(1.101) តើខ្ញុំមានសិទ្ធិអ្វីខ្លះ ប្រសិនបើភាសាអង់គ្លេសមិនមែនជាភាសាកំណើតរបស់ខ្ញុំ ឬខ្ញុំមិនចេះនិយាយភាសាអង់គ្លេស?

ក្រុមគ្រួសារដែលមិនចេះនិយាយ ឬសរសេរភាសាអង់គ្លេសសម្រាប់ជាភាសាទីមួយរបស់ពួកគេ មានសិទ្ធិចូលរួមពេញលេញទៅក្នុងដំណើរការអប់រំពិសេស។ សិទ្ធិទាំងអស់នេះរួមមាន៖

សិទ្ធិទទួលបានសេចក្ដីចម្លងនៃឯកសារ IEP ជាភាសាទីមួយរបស់មាតាបិតា/អាណាព្យាបាល/អ្នកមានសិទ្ធិទទួលបានការអប់រំផ្សេងទៀត តាមសំណើរបស់មាតាបិតា/អាណាព្យាបាល/អ្នកមានសិទ្ធិអប់រំផ្សេងទៀត។ ¹
សិទ្ធិក្នុងការទទួលបានព័ត៌មានពេញលេញជាភាសាកំណើតរបស់ខ្លួន ឬរបៀបប្រាស្រ័យទាក់ទងផ្សេងទៀតនូវព័ត៌មានទាំងអស់ដែលពាក់ព័ន្ធទៅនឹងសកម្មភាពរបស់មណ្ឌលសិក្សាធិការ ដែលការយល់ព្រមរបស់ មាតាបិតា/អាណាព្យាបាល/អ្នកមានសិទ្ធិអប់រំផ្សេងទៀតកំពុងត្រូវបានស្នើសុំ។ ²
សិទ្ធិក្នុងការជំរុញឲ្យធ្វើការវាយតម្លៃចំពោះកុមារដែលមានជំនាញភាសាអង់គ្លេសនៅមានកម្រិត ជាភាសាកំណើតរបស់គាត់ ឬជារបៀបប្រាស្រ័យទាក់ទងផ្សេងទៀត និងជាទម្រង់ដែលអាចនឹងផ្តល់ព័ត៌មានត្រឹមត្រូវបំផុតទៅលើអ្វីដែលកុមារដឹង និងអាចធ្វើបានទៅតាមកម្រិតសិក្សា កម្រិតមុខងារ និងកម្រិតលូតលាស់ លើកលែងតែច្បាស់លាស់ថាមិនអាចធ្វើដូច្នោះបានមែន ³
សិទ្ធិមានអ្នកបកប្រែនៅឯកិច្ចប្រជុំកម្មវិធី IEP សម្រាប់មាតាបិតា/អាណាព្យាបាល/អ្នកមានសិទ្ធិអប់រំផ្សេងទៀតដែលមានជំងឺគថ្លង់ ឬមានភាសាកំណើតក្រៅពីភាសាអង់គ្លេស។ ⁴
សិទ្ធិក្នុងការទទួលបានការជូនដំណឹងជាលាយលក្ខណ៍អក្សរជាភាសាកំណើតរបស់ខ្លួន និងរបៀបប្រាស្រ័យទាក់ទងផ្សេងទៀត ពេលវេលាសមស្របមុនពេលមណ្ឌលសិក្សាធិការស្នើសុំ (បដិសេធ) ក្នុងការផ្តួចផ្តើមបង្កើត ឬផ្លាស់ប្តូរប្រភេទកំណត់អត្តសញ្ញាណរបស់សិស្សផ្នែកអប់រំពិសេស ទិន្នន័យវាយតម្លៃរបស់គាត់ កន្លែងរៀនរបស់គាត់ ឬអ្វីៗផ្សេងទៀតពាក់ព័ន្ធនឹងមធ្យោបាយដែលមណ្ឌលសិក្សាធិការកំពុងផ្តល់ការអប់រំ FAPE លើកលែងតែច្បាស់លាស់ថាមិនអាចធ្វើដូច្នោះបានមែន។ ⁵
សិទ្ធិមានផែនការវាយតម្លៃដែលបង្ហាញជូនមាតាបិតា/អាណាព្យាបាល/អ្នកមានសិទ្ធិអប់រំផ្សេងទៀតជាភាសាកំណើតរបស់ពួកគេ ឬរបៀបប្រាស្រ័យទាក់ទងផ្សេងទៀត លើកលែងតែច្បាស់លាស់ថាមិនអាចធ្វើដូច្នោះបានមែន។ ⁶
សិទ្ធិក្នុងការទទួលបានអ្នកបកប្រែម្នាក់នៅក្នុងសវនាការតាមនីតិវិធីត្រឹមត្រូវតាមច្បាប់។ ⁷ ទោះបីជាមិនបានបញ្ជាក់ច្បាស់លាស់ក្តី ប៉ុន្តែគួរតែផ្ដល់ជូនអ្នកបកប្រែនៅកិច្ចប្រជុំសម្រុះសម្រួលផងដែរ។ ⁸
សិទ្ធិក្នុងការទទួលបានការជូនដំណឹងអំពីការការពារសុវត្ថិភាពតាមនីតិវិធីដែលផ្តល់ជូនជាភាសាកំណើតរបស់ខ្លួន។ ⁹
សិទ្ធិក្នុងការទទួលបានព័ត៌មានជាភាសាកំណើតរបស់ខ្លួន តាមការស្នើសុំ ពាក់ព័ន្ធនឹងនីតិវិធីសម្រាប់ការដាក់បណ្តឹងទៅកាន់ទីភ្នាក់ងារគាំពារកុមារក្នុងមូលដ្ឋានប្រឆាំងនឹងបុគ្គលិកសាលា ឬបុគ្គលផ្សេងទៀតដែលប្រព្រឹត្តអំពើរំលោភបំពានលើកុមារប្រឆាំងនឹងកុមារណាម្នាក់នៅទីតាំងសាលារៀន។ ប្រសិនបើព័ត៌មាននេះ ត្រូវបានផ្សព្វផ្សាយដោយផ្ទាល់មាត់ ដូច្នេះត្រូវតែផ្តល់ជូនអ្នកបកប្រែម្នាក់។ ¹⁰

5 C.C.R. Sec. 3040(a).[↩]
34 C.F.R. Sec. 300.9; Cal. Ed. Code Sec. 56021.1.[↩]
34 C.F.R. Sec. 300.304(c)(1); Cal. Ed. Code Sec. 56320.[↩]
34 C.F.R. Sec. 300.322(e).[↩]
34 C.F.R. Sec. 300.503(c)(1).[↩]
Cal. Ed. Code Sec. 56321(b)(2).[↩]
5 C.C.R. Sec. 3082(d).[↩]
5 C.C.R. Sec. 3086(b)(3).[↩]
34 C.F.R. Sec. 300.504(d).[↩]
Cal. Ed. Code Sec. 48987.[↩]