(8.23) កូនរបស់ខ្ញុំមានបញ្ហាអាកប្បកិរិយាដែលអាចធ្វើឲ្យគាត់ប្រឈមនឹងការព្យួរការសិក្សា និង/ឬការបណ្តេញចេញ។ តើមានសេវាកម្មពិសេស ឬការការពារសម្រាប់គាត់ដែរឬទេ?

ក្រោមច្បាប់របស់រដ្ឋនិងសហព័ន្ធនាពេលបច្ចុប្បន្ននេះ មជ្ឈមណ្ឌលសិក្សាធិការត្រូវផ្តល់សេវា និងការគាំទ្រនានាទាក់ទងនឹងអាកប្បកិរិយាសមស្រប រួមមានការវាយតម្លៃមុខងារអាកប្បកិរិយាលម្អិត និងផែនការអន្តរាគមន៍លើអាកប្បកិរិយាវិជ្ជមានជាដើម ប្រសិនបើចាំបាច់ នៅពេលដែលសិស្សណាម្នាក់មានអាកប្បកិរិយាដែលប៉ះពាល់ដល់ការសិក្សារបស់សិស្សនោះ ឬដល់សិស្សដទៃទៀត។ ¹

ប្រសិនបើកូនរបស់អ្នកមានអាកប្បកិរិយាដែលប៉ះពាល់ដល់ការសិក្សារបស់កូនអ្នក ឬកុមារដទៃទៀត ពេលនោះច្បាប់សហព័ន្ធតម្រូវឲ្យក្រុមការងារកម្មវិធី IEP ត្រូវធ្វើការពិចារណាថាតើការគាំទ្រផ្នែកអាកប្បកិរិយា និងយុទ្ធសាស្រ្ត និងសេវាកម្មមួយណាដែលត្រូវការចាំបាច់ ដើម្បីឲ្យកូនរបស់អ្នកអាចទទួលបានអត្ថប្រយោជន៍ពីការអប់រំនៅក្នុងមជ្ឈដ្ឋានដែលមានការរឹតបន្តឹងតិចបំផុត។² មណ្ឌលសិក្សាធិការត្រូវផ្តល់ប្រភេទនៃការវាយតម្លៃ ផែនការ សេវាកម្ម ឬការគាំទ្រដែលក្រុមការងារកម្មវិធី IEP របស់កូនអ្នកកំណត់ថាចាំបាច់ដើម្បីជួយដោះស្រាយបញ្ហាអាកប្បកិរិយារបស់កូនអ្នក។  អាកប្បកិរិយារបស់កូនអ្នកមិនគួររារាំងគាត់មិនឲ្យទទួលបានឱកាសសម្រាប់អត្ថប្រយោជន៍ពីការអប់រំ ឬទទួលការអប់រំក្នុងមជ្ឈដ្ឋានដែលមានការរឹតបន្តឹងតិចតួចនោះទេ។  

ប្រសិនបើកូនរបស់អ្នកមានបញ្ហាអាកប្បកិរិយាធ្ងន់ធ្ងរ ដូចជាមានភាពឆេវឆាវ ឬអាកប្បកិរិយាបង្កគ្រោះថ្នាក់ដល់ខ្លួនឯងជាដើម ពេលនោះក្រុមការងារកម្មវិធី IEP គួរពិចារណាថាតើកូនរបស់អ្នកត្រូវការការវាយតម្លៃអាកប្បកិរិយាមុខងារ (FBA) ឬផែនការអន្តរាគមន៍លើអាកប្បកិរិយា (BIP) ដែរឬទេ រួមជាមួយនឹងការពិចារណាលើសេវាកម្ម ឬយុទ្ធសាស្ត្រផ្សេងទៀតដើម្បីដោះស្រាយតម្រូវការអាកប្បកិរិយារបស់គាត់។ ប្រសិនបើកូនរបស់អ្នកមានផែនការ BIP ដែលមិនទាន់មានប្រសិទ្ធភាពនៅក្នុងការដោះស្រាយបញ្ហាអាកប្បកិរិយាប្រឈមរបស់កូនអ្នកបាននោះទេ អ្នកគួរបង្ហាញប្រាប់អំពីបញ្ហានេះទៅដល់ក្រុមការងារកម្មវិធី IEP និងស្នើសុំឲ្យកូនរបស់អ្នកទទួលបានការវាយតម្លៃ FBA លម្អិត ដើម្បីឲ្យក្រុមការងារកម្មវិធី IEP មានព័ត៌មានគ្រប់គ្រាន់ដើម្បីធ្វើការអភិវឌ្ឈផែនការ BIP បានលម្អិតជាងនេះ។

សូមចងចាំថាមុនពេលសិស្សដែលមានពិការភាពអាចត្រូវបានបណ្តេញចេញ មណ្ឌលសិក្សាធិការត្រូវរៀបចំកិច្ចប្រជុំកំណត់ឲ្យឃើញពិការភាព។ ប្រសិនបើមណ្ឌលសិក្សាធិការចង់បណ្តេញសិស្សចេញដោយសារអាកប្បកិរិយាណាមួយដែលបានផ្តោតជាគោលដៅសម្រាប់ការផ្លាស់ប្តូរក្រោមផែនការ BIP ដែលមាននៅក្នុងកម្មវិធី IEP របស់សិស្ស ពេលនោះក្រុមការងារកម្មវិធី IEP ចាំបាច់ត្រូវតែរកឲ្យឃើញច្បាស់ថាអាកប្បកិរិយានេះ គឺជាការកំណត់ឲ្យឃើញពិការភាពរបស់សិស្ស។ ម្យ៉ាងទៀត មណ្ឌលសិក្សាធិការអាចនឹងមិនបានការអនុវត្តផែនការ BIP ដែលតម្រូវឲ្យមាននៅក្នុងកម្មវិធី IEP។ ទោះក្នុងស្ថានភាពណាមួយក៏ដោយ ការបណ្តេញចេញនេះ អាចនឹងត្រូវបានហាមឃាត់។ ដូច្នេះ អ្នកត្រូវតែប្រាកដថាផែនការ BIP របស់កូនអ្នក ដោះស្រាយបញ្ហាអាកប្បកិរិយារបស់កូនអ្នកយ៉ាងជាក់លាក់គ្រប់ជ្រុងជ្រោយ។ នេះនឹងការពារកូនអ្នកបានល្អប្រសើរជាងមុនពីការបញ្ជុនបន្តសម្រាប់ការបណ្តេញចេញដោយសារអាកប្បកិរិយាទាំងនោះ។

មណ្ឌលសិក្សាធិការ អាចនឹងព្យួរការសិក្សាសិស្សដែលត្រូវការការអប់រំពិសេសដោយសារកាប្រព្រឹត្តខុស ទោះបីអាកប្បកិរិយាពាក់ព័ន្ធនោះ ត្រូវបានផ្តោតជាគោលដៅសម្រាប់ការផ្លាស់ប្តូរនៅក្នុងផែនការ BIP របស់សិស្សក៏ដោយ (យោងតាមដែនកំណត់លើការផ្អាកការសិក្សាដែលបានពិភាក្សាខាងលើ)។ ប៉ុន្តែ នៅក្នុងការណែនាំនាពេលថ្មីៗនេះ ការិយាល័យសេវាកម្មអប់រំពិសេស និងស្តារនីតិសម្បទា (OSERS) បានបញ្ជាក់ថាច្បាប់ IDEA មិនផ្តល់ឲ្យបុគ្គលិកសាលានូវសិទ្ធិអំណាចទូលំទូលាយក្នុងការព្យួរការសិក្សារយៈពេលតិចជាងដប់ថ្ងៃ ដោយមិនបានពិចារណាថាតើកម្មវិធី IEP ឬផែនការ BIP របស់កុមារត្រូវបានដោះស្រាយបញ្ហាអាកប្បកិរិយារបស់គាត់បានសមស្របដែរឬទេ។ ម្យ៉ាងទៀត ការព្យួរការសិក្សាច្រើនលើកច្រើនសារក្នុងរយៈពេល 10 ថ្ងៃ ឬតិចជាងនេះអាចបង្ហាញថាកម្មវិធី IEP របស់កុមារមិនត្រូវបានគណនាឲ្យបានសមស្របដើម្បីផ្តល់នូវអត្ថប្រយោជន៍អប់រំគ្រប់គ្រាន់នោះទេ ហើយថាក្រុមការងារកម្មវិធី IEP គួរតែដោះស្រាយបញ្ហាតម្រូវការសម្រាប់ជំនួយផ្នែកអាកប្បកិរិយាបន្ថែមទៀត។³

Cal. Ed. Code Sec. 56520(b)(3).[↩]
34 C.F.R. Sec. 300.324(a)(2), (b)(2); Cal. Ed. Code Sec. 56521.2(b).[↩]
OSERS, ជូនចំពោះមិត្តរួមការងារ លិខិតស្ដីពីការរួមបញ្ចូលការគាំទ្រអាកប្បកិរិយា នៅក្នុងផែនការអប់រំលក្ខណៈបុគ្គល មាននៅលើគេហទំព័រ៖  OSERS, ជូនចំពោះមិត្តរួមការងារ លិខិតស្ដីពីការរួមបញ្ចូលការគាំទ្រអាកប្បកិរិយា នៅក្នុងផែនការអប់រំលក្ខណៈបុគ្គល មាននៅលើគេហទំព័រ៖  https://sites.ed.gov/idea/files/dcl-on-pbis-in-ieps-08-01-2016.pdf[↩]