ភាព​ខុសគ្នា​រវាង​ “សេវាវេជ្ជសាស្ត្រ​” និង​ “សេវាសុខភាព” តាមសាលារៀន គឺមានសារៈសំខាន់​។​ ក្រៅពី​សេវាវេជ្ជសាស្ត្រ​ទាំងឡាយ​ដែល​ប្រើសម្រាប់​ “គោលបំណង​ធ្វើរោគវិនិច្ឆ័យ និង​ការវាយ​តម្លៃ​​” មណ្ឌលសិក្សា​ធិការ​ គឺ​មិនមានការទទួលខុសត្រូវ​ចំពោះការផ្តល់​សេវាវេជ្ជសាស្ត្រ​សម្រាប់​សេវា​ពាក់ព័ន្ធនោះទេ​។​ [34 C.F.R. Sec. 300.34(a).] “សេវាវេជ្ជសាស្ត្រ​” ត្រូវបាន​កំណត់និយម​ន័យនៅក្នុង​ច្បាប់​សហព័ន្ធ​ថាជា​ “សេវា​កម្មដែល​ផ្តល់ជូនដោយ​គ្រូពេទ្យ​មាន​អាជ្ញាបណ្ណ​ម្នាក់​។” [34 C.F.R. Sec. 300.34(c)(5).] ប្រសិនបើ​សេវាកម្ម​មួយ​ អាចត្រូវបាន​អនុវត្ត​ដោយ​គិលានុប្បដ្ឋា​ក​​សាលា ឬ​បុគ្គលដែល​មាន​លក្ខណៈសម្បត្តិ​ផ្សេង​ទៀត និង​មិនមែនជាសេវាកម្មដែល​ត្រូវតែ​ផ្តល់​ដោយ​គ្រូពេទ្យ​ដែលមានអាជ្ញាបណ្ណ​ម្នាក់ទេ ពេលនោះ​​វា​មិន​មែន​ជា​​សេវាវេជ្ជសាស្ត្រ​នោះទេ​។ [Cedar Rapids Community Sch. Dist. v. Garret F., 526 U.S. 66 (1999).]

មណ្ឌលសិក្សាធិការ​ ត្រូវតែ​ផ្តល់​សេវាសុខភាព​ដែលមិនមែនជា​សេវា​វេជ្ជសាស្ត្រ​ ប្រសិនបើ​ពួកវា​ជាសេវាកម្ម​ពាក់ព័ន្ធ​។​ សេវាសុខភាព គឺជា​សេវាកម្មពាក់ព័ន្ធ ប្រសិនបើ​វា​មាន​ភាព​ចាំបាច់​ក្នុងការ​ជួយ​ដល់​កុមារ​ដែលមានពិការភាព​ឲ្យ​ទទួល​បានអត្ថប្រយោជន៍​ពីការអប់រំពិសេស​។​ ប្រសិនបើ​កូនអ្នកត្រូវ​ការ​សេវាសុខភាព ​ដើម្បី​អាច​ចូលរៀននៅសាលា​ក្នុងកម្រិត​ណាមួយ នោះ​គាត់ត្រូវ​ការសេវានោះ​ដើម្បី​ទទួលបានអត្ថប្រយោជន៍​ពីការអប់រំពិសេស​។​  [Irving Independent Sch. Dist. v. Tatro, 468 U.S. 883, 892 (U.S. 1984).] សិទ្ធិរបស់កូនអ្នកក្នុងការចូលរៀន​នៅសា​លា​​ មិនអាច​ត្រូវបាន​កំណត់​លក្ខខណ្ឌ​ផ្លូវ​ច្បាប់ទៅលើ​វត្តមាន​របស់អ្នក​នៅ​សាលា​ ក្នុងនាមជាអ្នក​ផ្តល់​សេវាថែទាំ​សុខភាព​របស់គាត់​នោះទេ​។​​​​​