន្តែ ការអនុញ្ញាតចូលរៀនវិញ មិនមែនចូលបានដោយស្វ័យប្រវត្តិទេ។ មណ្ឌលសិក្សាធិការរបស់អ្នក ត្រូវតែកំណត់ថាកូនរបស់អ្នកអាចត្រូវបានអនុញ្ញាតឲ្យចូលរៀនវិញនៅមណ្ឌលសិក្សាធិការនោះ។1
បន្ទាប់ពីការបោះឆ្នោតបណ្តេញកូនអ្នកហើយ គណៈកម្មការអាចផ្អាកការអនុវត្តច្បាប់ទៅលើការបណ្តេញចេញនោះមួយរយៈ រហូតដល់រយៈពេលមួយឆ្នាំ។ ក្នុងអំឡុងពេលនេះ គាត់កំពុងស្ថិតក្នុង “ការព្យួរទោសដោយមានលក្ខខណ្ឌ”។ ការព្យួរទោសមានលក្ខខណ្ឌអាចត្រូវបានដកហូតវិញ ហើយការបណ្តេញចេញពីការសិក្សាត្រូវបានអនុវត្ត ប្រសិនបើកូនរបស់អ្នកប្រព្រឹត្ដអំពើណាមួយដែលគាត់អាចត្រូវបានគេផ្អាក ឬបណ្តេញចេញពីការសិក្សា ឬបានបំពានលើក្រមសីលធម៌សិស្សប្រចាំមណ្ឌលសិក្សាធិការនោះ។ បន្ទាប់ពីការព្យួរទោសមានលក្ខខណ្ឌដោយជោគជ័យក្នុងរយៈពេលមួយឆ្នាំ គាត់ត្រូវបានដាក់បញ្ចូលទៅក្នុងកន្លែងសិក្សាដើមវិញ។ មណ្ឌលសិក្សាធិការអាចលុបចោលកំណត់ត្រាព័ត៌មានទាំងអស់របស់កូនអ្នកដែលពាក់ព័ន្ធនឹងការពន្យារពេលនៃការបណ្តេញចេញ ប៉ុន្តែវាមិនត្រូវបានតម្រូវឲ្យធ្វើទេ។2 សេចក្តីបង្គាប់ឲ្យបណ្តេញកូនរបស់អ្នកចេញ ត្រូវតែបញ្ជាក់ពីកាលបរិច្ឆេទដែលគាត់អាចដាក់ពាក្យស្នើសុំដើម្បីទទួលបានការអនុញ្ញាតចូលរៀនវិញ។ កាលបរិច្ឆេទនោះមិនអាចហួសផុតថ្ងៃចុងក្រោយនៃឆមាសបន្ទាប់ពីឆមាសដែលការបណ្តេញចេញបានកើតឡើងនោះទេ ប៉ុន្តែអាច មុនកាលបរិច្ឆេទកំណត់នេះបាន។ សេចក្តីបង្គាប់នេះអាចរួមបញ្ចូលនូវផែនការនៃការស្តារនីតិសម្បទាដែលកូនរបស់អ្នកត្រូវតែអនុវត្តតាមក្នុងអំឡុងពេលនៃការបណ្តេញចេញនោះ។ វាក៏អាចរួមបញ្ចូលផងដែរនូវការវាយតម្លៃ នៅពេលដាក់ពាក្យសុំអនុញ្ញាតចូលរៀនវិញនោះផងដែរ។ ផែនការនេះ ក៏អាចរួមបញ្ចូលនូវការណែនាំសម្រាប់ការលើកកម្ពស់សកម្មភាពសិក្សា ការបង្រៀន ការវាយតម្លៃផ្នែកអប់រំពិសេស ការបណ្តុះបណ្តាលការងារ ការពិគ្រោះយោបល់ ការងារ សេវាកម្មសហគមន៍ ឬកម្មវិធីស្តារនីតិសម្បទាផ្សេងទៀត។3 ប្រសិនបើមានហេតុផលណាមួយសម្រាប់ការបណ្តេញចេញដែលពាក់ព័ន្ធនឹងសារធាតុដែលមានគ្រប់គ្រង ឬគ្រឿងស្រវឹង មណ្ឌលសិក្សាធិការតម្រូវឲ្យកូនរបស់អ្នកចូលក្នុងកម្មវិធីស្តារនីតិសម្បទាគ្រឿងញៀនដែលគាំទ្រដោយខោនធី ដែលជាលក្ខខណ្ឌមួយនៃការអនុញ្ញាតឲ្យចូលរៀនវិញ និងដោយមានការយល់ព្រមពីអ្នក។4