មាតាបិតា/អាណាព្យាបាល/អ្នកមានសិទ្ធិអប់រំផ្សេងទៀតត្រូវបានរំពឹងថានឹងធ្វើជាអ្នកចូលរួមដោយស្មើភាពជាមួយនឹងបុគ្គលិកសាលានៅក្នុងការអភិវឌ្ឍ ត្រួតពិនិត្យ និងកែសម្រួលកម្មវិធី IEP របស់សិស្ស។ តាមពិត ក្រុមការងារកម្មវិធី IEP ត្រូវតែពិចារណាលើចំណុចខ្លាំងរបស់កូនអ្នក និងក្តីកង្វល់របស់អ្នកសម្រាប់ការលើកកម្ពស់ការអប់រំរបស់គាត់។ 1
អ្នកអាចរួមចំណែកនៅក្នុងកិច្ចដំណើរការកម្មវិធី IEP ដោយយកទៅជាមួយនូវខ្លឹមសារសង្ខេបជាលាយលក្ខណ៍អក្សរដែលពិពណ៌នាអំពីតម្រូវការនានារបស់កូនអ្នក តាមការយល់ឃើញរបស់អ្នក ទៅកាន់កិច្ចប្រជុំកម្មវិធី IEP ។ មណ្ឌលសិក្សាធិការ ត្រូវតែរួមបញ្ចូលនូវការចូលរួមមតិយោបល់របស់អ្នកនៅក្នុងកិច្ចប្រជុំកម្មវិធី IEP។ មណ្ឌលត្រូវតែភ្ជាប់មកជាមួយផងដែរនូវខ្លឹមសារសង្ខេបជាលាយលក្ខណ៍អក្សររបស់អ្នកទៅកាន់កម្មវិធី IEP ប្រសិនបើអ្នកស្នើសុំ។ 2 ខ្លឹមសារសង្ខេបនេះ គួររួមបញ្ចូលនូវផ្នែកទាំងនេះ៖
- ចំណុចខ្លាំង (ឧ. ភាពរួសរាយ បើកចំហ សុទិដ្ឋិនិយម និយាយច្បាស់លាស់ ភាពច្នៃប្រឌិត ភាពសិទ្ធិស្នាល និងភាពឈឺឆ្អាល)។ ក្រុមការងារកម្មវិធី IEP ក៏ត្រូវតែពិចារណាផងដែរថា៖ ក្តីបារម្ភរបស់មាតាបិតា/អាណាព្យាបាល/អ្នកមានសិទ្ធិអប់រំផ្សេងទៀតសម្រាប់ការលើកម្ពស់ការអប់រំរបស់សិស្ស លទ្ធផលនៃការវាយតម្លៃដំណាក់កាលដំបូង និងថ្មីៗបំផុតទៅលើការសិក្សារបស់សិស្សនៅក្នុងការវាយតម្លៃមួយចំនួនទូទាំងមណ្ឌលសិក្សាធិការ ឬទូទាំងរដ្ឋ។ 3;
- ចំណុចខ្សោយ/ផ្នែកនៃបញ្ហា (ឧ. គំនិតផ្ទាល់ខ្លួនអន់ ភាពអន់ថយផ្នែកសិក្សា ការឈ្លោះប្រកែក គ្មានសណ្តាប់ធ្នាប់ ចំណាយពេលវែងលើសកម្រិតមធ្យមនៅក្នុងការបំពេញកិច្ចការដែលគ្រូដាក់ឲ្យធ្វើ ងាយបាក់ទឹកចិត្ត)
- កម្រិតមុខងារ (ឧ. ពិបាកក្នុងការអាន គណិតវិទ្យាឬអក្ខរាវិរុទ្ធ ការចុះខ្សោយនៃជំនាញយល់ ការឆ្លើយតបទៅនឹងចំណាប់អារម្មណ៍បុគ្គល ត្រូវការការលើកកម្ពស់ផ្នែកពាក្យសម្តីសម្រាប់សម្ភារៈដែលបានផ្តល់ជូន) និង
- អ្វីដែលកុមារត្រូវការសិក្សា (ឧ. គំនិតផ្ទាល់ខ្លួនបែបវិជ្ជមានជាងមុន កម្រិតសមត្ថភាពតាមកម្រិតថ្នាក់នៅក្នុងផ្នែកសិក្សា ជំនាញចូលសង្គមសមស្របតាមអាយុ ជំនាញស្វ័យជំនួយ ការបណ្តុះបណ្តាលការងារ ត្រូវការមានសណ្តាប់ធ្នាប់ជាងមុន ធ្វើកិច្ចការឲ្យបានឆាប់រហ័សជាងមុន)។
ទម្រង់គំរូជាលាយលក្ខណ៍អក្សរនេះ ជួយអ្នកឲ្យរៀបចំការគិតរបស់អ្នកឲ្យមានរបៀប។ ពេលនោះ អ្នកអាចជួយដល់បុគ្កលិកសាលានៅក្នុងការកំណត់ផ្នែកគោលដៅនានាសម្រាប់កូនរបស់អ្នក និងការពិពណ៌នាពេញលេញអំពីតម្រូវការអប់រំរបស់កូនអ្នកជាលាយលក្ខណ៍អក្សរ។
អ្នកក៏អាចចូលរួមចំណែក ដោយនាំយកអ្នកផ្សេងទៀតដែលស្គាល់កូនអ្នកដើម្បីមកជួយគាំទ្រអ្នក ដោយភាពមានការសម្រេចចិត្តខ្ពស់នៅក្នុងកិច្ចប្រជុំកម្មវិធី IEP និងដោយការដឹងច្បាស់ពីសិទ្ធិរបស់អ្នកក្រោមច្បាប់នេះ។