នៅក្នុងឆ្នាំ1975 រដ្ឋសភាពសហរដ្ឋអាមេរិកទី 94 បានអនុម័តច្បាប់ស្តីពីការអប់រំសម្រាប់កុមារពិការទាំងអស់ (Education for All Handicapped Children Act) (ច្បាប់សាធារណៈ 94-142) បច្ចុប្បន្ននេះហៅថាច្បាប់អប់រំសម្រាប់បុគ្គលដែលមានពិការភាព (Individuals with Disabilities Education Act, IDEA). [20 U.S.C. Secs. 1400 និងផ្នែកបន្តបន្ទាប់] រដ្ឋកាលីហ្វ័រញ៉ា ក៏បានអនុម័តច្បាប់របស់ខ្លួនផងដែរ ដែលមានលក្ខណៈស្របគ្នាជាទូទៅជាមួយនឹងច្បាប់ IDEA និងបង្កើតបានជាមូលដ្ឋានសម្រាប់ផ្តល់សេវាកម្មនៅក្នុងរដ្ឋនេះ។ [ច្បាប់អប់រំនៅរដ្ឋកាលីហ្វ័រញ៉ា (Cal. Ed. Code) Secs. 56000 និងផ្នែកបន្តបន្ទាប់]
ច្បាប់រដ្ឋនិងសហព័ន្ធ មានចែងនូវបញ្ញត្តិភាគច្រើនដែលគ្របដណ្តប់ទៅលើការផ្តល់សេវាអប់រំពិសេស និងសេវាកម្មពាក់ព័ន្ធ។ ប៉ុន្តែ ជួនកាលច្បាប់នោះ គឺមានភាពមិនច្បាស់លាស់ ឬមិនរាប់បញ្ចូលចំណុចមួយចំនួន។ ប្រសិនបើករណីនេះកើតឡើង ទាំងក្រសួងអប់រំសហព័ន្ធ (Federal Department of Education) និងនាយកដ្ឋានអប់រំរបស់រដ្ឋកាលីហ្វ័រញ៉ា (California State Department of Education, CDE) បានបង្កើតនូវបទប្បញ្ញត្តិក្រោមអំណាចនៃច្បាប់ IDEA ឬច្បាប់រដ្ឋ។ បទប្បញ្ញត្តិសហព័ន្ធ គឺមាននៅត្រង់ជំពូក 34 នៃច្បាប់បទប្បញ្ញត្តិសហព័ន្ធ (Code of Federal Regulations) ភាគទី 300 (34 C.F.R. Sec. 300) និងបទប្បញ្ញត្តិរដ្ឋ គឺមាននៅជំពូក 5 ច្បាប់បទប្បញ្ញត្តិរដ្ឋកាលីហ្វ័រញ៉ា (California Code of Regulations) ផ្នែក 3000 និងផ្នែកបន្តបន្ទាប់ (5 C.C.R. Secs. 3000 និងផ្នែកបបន្តបន្ទាប់។)
ច្បាប់និងបទប្បញ្ញត្តិសហព័ន្ធ បង្កើតនូវក្របខណ្ឌទូលំទូលាយ ដែលនៅក្នុងនោះរដ្ឋកាលីហ្វ័រញ៉ា ត្រូវតែមានមុខងារជាអ្នកទទួលមូលនិធិសហព័ន្ធនៅក្រោមច្បាប់ IDEA។ ដោយសារតែរដ្ឋកាលីហ្វ័រញ៉ាបានអនុម័តច្បាប់លក្ខន្តិកៈ និងបទប្បញ្ញត្តិផ្ទាល់ខ្លួន ដូច្នេះច្បាប់ទាំងនេះនឹងត្រូវអនុវត្តនៅក្នុងការផ្តល់ការអប់រំពិសេសនៅក្នុងរដ្ឋ។ ប៉ុន្តែ ដោយសារតែច្បាប់ធម្មនុញ្ញកំពូលរបស់សហរដ្ឋអាមេរិក (Supremacy Clause of the U.S. Constitution) ដូច្នេះ ច្បាប់សហព័ន្ធ និងបទប្បញ្ញត្តិនានាត្រូវតែយកមកអនុវត្ត នៅពេលណាមានភាពជាន់គ្នាណាមួយកើតឡើងរវាងច្បាប់រដ្ឋនិងសហព័ន្ធ លើកលែងតែនៅពេលដែលច្បាប់រដ្ឋផ្តល់សិទ្ធិបន្ថែមទៀតទៅដល់បុគ្គល។ [Students of the California School for the Blind v. Honig (9th Cir. 1984) 736 F.2d 538.]