ការអប់រំពិសេស មានន័យថាជាការបង្រៀនដែលបានបង្កើតឡើងជាពិសេស ដោយឥតគិតថ្លៃចំពោះមាតាបិតា /អាណាព្យាបាល/អ្នកមានសិទ្ធិអប់រំផ្សេងទៀត ដើម្បីបំពេញតម្រូវការពិសេសរបស់កុមារដែលមានពិការភាពណាម្នាក់។ ការបង្រៀននេះ អាចរាប់បញ្ចូលនូវការបង្រៀននៅតាមថ្នាក់រៀន ការបង្រៀនតាមផ្ទះ និងការបង្រៀននៅក្នុងមន្ទីរពេទ្យនិងស្ថាប័ននានា ការបង្រៀននៅក្នុងមជ្ឈដ្ឋានផ្សេងៗ និងការបង្រៀននៅក្នុងការអប់រំកាយ។ ការអប់រំពិសេស ក៏រួមបញ្ចូលផងដែរនូវរោគសាស្ត្រផ្នែកពាក្យសម្តី-ភាសា ឬសេវាកម្មពាក់ព័ន្ធផ្សេងទៀតណាមួយ ប្រសិនបើសេវាកម្មនោះត្រូវបានចាត់ទុកថាជាការអប់រំពិសេស ក្រោមស្តង់ដារដ្ឋ ការបណ្តុះបណ្តាលស្តីពីការធ្វើដំណើរ និងការអបរំវិជ្ជាជីវៈ។ ច្បាប់រដ្ឋកាលីហ្វ័រញ៉ាបានបន្ថែមទៅលើការកំណត់និយមន័យរបស់សហព័ន្ធអំពីការអប់រំពិសេស ដោយតម្រូវឲ្យមានការផ្តល់ជូនការអប់រំពិសេសនេះទៅដល់សិស្សទាំងឡាយដែលមានពិការភាព ដែលតម្រូវការអប់រំរបស់ពួកគេមិនអាចបំពេញបានដោយការកែសម្រួលកម្មវិធីបង្រៀនទូទៅ។ 1
បទប្បញ្ញត្តិសហព័ន្ធ កំណត់និយមន័យជាក់លាក់ទៅលើបច្ចេកស័ព្ទសំខាន់ៗមួយចំនួនដែលបានរួមបញ្ចូលទៅក្នុងនិយមន័យនេះ៖
គ្មានបន្ទុកចំណាយ គឺមានន័យថា “រាល់ការបង្រៀនដែលបានបង្កើតឡើងយ៉ាងពិសេស ត្រូវបានផ្តល់ជូនដោយឥតគិតថ្លៃ ប៉ុន្តែមិនហាមឃាត់ចំពោះថ្លៃចំណាយចៃដន្យនានា ដែលត្រូវបានគិតប្រាក់ជាធម្មតាចំពោះសិស្សទាំងអស់ ដោយមិនគិតពីពិការភាពណាមួយ ឬឪពុកម្តាយរបស់ពួកគេ សម្រាប់ជាផ្នែកមួយនៃកម្មវិធីអប់រំធម្មតា។” 2
ការអប់រំកាយ មានន័យថា “ការអភិវឌ្ឍលំហាត់ប្រាណនិងចលករ ទម្រង់និងបំណិនចលករមូលដ្ឋាន និងបំណិនផ្នែកកីឡាក្នុងទឹក របាំ និងល្បែងនិងកីឡាជាលក្ខណៈបុគ្គលនិងជាក្រុម (រួមទាំងកីឡាជាក្រុម និងកីឡាដែលអាចលេងពេញមួយជីវិតផងដែរ)”។ បច្ចេកស័ព្ទនេះ “ក៏រួមបញ្ចូលផងដែរនូវការអប់រំកាយពិសេស ការអប់រំកាយបែបកែសម្រួល ការអប់រំចលនា និងការអភិវឌ្ឍចលករ។” 3
ការបង្រៀនដែលបានបង្កើតឡើងយ៉ាងពិសេស មានន័យថា “ការកែសម្រួលឲ្យបានសមស្របទៅតាមតម្រូវការរបស់កុមារដែលទទួលបានសិទ្ធិ … ខ្លឹមសារ វិធីសាស្ត្រ ឬការផ្តល់ការណែនាំដើម្បីដោះស្រាយបញ្ហាតម្រូវការពិសេសរបស់កុមារនោះ ដោយសារតែពិការភាពរបស់កុមារនោះ និងដើម្បីធានាដល់ការចូលរួមរបស់កុមារទៅក្នុងកម្មវិធីអប់រំទូទៅ ដើម្បីឲ្យកុមារអាចបំពេញតាមស្តង់ដាអប់រំក្នុងដែនសមត្ថកិច្ចរបស់ទីភ្នាក់ងារសារធារណៈដែលអនុវត្តចំពោះកុមារទាំងអស់។” 4
ការហ្វឹកហាត់ការធ្វើដំណើរ មានន័យថា “ជាការផ្តល់ការបង្រៀនឲ្យបានសមស្របទៅដល់កុមារដែលមានពិការភាពផ្នែកយល់ដឹងធ្ងន់ធ្ងរ និងកុមារដែលមានពិការភាពផ្សេងទៀត ដែលពួកគេតម្រូវឲ្យមានការបង្រៀននេះ ដើម្បីជំរុញឲ្យពួកគេអភិវឌ្ឍការយល់ដឹងអំពីមជ្ឈដ្ឋានដែលពួកគេរស់នៅ និងសិក្សាជំនាញនានាដែលចាំបាច់ក្នុងការផ្លាស់ទីពីកន្លែងមួយទៅកន្លែងមួយក្នុងមជ្ឈដ្ឋាននោះ (ឧ. នៅក្នុងសាលារៀន នៅផ្ទះ នៅកន្លែងធ្វើការ និងនៅក្នុងសហគមន៍)។” 5
ការបណ្តុះបណ្តាលវិជ្ជាជីវៈ មានន័យថា “កម្មវិធីអប់រំមានការរៀបចំត្រឹម ត្រូវ ដែលមានជាប់ពាក់ព័ន្ធដោយផ្ទាល់ជាមួយនឹងការត្រៀមរៀបចំបុគ្គលនានាសម្រាប់ការងារដែលទទួលបានប្រាក់កម្រៃ ឬមិនទទួលបានប្រាក់កម្រៃ ឬសម្រាប់ការត្រៀមរៀបចំបន្ថែមសម្រាប់អាជីពណាមួយដែលមិនតម្រូវឲ្យមានសញ្ញាបត្រមធ្យមសិក្សា ឬសញ្ញាបត្រកម្រិតខ្ពស់អ្វីឡើយ។” 6