ច្បាប់រដ្ឋចែងថាមណ្ឌលសិក្សាធិការអាចនឹងប្រើប្រាស់គិលានុប្បដ្ឋាករបស់សាលា ឬបុគ្គលិកផ្សេងទៀតដើម្បីជួយសិស្សក្នុងការប្រើប្រាស់ថ្នាំរបស់ពួកគេ ប្រសិនបើអ្នកផ្តល់សេវាថែទាំសុខភាពដែលទទួលបានការអនុញ្ញាតរបស់សិស្សបញ្ជាក់អំពីវិធីសាស្ត្រ បរិមាណ និងពេលវេលានៃការផ្តល់ថ្នាំនោះ (និងព័ត៌មានពាក់ព័ន្ធផ្សេងទៀតដែលសាលារៀនបានតម្រូវឲ្យមាន) និងប្រសិនបើមាតាបិតា/អាណាព្យាបាល/អ្នកមានសិទ្ធិអប់រំផ្សេងទៀតផ្តល់សំណើជាលាយលក្ខណ៍អក្សរសុំជំនួយនេះ។ អ្នកផ្តល់សេវាថែទាំសុខភាពដែលទទួលបានអនុញ្ញាត គឺជាបុគ្គលដែលទទួលបានអាជ្ញាបណ្ណនៅក្នុងរដ្ឋកាលីហ្វ័រញ៉ាក្នុងការចេញវេជ្ជបញ្ជាឱសថ។ 1
កូនរបស់អ្នកអាចអនុវត្ត ឬប្រើប្រាស់ដោយខ្លួនឯងនូវ ថ្នាំមានវេជ្ជបញ្ជាដូចជាថ្នាំ epinephrine សម្រាប់ការចាក់ដោយស្វ័យប្រវត្តិ ឬ ថ្នាំសម្រាប់ជំងឺហឺតស្រូបតាមដង្ហើមជាដើម សម្រាប់ជំងឺហឺត ប្រសិនបើមណ្ឌលសិក្សាធិការទទួលបានរបាយការណ៍ជាលាយលក្ខណ៍អក្សរណាមួយពីអ្នកផ្តល់សេវាសុខភាពរបស់កូនអ្នក។ លិខិតបញ្ជាក់របស់គ្រូពេទ្យ គ្រូពេទ្យវះកាត់ ឬរបស់ជំនួយការគ្រូពេទ្យត្រូវរួមបញ្ចូលនូវឈ្មោះថ្នាំ វិធីសាស្ត្រ បរិមាណ និងកាលវិភាគពេលវេលាផ្តល់ថ្នាំ។ អ្នកនឹងត្រូវបានតម្រូវឱ្យផ្តល់ការយល់ព្រមជាលាយលក្ខណ៍អក្សររបស់អ្នកសម្រាប់កូនរបស់អ្នកក្នុងការប្រើប្រាស់ថ្នាំដោយខ្លួនឯង និងសម្រាប់បុគ្គលិក សាលា ដើម្បីទាក់ទងដោយផ្ទាល់ជាមួយអ្នកផ្តល់សេវាថែទាំសុខភាពរបស់កូនអ្នកទាក់ទងនឹងសំណួរណាមួយដែលអាចកើតឡើងទាក់ទងនឹងថ្នាំ និងដោះលែងមណ្ឌលសិក្សាធិការ និងបុគ្គលិកសាលាពីការទទួលខុសត្រូវ ប្រសិនបើកុមារទទួលរងនូវប្រតិកម្មមិនល្អពីការប្រើប្រាស់ថ្នាំដោយខ្លួនឯង។ 2 ម្យ៉ាងទៀត មណ្ឌលសិក្សាធិការ អាចផ្តល់ម្ជុលស្វ័យប្រវត្តិចាក់ថ្នាំ epinephrine ដល់បុគ្គលិកដែលទទួលបានការបណ្តុះបណ្តាល ដើម្បីផ្តល់ជំនួយវេជ្ជសាស្ត្រសង្រ្គោះបន្ទាន់ដល់បុគ្គលដែលមានប្រតិកម្មទៅនឹងថ្នាំ។ 3
លើសពីនេះទៀត ប្រសិនបើកូនរបស់អ្នកមានជំងឺទឹកនោមផ្អែម និងអាចធ្វើតេស្តដោយខ្លួនឯង និងគ្រប់គ្រងកម្រិតជាតិស្ករក្នុងឈាមរបស់គាត់បាន គាត់នឹងទទួលបានការអនុញ្ញាតឲ្យធ្វើតេស្ត និងផ្តល់ការថែទាំជំងឺទឹកនោមផ្អែមដោយខ្លួនឯង បាននៅសាលារៀន ទៅតាមការស្នើសុំជាលាយលក្ខណ៍អក្សររបស់អ្នក។ ការនេះអាចប្រព្រឹត្តទៅបាននៅក្នុងថ្នាក់រៀន ឬកន្លែងផ្សេងទៀតនៃសាលារៀនអំឡុងពេលសកម្មភាពពាក់ព័ន្ធនឹងសាលារៀន និង (ទៅតាមការស្នើសុំជាក់លាក់របស់អ្នក) នៅក្នុងទីតាំងឯកជន។ អ្នកក៏នឹងចាំបាច់ត្រូវផ្តល់ការអនុញ្ញាតពីអ្នកផ្តល់សេវាថែទាំសុខភាពរបស់គាត់ផងដែរ។ 4 សូមមើល ជំពូក 14 ព័ត៌មានស្តីពីសិទ្ធិរបស់សិស្សដែលមានស្ថានភាពសុខភាពធ្ងន់ធ្ងរ។